其實艾菲返娘家抖咗差唔多三星期之後，前一個星期六已經返咗屋企同燒腩仔一家團聚，本來都想抖多個星期，但眼見無媽媽喺身邊嘅燒腩仔已經有畀爺爺嫲嫲寵壞嘅跡象，咁啱又一早報咗名參加佢學校前一個星期日搞嘅步行籌款，就索性早D返去睇返實個仔，免得佢無皇管做咗皇帝仔，艾菲以後就有排受啦﹗
我哋因為K1 interview miss咗燒腩仔嘅學校旅行，難得今次有步行籌款梗係參加啦，呢朝天氣都幾凍，迪欣湖咁空礦就更加大風，正在休養中嘅艾菲都驚出事入風，所以有理無理著件羽絨包實自己（中醫話要好似坐月咁，而當時嘅艾菲係未刑滿，仲要明顯feel到自己個人好虛），落車後個個都爭住入7-11買熱飲同嘢食，艾菲就同燒腩仔睇吓迪欣湖icon噴水池同湖入面D錦鯉。
其實所謂嘅步行籌款係有D hea，只係沿住湖邊行咗一陣就話到終點，全程只係用咗半個鐘左右，可以拎住個牌影張相留念，不過有部分同學仔其實係無行到終點，老師都完全無發現，kakaka...
過咗終點之後，唔跟車返學校嘅就已經解散可以走，不過我哋一場來到，又有咁多同學仔一齊，梗係留低玩多陣先趕下場啦，我哋仲專登帶咗枝泡泡去吹，平日唔一定會一齊玩嘅小朋友，見到泡泡好自然就會group埋一齊拍，追到佢哋個個上氣唔接下氣添﹗
玩到枝泡泡無晒，我哋就坐返R8出迪士尼轉地鐵走，難得來到就梗係喺影相位影返幅相啦（咁下次真係來迪士尼時就可以慳返D時間直入樂園嘛），唔知係太陽太猛睇唔到上面個Mickey吖，定因為咁大個仔都未入過迪士尼唔知呢到係一個鬼地方呢，燒腩仔居然零反應唔多興奮，仲趕住想走咁嘅樣。
反而入到地鐵站，見到呢兩隻跳舞公仔就勁like，叫佢學佢哋跳舞又照做，仲好認真咁研究點解Minnie會郁。
電車男果然係電車男，見到米奇列車即刻雙眼發光，我哋去到欣澳要落車轉返普通地鐵即刻嘈嘈閉，行行吓拉住艾菲企咗喺到話「我要坐Mic Mic車」，都唔知解釋咗幾耐先氹到佢上地鐵（呢排成日都好堅持好有主見），仔呀仔...你放心啦...爸爸媽媽已經買咗銀卡，今年之內一定會同你喪搭呢架Mic Mic車㗎﹗
沒有留言:
張貼留言