由於睇天氣報告，知道呢日天氣相對較好，所以米高早就鎖定呢日去小樽，但一朝早起身食完早餐又未夠鐘出發，於是帶燒腩仔去大通公園逛吓，點都叫做影張相到此一遊，之後行吓行吓就去咗時計台，上次我哋入過去睇，都係得D鐘嘅歴史同零件睇，燒腩仔絕對唔會有興趣，所以都係門口影張相就算。
行到返去札幌車站見仲有時間就去咗睇叮噹《Stand By Me》嘅Road Show，有好多個叮噹放咗喺到任人影相，又有隨意門玩，最正係有竹蜻蜓頭箍帶住扮飛，相對香港架叮噹車，日本嘅宣傳真係揼本好多囉﹗
車站樓上間ESTA仲有專櫃賣叮噹嘅紀念品，好克制嘅艾菲就只係買咗張叮噹Post Card寄返香港，同一盒Rement，嘻...艾菲好好彩咁抽到最鐘意嘅時光機呀﹗
夠鐘就坐火車出發去小樽啦﹗第一站首先係去三角市場開餐﹗基本上間間嘅價錢同質素都差唔多，所以我哋見邊間坐得舒服就入去，刺身飯當然係呢到必食啦，另外我哋再點咗兩隻生蠔同一條燒喜知次來食，估唔到呢個燒腩仔超識貨，來咗九日餐餐都唔多願食正餐嘅佢，呢餐有喜知次餸飯居然好畀面咁食晒成碗﹗
食飽就慢慢行落去小樽運河，運河盡頭係個影相位來，我哋當然都有影張到此一遊相，但比起上次來真係多咗好多遊客（特別係強國遊客），我哋等咗好耐先等到一個好人嘅台灣哥哥，好好心機咁幫我哋影張影唔到其他人嘅全家幅。
來小樽除咗去三角市場食刺身飯，艾菲同米高最想就係回味Letao嘅double fromage，雖然宜家香港間中都可以買到來食，但佢個texture真係要現場即食先最perfect，急凍到香港已經係另一回事，而蛋糕怪燒腩仔見到我哋食蛋糕又點會放過我哋吖，最終要order三件一人一件先掂。
之後去玻璃館逛咗陣，米高就又帶咗我哋去西松屋，唔知係唔係呢邊已經算係市中心呢，所以呢間西松屋D嘢相對無之前幾間咁平，但都畀艾菲買到件特價Mickey衫畀燒腩仔，Good!
最後睇埋音樂盒館就走啦，原先見燒腩仔咁鐘意D音樂盒都諗住買返過畀佢留念，但可能第二次來知道來來去去都係呢D款，反正上次已經買咗個絕版音樂盒，就無謂再亂買啦﹗
來嘅時候見到其中一個月台設計得古色古香咁，專登叫米高回程時預返少少時間畀艾菲同燒腩仔影相，估唔到影出來效果又唔錯喎，而車迷見到火車係興奮到不得了，不停邊跳邊大叫「火車呀」，成個大鄉里出城咁，笑到艾菲同米高肚痛咁滯﹗
因為第二日就會離開北海道，所以我哋呢晚出返札幌，喺車站求其搵間餐廳食個烏冬，喺附近逛個圈睇吓電器，再去便利店買定燒腩仔第二朝早餐，就好乖咁返酒店執行李啦﹗
燒腩仔遊日本@2014：
Day 1 HK>札幌
Day 2 札幌>帶廣 part 1
Day 2 札幌>帶廣 part 2
Day 3 阿寒湖>知床 part 1
Day 3 阿寒湖>知床 part 2
Day 4 知床>網走 part 1
Day 4 知床>網走 part 2
Day 5 網走>美瑛>富良野 part 1
Day 5 網走>美瑛>富良野 part 2
Day 6 富良野>蘆別>麓鄉>札幌 part 1
Day 6 富良野>蘆別>麓鄉>札幌 part 2
Day 6 富良野>蘆別>麓鄉>札幌 part 3
Day 7 札幌
Day 8 札幌
沒有留言:
張貼留言