花卉展覽2015

見有免費飛，又有智樂社區共建遊樂場玩，我哋啱啱個星期六下午就帶咗燒腩仔去花展，雖然明知呢D時間會多人同多龍友，但諗住有靚花睇，艾菲可以影吓相，小朋友又有得玩，理應都好happy...



點知呢個小朋友超唔識貨，一入場已經猛話好熱，一時話要飲水，一時話要食糖，講多兩講仲話唔睇花，叫佢埋位影相仲即話唔影扭到爆炸﹗﹗﹗



千辛萬苦，先氹到大少影相，睇呢兩張個樣好合作，實際都唔知影咗幾多張屎面or擰歪面先成功...


唯獨呢兩張係佢自己主動要求影，先肯畀個開心樣艾菲，左邊張就因為個風車真係會轉佢好like，右邊張就明顯連佢都覺得D鬱金香堅靚啦﹗



唔肯影相其實都唔係最惡頂，嫌熱R到後頸紅晒，摞食糖摞到唔識停口，唔肯繼續行先係最難搞，終於艾菲都要投降，買咗個甜筒畀佢食來換取一刻寧靜。



難得有嘢令燒腩仔平靜落來，艾菲當然爭取時間閃去扮龍友影吓花啦，呢片鬱金香海應該係每年花展嘅必影靚位啦﹗



艾菲都好幾年無去過花展，唔知呢幾年嘅花展係點，但真心覺得今年花展D花無想像中咁靚，有D作品仲騎騎呢呢咁實在影唔落手，D花亦已經有殘殘地嘅感覺，都唔知點捱到下星期（其實會唔會換花㗎？）。



之後同燒腩仔過去大草地玩智樂個社區共建遊樂場，有人即刻表演變臉笑得勁開心﹗>.<



睇唔過眼嘅艾菲專登同米高夾埋玩佢，將佢塞落D車軚到，戲子即刻喊晒口求我哋救佢出來，kakaka...



玩完車軚玩碌波，追住個波不停走來走去。



自己去研究唔同組件係點樣玩，期間都有畀其他小朋友搶咗佢手上嘅嘢，但我哋主張小朋友爭執小朋友自行解決，最終佢自己用自己方法拎返佢玩緊嘅嘢（其實只係死跟人哋尾再直接出手搶返返來，咁對方又無出手再搶返就當無事啦），大家相安無事繼續各有各玩。



最開心係不停拎住呢舊嘢四圍走，重複話畀我哋知好多次佢係蛋糕。:P



見到D哥哥姐姐砌路軌，佢又好落力咁搬埋一份想幫手，只可惜完全無人領佢情，次次放到埋去都畀哥哥姐姐推開（因為砌唔啱位啦，換轉我係哥哥姐姐都會推開佢舊嘢），難得佢無放棄繼續追住條路軌嘅尾，走埋去想再放舊嘢落去，睇住佢好努力咁試咗三次之後，米高終於忍唔住出手，埋去幫佢將舊嘢砌落啱嘅位到，佢先肯去玩其他嘢。



最後玩埋充氣彈彈圈就走啦，雖然玩到一身都係泥勁污糟，不過玩得開心盡慶就夠啦﹗小朋友本應如此嘛﹗



近近地同佢去皇室堡Pacific Coffee坐低清潔返，畀佢快叉一陣後我哋就坐叮叮落灣仔食飯啦，最近學校教緊坐車嘅燒腩仔，聽到有叮叮坐興奮到不得了，第一架車full到上唔到，我哋話等第二架都唔肯即扭，到上車後無位坐又嘈住要坐（最近坐親車無位坐都會嘈），但艾菲都堅持教佢已經大個，唔一定要坐可以企一陣，人哋都無必要讓佢，希望同佢講多D，以後情況會慢慢改善啦﹗



專登坐叮叮去灣仔食咩呢，之唔係燒腩仔恨咗好耐嘅元氣囉﹗上次同佢食完之後每次見到元氣logo都話要食，無奈屋企附近兩間元氣都極full好難等位，反而灣仔呢間通常都唔使等位，見過咗海就來呢到食氹吓佢開心啦﹗

而燒腩仔自從之前腸胃炎餓咗一星期之後，最近嘅食量變得超級驚人，明明三星期前仲係餐餐都只肯食一半，要艾菲好勞氣咁同佢講一輪數先肯食晒全碗飯，今次竟然一坐低即刻自隊兩件蛋壽司（飯都無粒剩），食完蝦手卷再食晒個南瓜薯餅同蟹柳壽司都未夠喉，最後要我哋叫多件厚燒玉子畀佢先肯收口﹗

香港花卉展覽2015
智樂社區共建遊樂場