6/12/2014
第十三回合：聖三一中心幼稚園 10:00
來到interview嘅最後一日，艾菲已經完全無壓力，皆因呢間學校完全無諗過會有機會，一條龍Happy School有學券全日制仲要本身有N班直升，年年都超額報名幾倍，報K成功率實在太低，但點解我哋明知唔得仲報呢，事關同米高商量報唔報聖三一曾肇添時，佢話反正呢日佢得閒放到假，不如就試埋佢當玩吓喎...咁都得？不過當係參觀吓見識吓都好吖﹗
因為明知學校會放好多邪惡嘅玩具出來任玩，所以我哋呢日無特別早到，同燒腩仔食完早餐就慢慢坐巴士出發，都係上車十分鐘就到，登記完就行去校務處聽老師brief流程，跟住已經夠鐘上課室門口等interview，而最好笑係坐坐吓先發現隔離個小朋友係燒腩仔嘅同班同學，好彩佢兩個本身唔同組唔算熟，唔係實玩到癲晒都似﹗
入到課室有三個老師，一個老師對兩個小朋友，一組組咁坐喺到玩玩具，燒腩仔眼前個係形狀手抓板，老師問緊另一個小朋友嘢時，燒腩仔就努力玩手抓板，玩完艾菲就細細聲考吓佢形狀同顏色，等咗陣終於到燒腩仔，老師講早晨有畀返應（其實坐低時已經主動同老師講咗早晨），之後老師畀咗籃lego佢砌，佢砌吓砌吓居然好勁咁砌咗隻船出來，玩完老師叫佢拆開收埋都有跟住做，老師循例都問吓艾菲點解會揀全日制學校，艾菲答完之後唔知佢係唔係聽到艾菲係FTM啦，所以無再問第二個問題（艾菲聽到佢問另一個家長時，問完點解揀全日制就問點解揀聖三一㗎）。
後來老師拎本書出來同佢哋講故事，兩個小朋友都有專心聽但無咩太大反應，後尾講到一半鬧鐘就響，老師就話interview完結，一人派咗個紀念品做禮物，燒腩仔有自己揀顏色同講謝謝，離開坐位時都有同老師講bye bye同拍凳。
出來會合返米高我哋就留喺學校慢慢玩，先玩樓上嘅遊戲室，再落返地下公園仔玩，學校大同資源多真係好吸引，D玩具同遊樂設施都特別勁過人，但真係如燒腩仔同學媽咪講，都幾多新香港人，大大聲咁喺到講普通話喝小朋友，有D又唔睇實小朋友由佢哋打尖差D踩到燒腩仔隻手，要艾菲埋去睇實個小朋友先行開，而米高就話喺出面等我哋嘅時候，感覺幾混亂大家都唔知做緊咩咁。
玩咗大半個鐘左右我哋就走啦，米高未in前已經講好要食返餐好慶祝吓，於是就帶咗燒腩仔去食恨咗好耐嘅元氣，呢個傻瓜小朋友因為知道同學仔放學會去呢到食烏冬，就一直想拉我哋帶佢去食，其實我哋唔係唔想帶佢去食，不過宜家D元氣等位等得太誇張啦，我哋屋企樓下新開呢間到夜晚九點都仲等緊位，小朋友唔餓得又點等呢，呢日食lunch終於唔使等位，一坐低第一時間就叫咗碗烏冬同燉蛋畀佢，食飽米高仲專登叫個芝士蛋糕畀佢做甜品添，食到佢勁滋味大滿足呀﹗
沒有留言:
張貼留言