喺北海道嘅最後一個上午，我哋喺酒店食完早餐就拿拿聲check out坐JR去新千歲機場，呢架車係可以唔預先買飛，但我哋帶住燒腩仔又拖住兩大件行李，米高怕太多人上唔到車，都係寧願畀多少少錢買預定席，至少確保有位坐唔會太辛苦先啦﹗唔...真係要走啦...都唔知下次再來北海道會係何年何月何日lu...
我哋其實係下午機先走，咁早來機場係有目的嘅，之唔係搵艾菲細個時嘅偶像叮噹囉﹗上次來北海道已經好想來探佢，但上次我哋無走回頭路所以無時間，今次點都要米高預半日畀艾菲同燒腩仔來Doraemon Wakuwaku Sky Park玩。
去到機場搵locker放低行李就即刻畀錢入去玩啦，一入場即刻見到大雄間房，唔...真係好令人懷念嘅場景呀，只可惜間房係圍住咗唔可以行入去參觀（不過畀遊客入去參觀又確係好危險嘅...）。
展館入面其實唔係好大同特別多嘢玩，頭一部分係D影相嘅場景位，例如大雄佢哋最鐘意流連嘅公園仔，同成班人帶住竹蜻蜓飛咗上天咁，仲有超大隻嘅叮噹同你揮手，鐘意叮噹嘅fans就一定會好開心（即係艾菲）﹗
之後就係比較互動嘅3D影相區，可惜燒腩仔唔太識玩，全程只係不停走來走去，唯一係叫佢跟叮噹坐喺時光機到好少少，其他都全部配合唔到囉... >.<
全個館玩得最開心就係呢個位，逐個隨意門去試吓開唔開到，開極都唔覺厭，而佢開緊個門係會有沖緊涼嘅靜兒喺入面。
臨走會有隻真人扮嘅叮噹喺門口等你同佢影相，但原來每個group只可以影一次，艾菲諗住反正無人排隊，想幫燒腩仔同叮噹影多張合照都畀工作人員阻止。
出口對面係間賣叮噹精品嘅鋪頭，身為過氣叮噹迷嘅艾菲當然又去shop餐飽啦，好多產品都好靚好吸引，不過艾菲都算好克制好理智啦，諗起好多嘢都係好睇唔好用就無買，最後只係買咗個叮噹矽膠蛋糕模畀自己同叮噹餐盤畀燒腩仔，全部made in Japan可以放心用。
shop完就去隔離叮噹cafe開餐，專登揀返個tatami位諗住畀燒腩仔扮吓日本仔，點知佢嘈生晒同坐唔定嘅反應已經充分反映佢係一個港孩，眼見隔離枱D日本小朋友食飯時真係好乖好定兼自己食得好乾淨㗎，到底有咩訓練秘訣㗎呢？
D嘢食全部有叮噹人物嘅樣，我哋叫咗杯叮噹Latte，叮當餡餅，技安肉醬焗飯同叮當Pizza，以為會係好睇唔好食啦，點知都唔係太差喎，Good!
食飽見仲有時間，就畀燒腩仔去埋叮噹遊樂場（免費）玩多陣，呢個小朋友只係無限loop條豆沙包滑梯，叫咗好耐先叫到佢去試玩其他嘢。
由於新千歲機場有好多內陸機平日都超級旺，入面除咗叮噹之外仲有好多嘢睇同買㗎，包括比卡超專賣店，北海道新鮮農產品，上篇推介過嘅必食Letao蛋糕等，其中呢個Royce Chocolate World，就有晒Royce嘅發展史，又有透明玻璃見到師傅點樣整朱古力，啱晒朱古力迷。
但對於向來都唔好朱古力嘅艾菲一家來講，呢兩間Calbee鋪對艾菲呢個卡樂B迷來講就更吸引，有好多卡樂B精品都好Kawaii，可惜艾菲搵唔到朋友推介嘅薯片蓋，所以只係掃咗堆薯片薯條咋﹗
而兩間Calbee鋪嘅分別，就只在於樓上間鋪比較靜可以安心慢慢掃貨，樓下間鋪近出入境大堂比較多人同逼，不過就有熱辣辣嘅即製薯條買囉﹗
燒腩仔遊日本@2014：
Day 1 HK>札幌
Day 2 札幌>帶廣 part 1
Day 2 札幌>帶廣 part 2
Day 3 阿寒湖>知床 part 1
Day 3 阿寒湖>知床 part 2
Day 4 知床>網走 part 1
Day 4 知床>網走 part 2
Day 5 網走>美瑛>富良野 part 1
Day 5 網走>美瑛>富良野 part 2
Day 6 富良野>蘆別>麓鄉>札幌 part 1
Day 6 富良野>蘆別>麓鄉>札幌 part 2
Day 6 富良野>蘆別>麓鄉>札幌 part 3
Day 7 札幌
Day 8 札幌
Day 9 札幌
沒有留言:
張貼留言