起身執齊嘢食完早餐，就又行返去Oasis 21嘅巴士站坐車出發去長島溫泉樂園，車程大概一個鐘唔係好長，燒腩仔睇吓車睇吓飛機就到，一落車已經見到麵包超人博物館嘅指示牌，包包人fans即刻笑晒口飛撲埋去。
就咁睇地圖介紹，長島溫泉樂園都幾大同幾多嘢玩，有遊樂場有水上樂園有outlet仲有溫泉浸，穿過outlet同魔鬼LC專門店打個招呼之後，就會見到呢條勁高勁長嘅過山車路軌，我哋專登喺到放慢腳步等燒腩仔見識吓咩叫過山車，不過佢都係一貫淡淡定定有錢剩咁樣，只係O咀望咗陣，可能心諗「乜搵包包人要坐過山車㗎」？
睇完過山車再行前少少就會見到細菌小子同紅精靈，身水身汗咁行咗十五分鐘終於都到目的地啦﹗麵包超人博物館係要收費嘅，一歲以上嘅小朋友已經要買飛，大人細路位位1500yen，不過小童飛就會有返個禮物仔送，我哋去呢日就係送麵包超人相機，㩒落去就會見到麵包超人彈出來，燒腩仔到宜家都好鐘意玩㗎。
一入去就會見到迷你版麵包超人摩天輪，博物館入面其實唔係好大，基本上都一眼望得晒，不過入面又真係好靚，每樣嘢都會有麵包超人或者佢D朋友仔嘅樣，就連locker同垃圾桶都靚過人。
燒腩仔一見到博物館中間D麵包超人擺設，開心到自動波走埋去逐個試逐個玩，玩到拉都唔願走呀﹗
不過呢日天氣實在太好太熱（成36度呀﹗﹗﹗），唔可以畀燒腩仔喺戶外地方逗留太耐，唯有氹佢入去室內展館睇吓嘢歎吓冷氣，入面除咗有滑梯仲有呢D會郁嘅麵包超人公仔，都好吸引燒腩仔眼球。
睇睇吓有職員同我哋講出面就來開show，咁我哋就跟大隊出去搵個靚位坐低等，不過十一點幾又烈日當空，真係好熱好曬，廿四孝爸爸米高即刻拎入場送把紙扇出來幫燒腩仔遮太陽。
基本上我哋係咩都唔知就坐咗喺到等睇show，主持出場講咗一輪之後就輪到呢四個壞人出場，佢哋二話不說就舉起手上枝水槍向住台下D觀眾射...
其實咁高溫玩射水確係可以幫忙降溫，不過我哋D防曬都唔知係唔係畀佢哋咁樣整甩晒，所以先會曬到咁黑
抖唔夠五分鐘，佢哋又走出來勁射啦﹗
燒腩仔即刻喊到豬頭炳咁，kakaka...
好彩完show帶佢上火車頭玩吓坐吓就即刻無事。
完show後大家都走晒入另一個館等睇麵包超人show，艾菲同米高唔知道就帶咗燒腩仔返室內展覧館，襯無人第一時間排隊同麵包超人熱氣球影相，之後諗住叫燒腩仔去玩傳說中嘅彩虹滑梯，點知佢知道要自己上同有姐姐監控之後即刻走佬去捐樹窿。
應該係名古屋麵包超人博物館獨有嘅彩虹滑梯，為確保小朋友玩得安全，家長又影到靚相，係會有職員全程幫忙照顧小朋友，家長只需喺滑梯下面等就得，起初燒腩仔知道要跟姐姐指示玩係唔肯玩，後尾艾菲同佢解釋一輪就終於肯玩，仲玩得勁happy，玩完一次又一次，幾乎試晒六條滑梯咁滯﹗
見夠鐘開show我哋都入咗場湊熱鬧，成個show只得主持同麵包超人，主要都係教小朋友做動作一齊唱麵包超人主題曲，對於唔識聽日文嘅燒腩仔來講係完全投入唔到，全程一副呆樣但無嘈住要走。
之後去咗場景區玩，畀燒腩仔扮吓丼，扮吓細菌小子，扮吓煮飯，再揀吓雪糕，都幾過癮㗎﹗
跟住有個變態媽媽，因為買唔到麵包超人氫氣球（帶唔到返香港就無謂買啦），唔甘心點都要買返個麵包超人爆谷桶先安樂，雖然mode
Day 1 HK>札幌
Day 2 札幌>帶廣 part 1
Day 2 札幌>帶廣 part 2
Day 3 阿寒湖>知床 part 1
Day 3 阿寒湖>知床 part 2
Day 4 知床>網走 part 1
Day 4 知床>網走 part 2
Day 5 網走>美瑛>富良野 part 1
Day 5 網走>美瑛>富良野 part 2
Day 6 富良野>蘆別>麓鄉>札幌 part 1
Day 6 富良野>蘆別>麓鄉>札幌 part 2
Day 6 富良野>蘆別>麓鄉>札幌 part 3
Day 7 札幌
Day 8 札幌
Day 9 札幌
Day 10 札幌>名古屋 part1
Day 10 札幌>名古屋 part2
沒有留言:
張貼留言