試用：韓國Manito護頸護肩透氣嬰兒坐墊

自從兩年前幫燒腩仔換咗部新BB車之後，雖然新車明顯比舊車穩定，但車身始終有D單薄，所以艾菲一直都物色緊一個好D嘅BB車坐墊，想等燒腩仔坐得舒服D，期間艾菲淘又淘過，喺反斗城買又買過，去旅行時仲買咗個日本出嘅冰涼墊來試，結果啦...都唔係好啱心水，終於畀艾菲遇到呢款韓國出嘅Manito護頸護肩透氣嬰兒坐墊，真係可以用perfect來形容佢﹗



之前用過嘅坐墊，通常都只係一塊厚身少少嘅棉布，夏天仲要加返塊蓆先用得，但Manito呢個坐墊，係3D立體網狀設計，唔焗身超透氣，可以話係冬暖夏涼，等小朋友keep住乾爽，最重要係佢頭部cushion兩邊設計到U型咁，保護到頭仔同頸仔，用咗佢就唔使再突登帶個枕頭出街畀佢哋瞓咁麻煩。



坐墊兩邊膊頭位仲有加厚墊，行車時可以保護到BB膊頭，可以卸咁D震盪，而且好貼心係拆得出來，好似燒腩仔呢D咁大個仔嘅用時，佢哋膊頭已經比較闊，就可以拆出來，唔使頂住唔舒服。



洗乾淨個坐墊就畀燒腩仔試用啦，其實宜家燒腩仔大個仔，我哋都少咗用BB車，但出足成日街預佢會瞓晏覺的話，都會帶定BB車等我哋無咁辛苦，好似呢日去迪士尼就一定要帶埋BB車出發啦，佢仲坐到要我哋用糖氹佢先肯落車玩添呀﹗>.<



玩咗大半日都係時候瞓晏覺，燒腩仔好乖咁聽話瞓覺，唔知係唔係個坐墊嘅避震作用有幫助呢，等佢瞓得舒服D定D無咁震，佢呢覺一瞓就喺BB車到瞓咗個幾鐘，無再瞓到成頭大汗，瞓醒問佢個坐墊舒唔舒服仲即刻好認真咁答「舒服呀」﹗

呢款嬰兒坐墊適合任何嬰兒坐位，即BB車定Car seat都用得著，唔...如果早D遇著佢，想當日就可以帶埋佢去日本旅行，放喺個car seat到等燒腩仔坐同瞓得更舒服啦，我哋真係相逢恨晚呀﹗