29個月

Hi﹗話咁快又一個月啦﹗呢個月我好慘慘豬呀，新年前發燒流鼻水病咗一星期，新年後就突然又痾又嘔，有晚仲要燒到39.5度，嚇到媽媽成晚唔敢瞓，好彩痾咗五日之後終於好返，亦因為成個星期無返學，媽媽話咁得閒不如剪返個清爽型仔頭喎，之前個菇菇頭成日畀人話我似女仔，宜家應該唔會再搞錯啦掛...



呢個月嘅飲食習慣都無咩點變，都係大人食咩我食咩，仲終於克服心理障礙肯食朱古力添啦（之前嫌佢黑色唔食），自從媽媽改咗配給政策，即係將我一餐嘅份量分三四次逐少畀我之後，我都無再食到誓願咁，大概半個鐘就會食完，而自從上星期肚痾要日日食白粥麵包之後，我宜家變咗隻餓鬼，一見嘢食就雙眼發光搶住食，食完會狂扭再食，試過有次襯媽媽入咗廚房煮飯，走去偷食餐枱D麵包添呀﹗



因為新年出多咗街同病咗，所以瞓覺D時間都有D亂，宜家夜晚十點幾上床瞓，有時會玩到十二點先捨得瞓， 瞓到第二朝九點半左右就醒，晏覺就每日一次，如果出街的話叉半個鐘都夠電玩埋夜晚，但喺屋企張床隨時可以瞓到兩三個鐘，次次都瞓到唔願起身，有時仲會大發脾氣，搞到爸爸媽媽好頭痛。



活動能力方面都係咁上下，跑跑跳跳擒公園D鋼架都無問題，最大進步係終於踩得郁架單車，但就仲未識得轉方向，距離片車仲係有段距離，小肌肉發展都有明顯進步，終於學識摺紙，油顏色都開始有意識知道要油喺指定嘅格入面（不過仲係油到出晒界）。



同人相處越來越叻，除咗會幫手照顧表妹，去到公園又識得醒目地避開D唔乖嘅大哥哥大姐姐，喺街到畀人撩識得笑住同人玩，有次有個叔叔隔空扮踢我，我就笑住話佢「你做咩踢我姐，你踢人唔啱㗎」，見到有個妹妹著住條裙經過，又大大聲話「嘩﹗你好靚呀﹗」，氹到人哋媽咪勁開心，如果爸爸食飯時拎電話出來，我就會幫媽媽話佢「你打機唔啱呀」，佢拍自己個肚腩我都會話佢「你做咩打自己姐，我嬲你㗎﹗」。



自理能力叫做keep住無退步，都係自己除褲著褲同著襪著鞋，至於potty training就有D突破，媽媽見我呢排有主動講佢知要wee wee，又肯喺商場洗手間wee wee，所以有日出街食飯時就話不如試吓唔好整濕條片，我真係好乖咁一叫就跟爸爸去洗手間wee，就算急都忍住無wee落片到，條學習褲由傍晚五點出門口，到夜晚十點返到屋企時都仲係乾㗎﹗（艾菲：可惜病完之後又打回原形）



把口除咗瞓著咗嘅時候，其餘時間係無停過，講嘢亦越來越老積，會話大人唔啱，仲識得挑人哋嘅錯處出來，好似有晚同爺爺嫲嫲出街食飯，佢哋叫侍應拎兩杯水來，我就問佢哋飲咩，嫲嫲第一時間話飲水，之後侍應又拎咗杯嘢畀嫲嫲，我又問佢咩來，佢就話係熱鴛鴦，之後我就問「你又話飲水？」 搞到嫲嫲即刻唔想再啋我，我你他分得好清楚，媽媽問點解會識答因為乜乜乜，出街成日指住D巴士講幾多號，講中嘅比率比上個月高咗DD，而今個月仲學識咗數數到20添﹗



最後又講到情感發展，宜家我越來越多自己嘅主意，成日都同爸爸媽媽講「我想...」，如果佢哋唔聽我話我就會一哭二鬧三摞地，好多時玩完都唔願走唔願返屋企繼而發難，無論爸爸媽媽點解釋我知我都聽唔入耳，雖然事後媽媽一定會同我講一大輪道理，我又一定會話對唔住知錯下次唔會，但實情係好快已經唔記得自己講過乜，照舊乜都扭一餐，激到媽媽彈吓彈吓。

終於無再咁怕陌生人同陌生地方，去到陌生地方會不停問「宜家去緊邊」，只要事前同我講定去邊見邊個就OK，新年跟爸爸媽媽四圍去拜年，都無扭計唔入屋，亦肯叫人同講恭喜說話，仲懶醒咁一入門口就同根本未知佢係邊個嘅表姑媽話「我一陣有嘢畀你」，食食吓飯又忽然同姑婆講句「我好耐無見你啦」， 氹到佢哋勁開心。