K1求學大作戰 ~ 總結

終於過咗15-16年度K1統一註冊日，學校call waiting大執位亦應該執得八八九九，艾菲都係時候幫燒腩仔呢次K1求學大作戰寫返個總結。

經歴過上年hea報N班，見3間只得一間肯收燒腩仔讀pm之後，今年K1艾菲係嚴陣以待，再加埋燒腩仔本身係十月細仔，同埋interview前有一段時間係唔肯同陌生人講嘢，甚至入陌生地方都會扭一大餐，所以艾菲好保險咁同佢報咗13間，心諗撞時間或者狀態差，都總有一兩間肯收佢掛...

結果呢...我哋好好彩，報13間13間都無撞到時間，燒腩仔亦算狀態大勇，無再扭計話唔入學校，除咗個別一兩間去到有D玩嘢專登搞事，其他都係一見老師就上身咁問乜答乜，最終我哋1間自動棄權，其餘有4個offer（2am＋2pm），5間waiting同3間reject，成功率叫做有1/4，都好唔錯啦﹗

雖然有offer嘅都唔係艾菲最最最心儀嘅學校，但艾菲明白今年龍B真係競爭好激烈，普通邨校都成千人爭幾十個位（事後都有諗返轉頭覺得我哋有D冒險，因為我哋報嘅就算只係區內學校，都算係一D比較熱門受歡迎嘅），所以燒腩仔有4個offer，我哋有得揀而且全部都係有口碑嘅，艾菲同米高都要收貨。

然後就到四揀一嘅時候，四間學校各有優點缺點，艾菲同米高都傾咗好耐先做到決定，最後打返去學校reject時，艾菲個心都係七上八落怕自己揀錯...

學校A：
位於區內其中一個屋邨，由屋企坐小巴去學校十分鐘內必到，一層校舍有戶外playground，超級happy school，老師同staff都極有愛心，本身艾菲都幾心儀呢間學校，幾buy學校嘅理念，但可惜佢只畀PM offer我哋，同埋學校過往都收比較多新香港媽咪嘅小朋友就讀，之前去報名時撞正放學時間，就親眼見到一班著到勁靚嘅新香港媽咪有媽咪慢慢行同吹水，小朋友有小朋友喺前面亂跑亂叫都無人理，呢個係艾菲最怕遇到嘅情況（因為燒腩仔一定會學呢D小朋友fing開艾菲手失晒控咁走咗去），所以學校喺統一註冊日後打返來話有AM位畀燒腩仔，我哋都無幫佢轉校啦。

學校B：
區內「名幼」之一，由屋企坐小巴去學校大概要二十分鐘左右，學校環境算大，有幾層課室亦有特大禮堂，老師同staff都出名有愛心，但老師喺open day處理燒腩仔唔敢玩遊戲嘅手法艾菲就唔多應同，interview當日嘅安排都令艾菲扣咗唔少分，再加上佢只係畀咗PM offer我哋，仲要K3只係得下午班，即就算K1好彩轉到上午班，到K3都要轉返下午班，所以我哋好快已經out咗呢間學校。

學校C：
九龍城區學校，由屋企坐巴士去十五分鐘就到，學校環境算大，但校舍設施比較殘舊，傳統老牌幼稚園，區內都叫做有D口碑，網上comment話老師出名有愛心（但interview當日就唔多感受到囉），學生都鐘意返學，不過功課好似幾多，happy school得來學術應該唔使擔心，最大缺點係學校資訊極唔open，連基本升學資料都完全搵唔到，做家長嘅感覺真係有D謎， 但因為佢畀咗AM offer我哋，我哋原先都諗住讀呢間就算。

學校D：
就喺我哋一心諗住讀學校C嘅時候，十二月尾就終於收到學校D嘅信，畀咗個AM offer我哋，因為佢本身有N班直升應該唔多位剩，我哋事前係完全無諗過佢會收燒腩仔﹗呢間係最近我哋屋企嘅學校，位於區內一個大型屋苑，由屋企行去十分鐘內到，傳統老牌幼稚園（老牌到米高嘅其中一個兄弟都係呢間幼稚園畢業），區內口碑都幾好，獨立校舍有三大個戶外playground，同樣係happy school得來唔使擔心學術，米高一收到信已經覺得應該畀燒腩仔讀呢間，因為我哋對學校C嘅了解其實唔算多，如果有學校D揀就唔值得冒險揀學校C，而且艾菲接送返學放學唔使咁辛苦，但艾菲就覺得學校D商業味太重，而且interview當日老師都明顯有D hea，令艾菲擔心佢哋無足夠愛心應付極度麻煩嘅燒腩仔（始終自己個仔有幾麻煩同要D咩做媽媽嘅最清楚嘛）。

為咗揀學校C定學校D，艾菲同米高商量咗好耐，亦聽咗唔少人嘅睇法，仲搭上搭問咗D用家意見，總算破解咗艾菲對學校D嘅擔憂，最終我哋係一致裁定放棄學校C而揀學校D，因為無論地理位置，上課時間，學校設施配套，以至學術方面，學校D都確實比學校C優勝，所以啦...我哋宜家就只係希望揀學校D呢個決定係無做錯，燒腩仔喺未來3年能夠有一個愉快嘅幼稚園生活。