日本專人代購

之前一篇講開淘scooter，米高竟然問艾菲做咩唔講佢去日本做專人代購呢件事，OKOK...其實之前篇旅行後記都輕輕提過，既然忠實讀者叫到（佢真係好忠實嘅讀者來，無論幾時見佢用電腦，總有個page係開住艾菲個blog，甚至連大家嘅留言都會好仔細咁睇埋，有時仲會追blog友們嘅blog添㗎，係唔係估佢唔到呢，kakaka...），點都要寫返篇blog表揚吓佢嘅﹗

話說米高前排忽然要去日本出trip四日，無份去嘅艾菲當然恨得牙癢癢啦，為咗彌補要一個人湊燒腩仔既辛勞（其實有邊日唔係艾菲一個人湊住燒腩仔㗎呢？），第一時間上網睇吓日本有咩好買，跟手畀咗個唔係好長嘅手信list畀米高照住執。

起初米高都唔係好願㗎，講明過到去要做嘢唔得閒幫艾菲掃貨，不過佢可能怕唔做會畀艾菲怨掛， 最後都用咗兩個黃昏同夜晚嘅時間，去咗兩間西松屋，一間阿卡將，同一間AEON童裝部，仲識得影相Whatspp返來畀艾菲即時揀款同落order，效果同艾菲現場揀係無分別㗎﹗所以話呢，呢個咁好嘅專人代購服務，唔高度表揚吓點得吖﹗



其實艾菲主要都係要佢幫手買衫畀燒腩仔姐，因為燒腩仔開始大，之前朋友畀D BB衫到今年已經無得再著，所以向來慳家嘅艾菲要襯平買定，而上面堆衫絕大部分都係來自西松屋（除咗右邊幅相左下件衫係阿卡將買），最平嘅二十幾蚊已經有交易，最貴嘅都係六十幾蚊，艾菲睇過香港D代購連郵費最平都要$80一件㗎﹗



而根據上年幫燒腩仔買短褲嘅經驗，喺香港買到嘅唔係貴到你覺得唔值，就係個款娘到你唔會著，所以呢個又係艾菲托米高特別留意嘅item，最終買咗四條短褲，由四十幾蚊至六十幾蚊不等。



掃咗一大堆夏天衫褲之後，就叫米高順便留意吓有無減緊價嘅冬天衫，結果佢喺西松屋同AEON童裝部買咗呢幾件長袖衫返來，大概三四十蚊就有一件，專登買大一個碼，到今年冬天時就應該啱著。



燒腩仔已經戒緊片，之前買落嘅戒片褲又就來唔啱著，艾菲前排要四圍物色D靚靚底褲仔畀佢，先知道香港賣嘅小朋友底褲原來係咁貴，計返平均要$30一條﹗好彩米高喺西松屋搵到一pack五條只賣999yen，計返都係十幾蚊條咋，即刻叫佢掃幾個碼返來慢慢著﹗

而眼利嘅米高，仲見到D冬天底衫褲做緊減價，無論係普通厚身底衫，定係hot wrap，都係一pack兩件賣198yen，計返$6就有一件啦﹗仲抵過Uniqlo hittech減價先$19一件多多聲呀﹗



由於實在太抵，問咗燒腩仔姨媽之後，順便都同燒腩仔表妹掃咗一堆冬天底衫同保暖褲，而兩個Richell水樽就係阿卡將買嘅，平過香港代購賣嘅1/3呀﹗



除咗衫之外，米高仲幫燒腩仔買到兩對又平又靚嘅鞋， 麵包超人款只賣八十幾蚊，另一對都係六十幾蚊咋，不過D碼同香港嘅有D唔同，所以買大咗要留返遲D先著到。

而日用品都係艾菲特別托米高留意嘅嘢，尤其係燒腩仔用開嘅360牙刷，香港買要$55一枝，日本買只需209yen，見其他卡通牙刷都抵，又買咗兩枝cars款同兩枝麵包超人款，本來想買埋cars保暖水壺，但諗吓諗吓怕燒腩仔嫌重唔用，廢事晒錢就無買。

另外亦叫米高去藥房買上次去旅行時唔記得買嘅小朋友飛滋貼，咁啱見到燒腩仔用開嘅馬油又買咗兩罐，至於D零食就係米高行超市時見到買嘅，個Tomica餅食完可以摺架紙車來玩，都幾特別㗎﹗



叫米高幫燒腩仔買咗咁多嘢，艾菲其實都有搭買嘅，不過絕大部分都係食得嘅嘢，包括日版卡樂B薯片，復活節版蘋果批味Kit Kat同芝士蛋糕味Kit Kat，仲有上次食過超好食嘅7仔芝士蛋糕，而艾菲就特別推介合味道個冬蔭公杯麵，米高話唔係到到有得賣都幾難搵，但真係堅好食令人回味再回味﹗



衫呢就只係買得一件，仲要係米高臨上機前喺機場Muji見到減價$60件先搭買，護膚品都只係叫佢幫手買少少就算（其實家陣好多日本護膚品都喺759有得賣，見減價時價錢唔係差太遠，就廢事要佢一個大男人去搵呢D女人嘢啦，重點係買錯的話都唔知點算），但個Ziploc特別版米奇密實盒就係出發前千叮萬囑佢一定要盡力去搵，結果佢行咗幾間超市後終於搵到，總算不負所托。

其實個手信list仲有D嘢米高係買唔到㗎，不過佢幫手買到咁多好嘢，仲可以一件不漏完好無缺咁將佢哋帶返香港，艾菲對呢個專人代購嘅服務已經好滿意，講真...佢係去出trip做嘢，過到去開咗幾日早都無乜點抖過，有時間唔係自私玩，而係去幫艾菲掃貨，淨係呢份心意已經夠抵讚啦﹗hehe...