自從上年去北海道時去過《Stand By Me》嘅road show，艾菲就暗地裡應承自己，到香港有機會上時，一定要自己一個入戲院睇，點解要自己一個唔約人睇？因為艾菲細個曾幾何時係個超級叮噹迷，D影評講到fans睇完會好感動，艾菲就廢事帶埋米高父子是但一個去破壞氣氛啦，而且3D好似唔太啱只得兩歲嘅燒腩仔，再加上艾菲確實鐘意一個人睇戲嘛（艾菲由學生年代已經係個成日一個人入戲院睇戲嘅怪物來）。
等到頸都長，先終於等到套戲今個農暦新年喺香港上，本來都計劃等燒腩仔放完假返學後搵日去睇（之前試過一次湊完返學即入場，睇完行一陣慢慢回味吓套戲再去湊仔放學，感覺真係好爽㗎，kakaka...），但後來喺fb見好多blog友仔都帶埋小朋友入場睇，反正燒腩仔都識咗叮噹一段時間，又試過喺屋企坐定定睇晒成套《Cars》同《怪獸公司》（新年前嘅淘寶好物，之後會開blog share），都可以畀佢入去戲院試吓吖。
既然要帶燒腩仔入場，就一定唔睇得3D要睇返2D版，呢個version屋企樓下間戲院就一定有得睇，仲要有十點幾先開場嘅早場，啱晒我哋呢D唔慣早起嘅小朋友同媽咪，而最最最最重要嘅係，燒腩仔可以手抱唔使買飛，而早場一張飛只賣$35﹗﹗﹗即我哋兩母子一齊入場睇戲都只需$35﹗﹗﹗艾菲印象中真係好耐無買過咁平嘅飛啦﹗
O...Mr Cool﹗﹗﹗ 艾菲早一日下午已經去買飛，不過新年真係勁多人睇戲，想買多張飛同米高一家三口入場都唔得，最終我哋只係買到左邊走廊嘅一個單丁位，米高唯有自己留喺屋企做吓自己嘢啦。
一早起身食埋早餐就落樓，早少少入場畀佢warm up吓，事前已經同佢講咗入面會好黑唔使驚，要畀艾菲抱住一齊坐，睇完叮噹就要走無得扭，結果啦...佢都真係好乖全程畀艾菲抱住坐，睇戲時都有好投入睇，無嘈生晒嫌三嫌四話要走，簡中會大大聲講「佢哋返學呀」，「有車呀」，「佢哋走啦」之類嘅說話（好彩全場都小朋友無咩所謂），劇情應該就唔多明，不過終於認得邊個係大雄，之後散場時明明好乖咁跟艾菲走㗎，但行咗幾步之後忽然扭計唔肯走，沿路都keep住扭咗成十分鐘，要艾菲氹佢話返屋企再睇先肯繼續行囉... >.<
沒有留言:
張貼留言