北海道名古屋之旅～Day 12 名古屋 part2

喺昭和橫丁食飽後，我哋就出發去第二站豐田產業館，諗住畀燒腩仔睇吓佢至愛嘅車，點知...



呢個燒腩仔居然好強勁地，喺接近40度高溫下，都可以喺BB車瞓到不醒人事﹗﹗﹗咁我哋唯有坐陣等佢起身先入場啦﹗



等咗半個鐘就叫醒燒腩仔入場，入面總共分咗兩個館，第一個館係介紹織布，由種棉花開始講到織布機，真係唔係來呢到參觀都唔知豐田係做織布起家，不過宜家好似已經無再織布，但佢哋D car seat嘅布就仲係自家製。



第二個館當然係講車，由整零件講到整架車出來，原來以前整車係要用個木模來揼D鐵㗎﹗

 

呢架老爺車好靚，到宜家仲行得走得，艾菲諗住叫車迷燒腩仔埋去影張相，但佢就只肯影老爺車...個模形... >.<



之後輪到講現代化嘅車嘅零件，有軚盤同break踩，玩到燒腩仔笑晒口。



就連車轆都要埋去研究吓，真係好標準嘅車迷呀﹗



睇完零件下面仲有成層介紹D車，呢到原身係一個車廠來，所以地方真係超級大﹗



標準車迷燒腩仔嘅指定動作，當然係每架車都撲埋去睇吓啦﹗



日本人真係好細心同捨得，為咗令小朋友對佢哋嘅講解有興趣，小學生以下嘅小朋友參觀完，可以免費砌一架模型車仔，本身個職員話我哋帶住燒腩仔都可以砌㗎，至衰我哋玩到差唔多夠鐘閂門，米高怕趕唔切去出面個playroom玩就拉咗艾菲走。



好彩另一個職員見到燒腩仔咁細，就叫咗我哋去整紀念幣同車仔匙扣，全部都係好簡單㩒個掣，部機就自動啤出來。



整完紀念幣就拿拿聲出去出面個playroom玩，比想像中好玩同得意，先有呢D轉完要喺指定時間整返停嘅遊戲玩，再來就係大人細路都玩得嘅揸車仔，不過燒腩仔太細我哋無比佢玩。



仲有真正嘅小朋友遊樂場，有隧道有波波池有兩大層繩網，但燒腩仔就無膽爬上去玩囉...

  

艾菲覺得最過癮就係呢個感受風力嘅遊戲，小朋友入到去後會有不同風力嘅風吹出來，等佢哋感受唔同風力嘅威力，至衰大人唔入得啦，唔係艾菲實入去玩埋一份。



玩到閂門就走啦，臨走又喺門口影返張到此一遊先﹗



之後慢慢行返去名古屋站行街，期間見有D餓就入咗便利店食個tea，小朋友歎蘋果汁，艾菲就飲至愛抺茶牛奶，但最開心唔係飲到好嘢，而係燒腩仔超生性，就來行到名古屋站時忽然同我哋講想poo poo，我哋叫佢忍住唔好poo喺片，結果佢真係好乖咁忍住，直至我哋十分鐘後搵到洗手間先poo，雖然佢呢次trip之前已經識同我哋講想poo，但我哋一直都係一講即去唔使佢忍，估唔到今次忍咁耐佢都得，認真叻仔﹗

 

襯住喺日本嘅最後一晚，艾菲好努力咁四圍shop，終於皇天不負有心人，畀艾菲喺Toyku Hands搵到新款嘅Rootote媽咪袋，艾菲喺燒腩仔出世前已經用緊呢個款嘅袋㗎啦，貪佢多格數又可以隨時縮小放大，仲有尿片袋同換片墊送，不過用咗幾年已經有D殘就諗住襯今次旅行買過個新，點知睇來睇去都唔啱款，本來已經諗住放棄唔買，點知最後一晚竟然畀艾菲遇到佢，買兩個手袋退埋稅都係$800左右咋，另外艾菲亦喺高島屋嘅超市搵到傳說中好強勁嘅白神酵母同Cuoca預拌粉，對於閒時愛整包嘅艾菲來講，真係點可以唔買吖﹗



而呢晚嘅宵夜就係又甜又多汁嘅黃肉桃啦﹗日本白桃出名好味多汁，不過艾菲始終鐘情黃肉桃，覺得香D靚D， 可惜喺北海道咁多日都搵唔到，終於要來到名古屋先遇見佢，Yummy﹗

Day 1 HK>札幌 
Day 2 札幌>帶廣 part 1
Day 2 札幌>帶廣 part 2
Day 3 阿寒湖>知床 part 1 
Day 3 阿寒湖>知床 part 2 
Day 4 知床>網走 part 1
Day 4 知床>網走 part 2 
Day 5 網走>美瑛>富良野 part 1 
Day 5 網走>美瑛>富良野 part 2 
Day 6 富良野>蘆別>麓鄉>札幌 part 1 
Day 6 富良野>蘆別>麓鄉>札幌 part 2 
Day 6 富良野>蘆別>麓鄉>札幌 part 3
Day 7 札幌  
Day 8 札幌
Day 9 札幌
Day 10 札幌>名古屋 part1
Day 10 札幌>名古屋 part2
Day 11 長島溫泉樂園 part1
Day 11 長島溫泉樂園 part2
Day 12 名古屋 part1