經典卡通片＠淘寶

自從燒腩仔生日會之後，艾菲本身都唔諗住淘嘢住（因為近年尾），偏偏燒腩仔婆婆同公公都分別有嘢想淘，咁艾菲唯有捨命陪君子搵D嘢淘，而其中一樣一直想淘又無淘嘅嘢，就係卡通DVD啦﹗



作為一個無姐姐無屋企人幫嘅FTM，要一手一腳照顧燒腩仔仲要包辦埋全屋家務，真係一D都唔容易㗎，雖則燒腩仔都算肯自己玩同瞓得多嘅小朋友，但有時要佢乖乖坐定定唔好四圍搞，畀艾菲專心煮個飯都有D難度，間中艾菲會出動到電視呢樣嘢，之前一直都係畀巧虎，上網download嘅《Mickey Mouse Clubhouse》，同埋之前淘嘅《Your Baby Can Read》佢睇，佢都唔算沉迷，每次半個鐘左右，唔會喊晒口唔畀艾菲熄電視。

見佢都兩歲大， 睇電視嘅限制應該可以再放寬D，而且一個屋企點都要有返D卡通DVD來招呼親朋好友㗎嘛，於是就去咗肚B媽之前介紹間鋪頭揀吓，一揀就揀到停唔到手，除咗買咗套《Mickey Mouse Clubhouse》（廢事要成日download再轉format咁麻煩），仲忍唔住手買多套TVB版《叮噹》全集（有成235集﹗），另外再掃咗廣東話版嘅《Toy Story》，《Cars》，《馬達加斯加》同《怪獸公司》全集。

Total兩套卡通同11套戲， 只係139人仔﹗喺香港真係完全無可能做到﹗賣家除咗將D碟pack得好好，仲另外加送咗幾張靚靚貼紙，一隻獅子王DVD同Thomas電影版DVD畀艾菲添﹗而且畫質係超乎想象中咁好，so far睇咗咁耐都無一隻碟唔OK﹗如果唔係內地運DVD來香港過關要特別處理，以後一定長買長有﹗



另外都襯新年前買返D家庭用品，等艾菲可以執返整齊個廚房，件件都係幾蚊件，買咗十幾樣嘢都係七十蚊人仔左右咋﹗至衰無包郵，否則就會更加抵啦﹗



見好耐無買過新衫畀自己，於是去咗CatWorld掃咗幾件，然後掃完衫又好順手咁想掃返對鞋襯衫喎，於是艾菲呢個鞋怪又出動去Pangmama鞋坊買鞋啦，仲要一買就買咗兩對，不過兩對都好滿意好好著呀﹗反而D衫就有D失望唔share出來啦﹗



題外話一個，之前上網見amazon.uk做緊Birkenstock大減價，仲要係size細D價錢再平D，啱晒艾菲呢D細腳人，咁啱艾菲同燒腩仔姨媽呢兩個忠實fans今年都要買就一人買咗一對返來（Birkenstock真係堅好著，艾菲一對可以著足六七年，係上年行到爆邊蝕晒個底先捨得買第二對），呢到連埋運費都係平均$260一對咋﹗堅係平過香港專門店多多聲呀﹗



至於燒腩仔婆婆同公公到底要艾菲幫手買咩呢，之唔係Carter口水肩同埋搓麵粉墊囉，話說燒腩仔婆婆有日喺街邊檔買咗幾條Carter口水肩畀燒腩仔表妹，承惠$20一條（佢好似講價講得再平D），艾菲見到即刻忍唔住出聲話淘寶只賣幾蚊，結果佢就托艾菲幫手掃，一掃就係八條，5.8人仔一條only﹗（質地同赤柱賣嘅一樣，但招牌有少少唔同，有D甚至寫住第二個牌子添）至於個搓麵粉墊就係燒腩仔公公睇得多艾菲搓包時影嘅相，又話佢想要一塊大嘅來搓包用，見佢咁識貨無理由唔幫手啦﹗

買完一輪又要煩集運嘅問題，其實淘寶宜家有官方集運，好多人試過都話OK，但艾菲就覺得有D唔安全同多規範，而且要逐個賣家update運費感覺比較麻煩，最終都揀返其他集運，千挑萬選之後今次終於試咗幾多人介紹嘅神州集運，雖然網上comment好壞參半，但揀佢最主要原因係佢喺艾菲屋企附近有個自取點，感覺真係超方便（過條馬路就到），以後終於唔使再吓吓送住宅畀多幾十蚊附加費，不過今次貨件入面有DVD，一定要用比較貴嘅敏感專線，所以最終都係叫佢送到上門，但佢哋嘅發貨速度都算OK（好似三日就收貨），而且線上客服D對答都有紋有路，下次應該可以繼續用。