北海道名古屋之旅～Day 13 名古屋>HK

終於來到行程嘅最後一日，呢日基本上係超hea完全無行程，食完早餐就行返出去榮到行街，由於艾菲此行一直想買返個電話叉電器（即尿袋啦）畀自己用，本來喺札幌站行百貨公司時睇中咗個Panasonic尿袋，諗住睇多D款再揀吓就無買到，點知來到名古屋行咗幾日都搵唔返，所以呢朝主打就係去搵尿袋，最後終於畀艾菲喺loft搵到個maxell尿袋，見佢日本製又夠輕身就買啦﹗

食飽午餐之後，我哋就沿路行返酒店拎行李準備去坐機場巴士，順路去咗Oasis 21間Tomica專門店（路過幾次都太夜閂咗門），不過D車仔無特別平所以無狂掃，只係買咗D香港唔常見嘅款，最開心當然係搵到巧虎車仔啦，燒腩仔鐘意到不得了呀﹗



等咗半個鐘，終於都上到車（米高話最後一站怕無位上唔到，所以早D去排隊），不過我哋最後一站上車，巴士個行李架已經好爆，就連BB車都要手拎住上車，好彩燒腩仔夠細粒，我哋可以將部分行李放佢個位到一齊坐，如果唔係艾菲同米高一人抬一件再加BB車都唔知點坐。



到機場埋櫃枱寄行李前影返張相睇吓今次嘅戰積先﹗今次來日本玩咗13日，都係兩喼一箱一袋加一架BB車姐，無特登買多個喼放戰利品，唔算好癲吖，嘻嘻...



放低行李我哋就繼續去搵嘢買，出盡力咁將用剩嘅yen散埋去，首先就係陪米高搵未出發已經話要試嘅世界の山ちゃん，呢間係專賣名古屋名物雞全翼嘅鋪頭來，喺日本甚至香港都有分店，而名古屋機場呢間就係外賣店，我哋買咗盒返香港做宵夜，少少辣但好香好惹味，連隻雞翼尖都真係有肉食到，連平時唔食雞翼尖嘅艾菲都食到舐舐脷，推介X10。



另一名古屋機場必買推介就係專賣蝦餅嘅えびせんべいの里，呢間鋪係出發前艾菲無意中見到有台灣媽媽推介嘅，講到一試難忘超好食咁，於是貪得意去試食，試完之後真係不得了，平日食開D蝦餅都無咩蝦味又腍又唔夠香，呢間真係隻隻味都咁香咁脆同好味﹗即刻大手掃咗N咁多包來送禮同自己食﹗



拎住一袋二袋過關，安檢後本身諗住坐低抖抖唔好再買，點知見未夠鐘登機又走咗去免稅店行，好驚訝咁發現好多日本唔同地區限定嘅手信，都居然喺呢間免稅店買到，例如北海道嘅白之戀人，六花亭，同東京限定香蕉蛋糕咁，就連京都嘅辻利兵衛本店嘅抹茶粉都有﹗抹茶控嘅艾菲又點會忍到手唔買吖﹗



買完一輪終於都夠鐘上機，同來嘅時候一樣，我哋帶住燒腩仔可以優先上機，當然亦係坐返我哋一年前就hold咗嘅前面特闊位啦，而呢次已經係燒腩仔坐嘅第四程機，佢大概都知道玩法，所以唔再肯坐定定任我哋舞，一上機即四圍走搞搞震，明明全日都無瞓過晏覺嘅佢，起飛後都扭咗一段時間先肯瞓一陣，不過艾菲都唔弱，成功爭取時間睇晒全套《救火英雄》，呵呵呵...



Bye Bye日本﹗今次真係要走啦﹗我哋一定會再返來玩㗎﹗

Day 1 HK>札幌 
Day 2 札幌>帶廣 part 1
Day 2 札幌>帶廣 part 2
Day 3 阿寒湖>知床 part 1 
Day 3 阿寒湖>知床 part 2 
Day 4 知床>網走 part 1
Day 4 知床>網走 part 2 
Day 5 網走>美瑛>富良野 part 1 
Day 5 網走>美瑛>富良野 part 2 
Day 6 富良野>蘆別>麓鄉>札幌 part 1 
Day 6 富良野>蘆別>麓鄉>札幌 part 2 
Day 6 富良野>蘆別>麓鄉>札幌 part 3
Day 7 札幌  
Day 8 札幌
Day 9 札幌
Day 10 札幌>名古屋 part1
Day 10 札幌>名古屋 part2
Day 11 長島溫泉樂園 part1
Day 11 長島溫泉樂園 part2
Day 12 名古屋 part1
Day 12 名古屋 part2