啱啱過咗嘅星期六係燒腩仔29個月大嘅日子，亦係迪士尼銀卡嘅特選周末，見佢病咗成個星期終於好返，我哋又就到時間就帶佢入去玩吓啦，今次決定hea玩唔睇parade同煙花，所以等燒腩仔瞓到自然醒，食埋個早晨全餐先慢慢入去，估唔到佢今次真係清醒過上次多好，一出地鐵站就見到歡迎牌上個Mickey Mouse（之前兩次路過都見唔到），仲來遠就見到噴水池兼肯行埋去畀艾菲影相。
唔知點解呢日唔太多人，甚至比上次平日來少，好容易就喺門口影到後面無人嘅相，之後叫迪士尼影相哥哥幫手影全家幅都好順利，哥哥仲有心情主動送貼紙畀燒腩仔添（好多都要問先肯畀）。
上次見到呢架巴士時已經不顧一切咁衝埋去，今次一入去又係咁，仲主動叫艾菲幫佢影相，好彩佢仲未知架巴士係可以坐人，唔係實摞我哋同佢坐。
Hea遊第一站係搵巴斯光年，專登叫米高陪佢玩，但佢全程都係唔知發生咩事咁，反而出到來就好落力玩呢枝死光槍，不過我哋新年時已經收到表姑媽送嘅迷你版死光槍匙扣，所以完全無諗住買玩完就走啦。
之後見差唔多時間，就同佢去排隊等睇Golden Mickey，點知佢全程扭食糖，見到前面個小朋友食通粉又話要食（餓咗一個星期嘅後遺症>.<），最後艾菲都忍唔住話咗佢幾句，好彩都叫做收服到佢未失控。
等咗半個鐘終於有得入場，有過之前去戲院嘅經驗，入到去熄燈時佢都仲OK㗎，但開show一陣之後就開始扭，好彩中間有個位噴泡泡出來，加埋我哋氹吓氹吓都叫做捱到完場，唔使中途撤退，真心覺得好值得睇，咩卡通人物都有又唱歌又跳舞，最尾仲出動埋煙花，不過燒腩仔出來之後話好大聲佢好驚喎，咁無計啦...等大D先再睇啦...
之後同佢返去明日世界嘅餐廳坐低食嘢，叉夠電就去排隊玩揸車，已經專登揀parade時間去排，都等咗差唔多一個鐘先有得玩，好彩有車睇佢都無乜點扭，搞吓艾菲部新玩具，問吓哥哥拎貼紙，D時間轉眼就過。
我哋又係分兩部車玩，艾菲喺前面負責影相，米高就專責陪佢玩，睇佢V晒手咁，就知佢真係好鐘意揸車啦，落車之後仲即刻同艾菲講排隊再玩過添呀﹗
見佢個人keep住好忟咁，捽眼捽鼻又扭食嘢，我哋都決定唔勉強佢繼續玩，搵咗張凳坐低畀佢tea一tea再瞓個晏覺抖吓，等佢瞓醒都差唔多五點，因為夜晚有飯局要出返九龍，所以我哋行埋shop六點左右就閃啦﹗
沒有留言:
張貼留言