行過見餐廳無咩人，時間又差唔多，我哋就入咗去開飯啦，呢到絕大部分食物都有麵包超人樣，就連外賣壽司紫菜，水同茶都係麵包超人packing，由於天氣實在太熱，無咩胃口嘅艾菲就只係叫咗碗腐皮烏冬同燒腩仔share，份量雖然一D都唔多，不過食完之後個碗係可以洗乾淨帶走㗎﹗
食食吓忽然出面又開show，艾菲即刻拉燒腩仔出去睇，呢個表演比起之前射水槍精彩得多，一眾麵包超人角色出晒來載歌載舞，我哋中途插入都好好彩咁搵到個中間握手位，D角色會輪流埋來同小朋友握手，燒腩仔仲成功同到咖哩包超人握手呀﹗
等到頸都長先終於輪到麵包超人埋來，第一時間叫燒腩仔遞隻手出去等握手，可惜...
燒腩仔：包包人，你唔好走呀...
差唔多到佢時，麵包超人竟然顧住跳舞無同佢握，最後仲走埋添...
睇完show就返去餐廳搵返米高兼歎冷氣，頂唔住派咗米高去對面雪糕店外賣杯雪糕過來畀艾菲消吓暑，燒腩仔一見到即刻食到停唔到口，而個雪糕杯同之前碗烏冬一樣係食完可以帶埋個杯走。
食飽就梗係要幫燒腩仔換吓片啦，入到育嬰室，嘩﹗連入面都有大大個麵包超人喺到呀﹗
出返來就見到麵包超人出咗來，第一時間帶燒腩仔埋去搵包包人啦，今次終於成功握到手啦﹗
之後同佢去波波場玩麵包超人彈彈波，其實場內有好多唔同角色嘅彈彈波任玩㗎，但燒腩仔玩來玩去都只係肯玩包包人波。>.<
玩完波就去咗果醬爺爺之家到扮整麵包。
玩到燒腩仔差唔多無電，艾菲就準備入專賣店掃貨，點知喺門口見到瑞士捲蒙面超人同哈蜜瓜包妹妹，明明上咗BB車休息嘅佢，居然主動話要落車同佢哋影相，睇來佢中包包人毒都中得好深。
同麓郷一樣，shop入面係有個area畀小朋友玩，不過佢哋擺出來D試玩玩具仲吸引，燒腩仔吸完塵再揸車，玩完一樣又一樣。
未行完第一間鋪頭，燒腩仔已經瞓著咗，艾菲同米高終於可以舒舒服服咁四圍逛吓，艾菲仲專登去咗麵包工場見識﹗
麵包工場隔離仲有兩間細shop，專賣園內限定產品，而
最後入埋去呢間就來閂門嘅雪糕店望吓就走啦，乜牛奶妹幾時同麵包超人咁friend㗎？
喺到玩咗大半日，就只係買咗呢堆麵包超人嘢，唔...艾菲都唔係好瘋狂姐。
正當艾菲以為自己好克制嘅時候，竟然就喺隔離outlet Jazz Dream同時遇見LC同孖人嘅鋪頭，中咗鑄鐵鍋毒好一段時間嘅艾菲又點能夠唔入去朝聖呢，結果喺入面徘迴咗一圈又一圈，居然拎住個大紙箱出返來﹗﹗OMG﹗﹗
其實啦...D LC係唔係好平好抵呢...又唔係囉...Kiwi 22cm Marmite賣$1300，應該同香港開倉價差唔多，不過難得有人心甘命抵幫艾菲抬，又唔使等開倉時排長龍入去逼同搶，艾菲覺得唔買對唔住自己呀...買完煲艾菲怕被投訴不切實際，已經唔敢再買其他stoneware，但入到孖人店唔知點解就畀個Staub 25cm Serving Bowl吸引住，吸引到明知佢係B貨碗底有一點小白點都照買。
除咗煲之外，我哋血拼咗一個傍晚後，一家三口都各自有收穫，而數全場最平最抵買嘅嘢，就要數燒腩仔件Beams背心，兌返港紙只賣$10咋﹗﹗﹗連艾菲件$20 Lowry Farm上身衫都唔夠佢來﹗本來同佢買咗咁多件衫，已經唔打算再幫佢買衫，但見到呢個價錢真係點忍到手呢﹗
行到outlet都差唔多閂門，我哋就坐返巴士返去名古屋啦，可能大家都係玩到最後一刻先願走，所以返去程車係超級多人，好彩等兩架車之後就有位，上到車同燒腩仔食吓嘢唱吓歌，總算有經無險平安返到酒店，無嘈嘈閉嚇親隔離。
Day 1 HK>札幌
Day 2 札幌>帶廣 part 1
Day 2 札幌>帶廣 part 2
Day 3 阿寒湖>知床 part 1
Day 3 阿寒湖>知床 part 2
Day 4 知床>網走 part 1
Day 4 知床>網走 part 2
Day 5 網走>美瑛>富良野 part 1
Day 5 網走>美瑛>富良野 part 2
Day 6 富良野>蘆別>麓鄉>札幌 part 1
Day 6 富良野>蘆別>麓鄉>札幌 part 2
Day 6 富良野>蘆別>麓鄉>札幌 part 3
Day 7 札幌
Day 8 札幌
Day 9 札幌
Day 10 札幌>名古屋 part1
Day 10 札幌>名古屋 part2
Day 11 長島溫泉樂園 part1
沒有留言:
張貼留言