15/11/2014
第七回合：香港培道小學幼稚園 16:00
呢間學校係艾菲最心儀嘅一間學校，除咗因為係一條龍100%直升小學之外，最重要係艾菲好buy校長嘅教育理念，無論係報名須知後面，還是簡介會時，佢都一再提醒家長唔好將面試睇得咁重，唔需要特別催谷小朋友，最緊要係開開心心咁當玩，畀小朋友做返一個小朋友，當係一個親子活動咁見完就算，所以艾菲每次in完都會讚燒腩仔，仲會請佢食嘢等佢開心吓，畢竟每個星期六同爸爸媽媽四圍去interview實在唔係佢哋想要嘅嘢，只係宜家嘅教育制度逼到父母唔咁做唔得。
離開九龍城浸信會幼稚園之後，我哋就拿拿聲趕返屋企，食個快飯就捉咗燒腩仔上床瞓晏覺，一瞓就瞓咗兩個鐘，明顯瞓醒之後精神咗好多，同佢慢慢食埋下午茶先出發，由於時間實在太鬆動，我哋決定坐巴士去順便等燒腩仔個腦清醒吓，上車唔使十五分鐘就到，原本連埋行入去嘅時間應該都係五分鐘左右，點知有個爸爸就唔信艾菲識路（明明艾菲之前去過學校聽簡介會），跟前面對家長行錯咗路入咗邨，終於用多十分鐘先到，去到學校已經係15:55。
都唔知咁樣行轉大運係好彩定唔好彩，入到學校當然係人山人海啦，門口嘅staff畀咗張程序表我哋就話可以喺playground到玩陣，不過playground嘅玩具實在太惡毒，滑梯，蟲蟲隧道，車同韆鞦，全部都係燒腩仔嘅至愛，放佢去玩肯定會好失控，但唔畀佢玩佢又實唔肯喪扭，所以最終都畀佢埋去玩陣滑梯，玩咗五分鐘已經宣布排隊入禮堂，但當時仲未輪到佢sir，艾菲上前勸佢走，唔甘心嘅佢即刻衝咗去爬隧道，講咗幾次玩多一次要走都唔理，無計可施下唯有活捉佢去排隊（米高當時已經幫手排緊），再用山渣餅馴服佢（如果已經玩緊車或者玩耐D肯定唔會咁順攤），期間佢不停指住話要玩車同玩韆鞦，艾菲唯有出口術話「你一陣問吓老師畀唔畀你玩先，佢話畀我哋就見完老師再出來玩，但佢話你唔乖唔畀玩就無得玩啦」。
我哋排隊先入學校大堂登記拎返自己份報名表，之後就分AB組入禮堂坐，由於interview只可由一個家長陪同，所以米高要喺出面等，入到禮堂等咗成十五分鐘有多，期間每個家長同小朋友都只得一張大人凳一齊坐，仲要不時向前移動換位，老實講呢個安排真係有D唔太好，小朋友呢個年紀要坐定定已經難，仲要坐定喺大人大脾上更加難，而且一眾媽媽又手袋又拎住份表，真係想伸手入袋拎D法寶出來氹吓小朋友都怕整到隔離嘅家長同小朋友，好彩我哋係A組已經叫做唔使等太耐，艾菲同燒腩仔睇吓書食吓山渣餅咁，都總算捱過咗未發癲。
之後我哋被安排入咗一個大房，分幾組咁放咗D積木喺地下（有軟墊畫定範圍），老師話隨意揀個位畀小朋友玩就得，但一定要除鞋先可以玩，呢一part之前簡介會時校長話純warm up唔會計分，但現場所見老師係有mark嘢，咁抱住碰運氣心態嘅艾菲又唔係太在乎計唔計分，只係做返自己咁陪燒腩仔玩（不過隔離位個媽媽就好大聲咁叫個女砌個城堡出來囉），我哋組全部都係女仔得燒腩仔一個男仔，基本上大家係完全無交流，燒腩仔只係好專心咁玩眼前嘅積木。
玩到咁上下艾菲就開始煩一陣夠鐘點說服燒腩仔放低玩具著鞋（其實要小朋友咁短時間內除鞋著鞋，艾菲覺得係有少少玩嘢feel），於是偷偷地準備定半塊山渣餅喺手，果然到夠鐘時燒腩仔拎實舊積木大叫「唔收玩具」，亦好唔好彩咁有老師經過聽到（實扣分啦﹗），艾菲當時都唔理得咁多，一手就將塊山渣餅塞咗落燒腩仔個口，但佢食完都係唔肯就範，艾菲唯有用以退為進呢招，同佢講唔收就唔收，叫佢拎住積木著鞋，咁顧得轉身著鞋就自然唔記得咗舊積木啦，艾菲再順手將佢側邊舊積木推走，著完鞋嘅燒腩仔自然乖乖跟住艾菲去前面排隊。
