開卷有益

正所謂開卷有益，艾菲一直都好想培養燒腩仔成為個愛閱讀嘅小朋友，但日日忙呢樣忙嗰樣，D時間唔知點解好快就過，到宜家都做唔到每日一書，但由上年十月燒腩仔學校開始咗繪本閱讀計劃之後，我哋每個星期都會喺學校圖書館借一至兩本書返來睇，燒腩仔慢慢都習慣咗艾菲or米高同佢一齊睇書嘅模式，艾菲亦開始拿捏到佢嘅喜好，其中兩本《大頭妹》同《大家一起鋪鐵軌》更加係燒腩仔嘅至愛，睇完一次又一次，睇極都唔會厭。



踏入新一年之後，艾菲覺得單係睇學校圖書館嘅書已經唔夠我哋睇，終於的起心肝走去公共圖書館幫燒腩仔整咗圖書證，仲決定以後每個月至少帶燒腩仔去圖書館一次，等佢感受吓閱讀嘅氣氛，就咁睇一個月一次好似好少，但對於艾菲同米高來講其實係個挑戰，因為燒腩仔到宜家都未識得喺圖書館安靜，有時仲會失晒控咁四圍走同叫（越叫佢細聲佢偏要大聲>.<），我哋一定要兩個大人同佢一齊去，艾菲負責尋寶搵好書，米高就負責同佢睇書先掂。



間中艾菲都會襯燒腩仔返咗學自己去圖書館尋寶，而第一次去之前艾菲都做足功課，上網搵咗一輪好書推介，又去圖書館網頁search定索書號，結果去到先發現兒童圖書館係亂到七彩，根本無可能畀你跟索書號搵到書，要搵好書唯有逐行逐個櫃逐本望（最近發現搵仲未上架嘅還書車都係個好選擇），千辛萬苦先搵到一本汪老師推介嘅《阿文的小毯子》，同一本五味太郎嘅《看，脫光光﹗》 ，但就發現每個圖書館都有一個Oxford Reading Tree嘅corner，對於向來無特別催俗燒腩仔學英文嘅艾菲來講，都係一個唔錯嘅選擇。



只係短短兩個月，唔覺唔覺就借咗差唔多三十本書來睇，唔係本本書都成功得到燒腩仔嘅垂青㗎，有D佢睇到一半已經無心機會走or完全無反應，不過總括來講有車同有玩嘅元素喺入面嘅書就一定可以睇到尾，而媽媽就偏好五味太郎同長谷川義史（上邊幾幅相都無佢嘅作品，因為只係學校借過）嘅繪本，貪佢D故事無厘頭得來都有D意思，好啱燒腩仔呢D似明非明嘅年紀去睇。



至於英文書呢，燒腩仔明顯會睇得無咁投入（因為我哋會轉channel用英文同佢講）， 但艾菲都堅持每次要借幾本，等佢接觸多D唔好抗拒，當中以Learning Ladder系列嘅卡通書就最易入屋，Thomas，Toy Story，Cars，Nemo（同系列仲有公主故事㗎），D卡通全部平時見慣熟口熟面，字又唔係太多，而燒腩仔仲因為咁中咗《Cars》毒，呢幾日又痾又嘔病到五顏六色，都仲嘈住話「我要睇車王」添呀﹗