北海道名古屋之旅～Day 12 名古屋 part1

之前一日去咗長島玩，呢日就決定留返喺名古屋，一早起身食完早餐，我哋就出發去犬山城，但由於名古屋D火車線仲亂過東京，最終我哋遊咗好耐火車河先到，耐到艾菲同燒腩仔都坐到瞓著（艾菲平日坐車甚少瞓得著㗎>.<）。



艾菲向來鐘意睇D文化嘢，之前已經去過大阪城見識，今次來到名古屋都第一時間同米高講想去名古屋城，點知佢話犬山城係國寶級仲正，艾菲唔知係個伏來所以無反對，仲一直同艾菲講落車行十分鐘就到（網上睇旅遊資料係咁講），點知我哋落咗車喺36度高溫下行咗好耐，米高先話畀艾菲知目的地喺山頂﹗﹗﹗



行咗十幾分鐘終於見到登城嘅路，而隔離就有個神社，仲遇到一排嘅鳥居添，可惜艾菲已經熱溶咗，再無心機慢慢影靚相。



其實此行米高都好辛苦，烈日當空下仲要揹袋同推燒腩仔上山，艾菲只係後面拎住相機跟住行都已經覺得好惡頂。



行到尾段係D超斜嘅石級路，為免架BB車報銷唯有叫燒腩仔落地行，好彩佢都算好肯行，行到成身大汗終於都到啦﹗



上到去艾菲同米高已經頂唔住要搵櫈坐低休息，燒腩仔就好似食咗勁量咁繼續喪行，為免再花力氣去追佢，我哋即刻買咗杯雪糕畀佢坐定定食順便降吓溫。



叉夠電就繼續攻上城頂啦﹗D石級大級到呢...



返來睇返D資料先知犬山城係日本僅存嘅木造天守閣，亦係最古老嘅一座城，唔怪得入場時工作人員好緊張，一定要我哋除鞋同著鞋套先准入去，而入面D梯級係比出面D石級仲斜同窄，所以入到去米高要全程手抱燒腩仔以確保安全。


 
千辛萬苦終於爬到上城頂（用爬呢個形容係一D都無誇，去到尾D梯級係直落咁滯），遊客可以圍住個城走一圈睇吓犬山市嘅風景，不過上面又高又無咩圍欄，所以感覺都幾危險，有一吓燒腩仔拗後個身想扭落地，艾菲個心真係怯一怯，好彩米高捉得實佢。



落返來同個城影張到此一遊相，再幫襯埋個育嬰室換完片就走啦（人哋連D咁古舊嘅地方都有育嬰室同換片設施，香港政府就成日話D設施係以前整落改唔到，係唔係應該要好好檢討吓呢？）﹗

我哋落山嘅時間係接近中午，個太陽比之前曬得更加勁，所以一D都唔比上山時好受，落到山見到呢部艾菲至愛Glico雪糕機（推介芝士蛋糕味，超正﹗），真係感動到幾乎想喊咁滯﹗



食完雪糕好順理成章咁去行埋犬山城下町，點知...條街竟然係無人，亦無乜鋪頭有開門，熱到我哋要走入遊客中心坐陣涼冷氣﹗

 

行到後段，我哋終於都係頂唔住，入咗去呢個類似food court嘅昭和橫丁到涼冷氣同開餐，入面明顯係專做遊客生意，仲有D好日本風味嘅布置喺到畀人影相。



燒腩仔：出面又曬又熱，不如媽媽你借副太陽眼鏡畀我帶啦﹗

Day 1 HK>札幌 
Day 2 札幌>帶廣 part 1
Day 2 札幌>帶廣 part 2
Day 3 阿寒湖>知床 part 1 
Day 3 阿寒湖>知床 part 2 
Day 4 知床>網走 part 1
Day 4 知床>網走 part 2 
Day 5 網走>美瑛>富良野 part 1 
Day 5 網走>美瑛>富良野 part 2 
Day 6 富良野>蘆別>麓鄉>札幌 part 1 
Day 6 富良野>蘆別>麓鄉>札幌 part 2 
Day 6 富良野>蘆別>麓鄉>札幌 part 3
Day 7 札幌  
Day 8 札幌
Day 9 札幌
Day 10 札幌>名古屋 part1
Day 10 札幌>名古屋 part2
Day 11 長島溫泉樂園 part1
Day 11 長島溫泉樂園 part2