之後老師叫我哋排隊上一樓等面試，期間其實有D混亂，有D媽媽係明顯打尖，但艾菲都無理同燒腩仔慢慢行，上到一樓仲要企喺走廊到等，有D小朋友已經失控向前走or扭計，艾菲見燒腩仔只係好奇地伸手摸牆身D紙皮石就由佢，等咗十分鐘左右先有老師安排我哋入一間課室坐底繼續等，呢到終於可以一人坐一張凳，而燒腩仔都忽然好乖咁同艾菲講「唔可以落地地呀」，艾菲就同燒腩仔一齊睇書等時間過。
等咗五分鐘左右已經有老師叫我哋出去排隊等入課室，期間燒腩仔唔係好企得定，一時話要搵爸爸，一時又話要玩車車，咁艾菲就再一次出口術，同佢講「爸爸喺下面等緊我哋，一陣我哋入去課室同老師玩，佢D玩具好好玩㗎，你玩完問老師可唔可以玩車車，佢話可以我哋就落去同爸爸一齊玩」，估唔到燒腩仔聽完好開心，仲笑晒口咁拉住艾菲一齊跑入課室添﹗
一間課室見五組，可能係借小學課室來in，面試用嘅全部都係大人枱凳，燒腩仔自己上唔到凳，艾菲好尷尬咁出手幫佢一把，老師就相當nice咁講咗句「唔緊要」表示理解，一來老師就叫燒腩仔跟圖做配對曲奇，對於燒腩仔來講絕對係easy job啦，之後就拎咗本故事書出來同佢邊睇邊問，人物顏色物件燒腩仔都答到，唯獨係入面一隻好多毛嘅卡通狗佢唔識答，老師提水話「woo woo」佢都無講到個狗字出來（因為燒腩仔一直都係就咁叫狗做woo woo嘛...），跟住老師再拎D實物考燒腩仔咩來同咩用途，佢大部分都識答但就答唔出杯係用來做咩，艾菲唯有叫佢不如做畀老師睇，佢就即刻放埋口扮飲水，不過老師再問佢鐘意飲咩就無答到（鐘意食咩又識答喎>.<）。
考咗一輪之後，老師就畀咗架火車仔燒腩仔玩，問艾菲燒腩仔識唔識講自己個名同父母嘅名，艾菲答佢識佢就即刻問燒腩仔叫咩名，再真係問艾菲叫咩名同米高叫咩名，起初燒腩仔好似唔記得艾菲個名咁（艾菲初時仲以為佢會答Ivy媽媽同Michael爸爸），但艾菲提咗自己個姓，佢話咁快就響咗艾菲全名出來，連老師都要急急望吓份表睇佢有無講錯，之後再問米高個名唔使提都答到，不過最搞笑嘅係老師跟住問佢坐咩車來，佢答咗老師火車...之後臨走前艾菲試吓再問佢都堅持係坐火車來...仔...土瓜灣邊有火車坐㗎...老師實知你亂講啦﹗
跟住老師畀咗個手抓板燒腩仔玩，然後同艾菲傾咗陣偈，老師先係讚燒腩仔好主動講嘢，再問燒腩仔宜家讀緊N點解仲會報佢哋學校，又問艾菲有無去簡介會，清唔清楚佢哋係半日制學校，有宗教背景之類，由於簡介會時校長話只考小朋友唔會問家長嘢，所以艾菲信以為真完全無準備，最終答到都唔知自己講緊乜，出來覆述畀米高聽仲畀佢話「邊有人咁答㗎」，唉...唔知艾菲會唔會累咗燒腩仔呢...不過艾菲同老師傾偈期間，燒腩仔都有努力爭取表現㗎，佢搞掂個手抓板之後就自己喺到YEAH，再示意要艾菲同老師讚佢，呢一吓真係超爆笑﹗
老師同艾菲傾完之後，就轉返向燒腩仔，同佢講準備咗個波送畀佢問佢好唔好，燒腩仔答好老師就叫佢出走廊拎同講bye bye，燒腩仔有同老師講bye bye，但因為無見到個波嘅實物而無講謝謝（艾菲呢一吓都無意識到要講謝謝，係之後上BK見D媽媽話佢應該係考小朋友有無禮貎），反而之後拎波一刻就有同姐姐講謝謝啦，由於見完呢到已經完成今日全部interview，而playground嘅人潮都散得七七八八，我哋就履行諾言畀燒腩仔去玩車玩韆鞦，燒腩仔最後仲玩到唔捨得走呀﹗
in完之後艾菲同燒腩仔都鬆晒好開心，講真以燒腩仔十月細B來講，喺咁嘅面試環境同問題下，佢嘅表現已經令艾菲喜出望外，至少佢無喪扭喪喊唔合作，仲要笑住入去笑住出返來，無論佢最終有無offer，艾菲已經覺得我哋贏咗，畢竟兩千幾個application先得180個位，要中真係要D運氣，我哋努力嘗試過已經足夠﹗
沒有留言:
張貼留言