初三行大運＠濕地公園

難得米高今年農暦新年可以連放七日，重點係初三終於唔使被徵召返工，艾菲都覺得特別輕鬆，至少朝早可以瞓多一陣，等佢負責搞掂燒腩仔起身刷牙洗面食早餐嘅嘢，就算只係叉多半個鐘電，心情都寧捨好D㗎﹗kakaka...



見年初三米高得閒又唔使拜年，我哋就決定善用港鐵半價優惠，勇闖大西北行個大運，先坐港鐵轉西鐵到天水圍站，再轉輕鐵去濕地公園，其實唔難去㗎，但車程就OK長囉，我哋食飽一點出發，去到都兩點半啦。



唔知係唔係好多人同我哋有一樣諗法呢，呢日嘅濕地公園係超旺場，排隊買飛都要等半個鐘，好彩正門出面有個水池可以畀燒腩仔消磨吓時間，佢不停話要學D哥哥姐姐衝過水柱，跑到完全唔肯停，艾菲幾乎想叫米高慳返$60唔好買飛，就咁喺到玩一個下午算。



搞到三點終於可以入場，帶燒腩仔探完貝貝我哋就行出去，第一個景點係睇荷花，原來宜家濕地公園嘅setting都進步咗，喺D影相位附近會有D長凳畀人坐低影吓相抖吓。



因為人多再加埋知道燒腩仔未識欣賞，所以無帶佢上鳥屋觀鳥，直接去行紅樹林浮橋，好想教佢咩係招潮蟹同彈塗魚，但佢都似乎無乜興趣咁，只係顧住向前喪跑。



行完浮橋抖咗陣之後就到艾菲最期待嘅原野漫遊徑，今次仲好好彩咁有隻雀企咗喺水上面添呀﹗至衰呢幾日D天氣麻麻地，否則影出來肯定成幅畫咁﹗



點解艾菲咁期待呢個位？之唔係為咗影靚相囉，呢到係全個濕地公園難得一個兩邊都無欄杆嘅位，就咁一條灣灣嘅行人木橋，影出來特別靚同有味道㗎，可惜呢日人真係太多，要影晒全條木橋係mission impossible嘅事，所以只可以揀最尾一截來影。



行完出面展區之後，見差唔多時間收館，我哋就決定放棄室內展區，去咗全港最好view嘅大家樂tea一tea，一個乜都有D嘅兒童餐一家三口一齊食，抵﹗



食飽已經夠鐘收館，出咗門口之後燒腩仔明顯仲未放夠電，所以帶佢去正門另一邊個迷宮草地放埋D電去，跑到佢一身都濕晒勁開心，而上到最頂原來可以望返入公園入面D濕地。



放夠電我哋就走啦，明明已經攰到捽晒眼，但車迷見到輕鐵又點會甘心去瞓，遠遠就指住輕鐵話「我要坐呢架車」，於是畀佢試吓幫我哋拍卡入閘，再一齊等車，上車坐咗陣都未捨得瞓，要喺艾菲半逼半氹下先肯合埋眼瞓。