今年米高公司好忙唔係好行得開，就算請咗半日假都要三點幾先走到，上半part得艾菲同燒腩仔兩母子，見天氣麻麻地就無謂去戶外地方（好似除咗我哋結婚嗰日之外，都無一年嘅312係好天），改咗帶燒腩仔去歴史博物館玩（本來想照帶佢返學，但又怕佢放學會好攰夜晚勁扭就同佢逃學一天啦），雖然佢唔係好明D展品講咩，不過入面都幾多嘢睇。
就來行完第一層時，發現有間房入面有棵許願樹，咁啱米高呢個時候來到，艾菲就同燒腩仔入去許吓願hea吓等佢，間房入面仲有D客家衫同帽放咗喺到畀人扮村姑㗎，不過燒腩仔向來都唔like呢D玩意，連帶頂帽都呱呱嘈。
燒腩仔：你估當咗我可以換到幾多錢？
行完博物館見有D肚餓就去咗新開嘅社企餐廳食tea，估唔到呢到環境都幾好喎，懷舊feel嘅setting配合返博物館，仲有BB凳提供，帶住小朋友都可以坐得舒舒服服。
價錢都算合理，tea set平均$30左右一個連嘢飲，我哋就只係叫咗個脆奶豬餐，都好香好足料呀，但個包就唔係平日食到好脆好韌嗰隻法包嘅質地，而係少少脆但偏鬆軟嘅質地，艾菲反而又幾鐘意呢種口感喎。
食飽就叫燒腩仔瞓陣抖吓，點知勁八卦嘅佢只係顧住四圍望，終於過埋海去到灣仔太源街都未瞓，唯有放佢落來一齊睇玩具，超級車迷嘅佢喺到講得最多嘅應該係「我要睇呢架」，睇完第一間鋪去第二間時，仲即刻想喊大叫唔走，後尾知道第二間鋪都有車睇先無再嘈，而身為車迷父母嘅我哋喺呢到又點會無跌錢吖，不過都係艾菲之前鎖定嘅Cars車仔，AEON賣緊$59.9一架嘅車仔，喺呢到只賣$44咋，一於買定兩架旁身喺必要時先拎出來收服燒腩仔。
之後去咗合和旋轉餐廳食自助山，二月中一知道佢喺香港開時已經同米高話想食，由於佢個電話長期打唔通，米高要喺某日食lunch時間親身落去book先book到位，聽講宜家已經book到5-8月啦，真係full得好誇張﹗
呢到嘅食物選擇多兼質素好，冷盤有即開生蠔，蟹腳，開邊龍蝦，帶子刺身等等，熱食就有鐵板燒即燒鵝肝，和牛西冷，元貝，即炸天婦羅同自助山最出名嘅脆皮乳豬同點心，就連甜品都勁啱艾菲胃口，炒雪糕，pancake，窩夫，朱古力噴泉，puff同macaron，最正就係其中一款士多啤梨流心芝士蛋糕，絕對係必食推介，可惜艾菲呢排食中藥戒咗三個月口，一下子食唔到太多生冷嘢，只好主攻熱食同甜品，不過都好飽同滿足呀﹗
我哋今次有得坐窗邊位仲咁啱望到幻彩詠香港添呀（不過好似比以前轉得快咗，感覺有少少暈），餐廳好貼心一早安排咗OXO high chair同餐盤畀燒腩仔，而佢呢個餓底小朋友居然好堅咁跟我哋一齊食足三個鐘，我哋食咩佢都話要食埋一份，由中湯，炒飯，焗千層麵，白灼蝦，點心，流心奶皇包，到至愛雪糕同蛋糕，計落佢食咗成二十款食物都有，重點係佢未夠三歲唔使錢，所以帶佢去食buffet真係好抵﹗
至於禮物呢，對向來無互送禮物習慣嘅我哋來講，係無諗住有禮物收，點知早兩星期勁黑仔嘅艾菲，繼二月頭壞完iphone 6之後輪到部相機忽然壞咗LCD mon，問咗朋友話整返都要成千蚊，但部機已經用咗三年幾，賣出去二手價可能只係得千幾蚊，所以掙扎咗好耐決定唔整照用，始終部機用開有感情唔捨得換住，亦未有睇啱新機想買，不過壞咗mon真係好唔方便，搞到好似以前影菲林機咁，要返屋企過相落電腦先知D相得唔得，米高見艾菲為咗呢件事唔開心，於是完全唔熟相機嘅佢偷偷地買咗部Fujifilm Instax mini 8畀艾菲玩住先，其實生燒腩仔前艾菲係有玩開玩具相機，但自從燒腩仔出世之後艾菲已經將D玩具相機收起晒，只係得閒先去city super行吓望吓恨吓都唔敢再買，今次難得有人主動送畀艾菲玩，艾菲當然樂於接受啦﹗
沒有留言:
張貼留言