小幫手入全盒

年廿八洗邋遢，艾菲都有應節執吓屋（其實平時有執開，所以都好輕鬆就搞掂），咁執完屋就可以整埋D濕星嘢準備過年啦，而其中一樣過年一定唔少得嘅入全盒嘅工序，今年終於可以交托畀小幫手燒腩仔做啦﹗

燒腩仔學校呢排都有教咩係農暦新年，上星期亦開咗個以農暦新年為主題嘅生日會，仲有迷你年宵玩添，佢有日放學返來就同艾菲話老師教「過新年要吃糖果」（除咗食糖果同食年糕之外，其他關於新年嘅嘢又唔記得㗎喎），艾菲今朝拎個全盒出來洗，佢已經識得偷偷地走去打開個蓋，未教都識講「全盒」呢兩個字，唔...食糖嘅威力果然係特別大。



見佢都知乜嘢係全盒，我哋夜晚食飽飯就畀佢試吓自己入，但佢又好似唔多明點入咁，我哋唯有每格都放少少落去先，再同佢講要做配對，放返D食物去相應嘅位，咁佢二話不說就開始筆開心果落去，都筆得有板有眼㗎。



不過呢...筆咗一半左右，有人就詐詐諦諦想放落口偷食啦﹗即刻畀我哋叫住，佢好尷尬咁笑咗笑之後，都肯乖乖地繼續入。



筆完開心果就到筆瓜子，呢個佢都有扮偷食引我哋笑㗎，但到米高真係剝咗一粒畀佢食時，佢又即刻摞返出來話唔要囉﹗



最後就係入糖啦，明顯有人係慌死蝕底咁勁入，入到D糖多到跌返出來囉，kakaka...



燒腩仔：YEAH！我完成任務啦﹗

大家睇吓佢個樣幾不情不願，唔係艾菲話影完有得食，佢先唔會肯望鏡頭呀，影多幾張都已經唔耐煩，即刻伸手落去拎糖食啦﹗



請佢食完糖，梗係要佢做埋入全盒嘅最後一個工序，入個利是仔紥落去啦，但佢似乎鐘意拆利是多過入利是，我哋不停叫佢入落去，佢就不停拎返D錢出來，最後仲整爛埋個利是封要我哋換過個新添，暈﹗>.<



登...凳...燒腩仔入嘅全盒，搞咗一輪之後終於大功告成啦﹗祝大家來緊一年要乜有乜﹗嘻...



入完全盒見時間尚早，就吩咐佢哋兩父子幫手貼埋D揮春，貼完之後成間屋都係燒腩仔，燒腩仔見到當然係勁興奮啦，仲好開心咁跟艾菲逐個讀D揮春出來添呀﹗



至於艾菲呢，就襯有時間整咗底椰汁年糕同椰汁紅豆糕來應一應節，連埋分別由朋友整同送嘅蘿蔔糕，馬蹄糕同芋頭糕，屋企幾乎要乜糕有乜糕啦，我哋一家三口喺未來一星期，真係可以過個好肥嘅肥年啦...啦...啦...