拉鋸戰

之前一篇提到上個星期六朝，燒腩仔起身後同艾菲僵持咗五個鐘都唔肯出房，大家都好驚訝點解佢可以咁硬頸，但事實係呢D只係冰山一角嘅碎料，艾菲同佢呢場拉鋸戰早喺三個星期前已經展開， 蔓延到今個星期都仲未完。

話說燒腩仔自出娘胎後，艾菲同米高就清楚知道佢係一個好硬頸嘅小朋友，單睇佢出世三日，艾菲一上奶佢就寧願捱餓都唔肯埋身啜，無論姑娘定陪月點幫佢都唔肯就範，我哋就知佢遺傳晒艾菲超硬頸嘅脾性，到佢滿一歲乜都唔肯試乜都話驚，慢慢觀察後都了解到佢係一個安全系數好高嘅人，情緒上亦較其他小朋友敏感，相對算係早熟嘅一群，所以之前揀幼稚園，艾菲一直好擔心佢間學校嘅老師唔夠耐性應付佢。

正正係因為佢早熟，佢嘅trouble 2來得比其他小朋友早，基本上歲半已經經常摞地同無緣無故扭計喊唔停，直至兩歲講嘢越來越叻，再加上最近得到學校社工嘅幫忙，摞地同鬧情緒嘅情況先稍為有D好轉，但好唔到兩個月佢嘅terrible 3似乎就已經來搵佢。

艾菲上網研究咗一輪，到底佢係trouble 2升級版定terrible 3呢？綜合來講，trouble 2係因為開始有自我意識想話事，但言語表達能力上又未發展得好好，所以成日都唔知自己想點，say no係最大特徵，terrible 3就係開始想控制一切做話事人，嘗試去挑戰權威特別係主要照顧者，實際係缺乏安全感好需要人認同，會出現返一D明明之前已經戒咗嘅惡習，例如咬手指，打人之類。

因為燒腩仔最近好多時都會口不對心，明明想要都話唔要，畀親選擇佢都揀唔到，艾菲起初仲以為佢只係trouble 2嘅升級版，但後來發現佢鬧事嘅情況，明顯只係針對艾菲一個，如果同樣情況換轉第二個人例如米高，佢即刻態度有變會好合作，同時佢鬧事得來其實又好怕艾菲會唔喺佢身邊唔要佢，而且佢明顯倒退出現返初初返N班時返學放學唔合作嘅現象，所以艾菲同米高覺得佢似係terrible 3多D。

艾菲嘗試從一日嘅鬧事情況，簡單講解吓佢嘅terrible 3到底有幾terrible，每朝艾菲叫完佢起身都會帶佢去vee vee同刷牙洗面，雖然之前都會有扭計話唔去，但同佢講吓道理話吓佢氹吓都會聽，但最近幾乎日日都要扭一大餐先出到房，講道理同惡鬧都完全唔work，每晚臨瞓前應承完第二朝會乖，到起身時又係另一回事，星期六嘅僵持就係艾菲都講到口臭唔想再講，見放假唔使返學就由佢自己喺房到冷靜吓，等佢知衰自己出來，結果佢完全無諗住同艾菲妥協，直至五個鐘後米高放工返來話佢都懶理，要艾菲入去講明只希望佢出來食嘢，其他嘢容後再談先肯出房。

扭完唔刷牙洗面，跟住就會進入第二round，返學前故意鬧事唔合作，先係食飯食到尾就停晒手，又或者換校服時走來走去，著鞋又顧住玩，最終搞到遲出門口，然後艾菲急住同佢行返學校，之前都會配合一齊跑，宜家就專登停喺街到唔肯行，艾菲拉佢行佢就開始爆喊，投降返屋企亦唔畀，結果艾菲就要喺眾目睽睽下，同佢拉拉扯扯，或者好似搶人哋個仔咁，硬抱佢上身抬佢返學校。

搞完返學，之後就當然係接放學啦，畀學校老師校長話完之後，每日放學都會同艾菲say sorry，但一出學校門口又打回原形，一時話要行呢到，一時又話要行嗰到，最死係忽然話要追某個同學，而個同學一早已經走咗，跟住艾菲拒絕或者做唔到，佢就剩機發難又企喺街到唔郁，就算艾菲肯忍住脾氣氹佢都唔代表會work，但同樣說話由米高經電話到同佢講反而會聽。

如果好彩順利返到屋企無喺街扭，返到屋企就一定會玩唔除鞋唔換衫，眼瞓到震捽晒眼仲堅持大叫唔瞓覺，跟手企or坐咗喺到大喊大叫，最醒係艾菲一話請佢食嘢，佢就會收聲一陣，然後食完又嘈過，總之永無合作，甚至艾菲發火硬拉佢上床，佢都仲會大叫投訴話要呢張被或者嗰個cushion，只係上床之後通常嘈十分鐘就會無電瞓著咗。

寧靜一小時後，又要為咗叫佢起身而忍受佢D臭脾氣，例牌唔肯起身，唔肯去洗手間vee，唔肯去沖涼，跟手又大喊大叫，不過通常呢個時候米高已經放工返來，救星一到艾菲就入廚房煮飯，一於聽你唔到乜都唔理抖吓氣 ，而神奇地米高或者其他人一出現，佢鬧事嘅情況相對係無咁嚴重。

面對呢個明搞事嘅燒腩仔，艾菲鬧又鬧過，講道理又講過，氹又氹過，轉移視線都試過，嬲成晚唔理佢亦做過，米高老師校長社工都幫手同佢傾過，佢其實好清楚知道自己嘅行為係唔啱，亦都好鐘意返學，更加唔係討厭艾菲，但就硬係鐘意搵D嘢來挑戰艾菲嘅底線，故意搵D無厘頭嘅嘢來嘈，而且有每況越下嘅趨勢。

日日都同燒腩仔吵吵鬧鬧，無論做得幾好點配合佢都無好結果，明明上一秒仲好地地，下一秒已經嘈到拆天，隨時因為艾菲講嘅一個字或一個決定而發作，艾菲都好氣餒好無助，最慘係呢D嘢唔會周圍搵人呻啦，有時連米高都未必得閒聽，最終就只係得自己一個暱埋喊，喊完又夠鐘接放學上演下半場，呢場鬧劇好似無了期咁上演，講真都幾痛苦㗎﹗

不過好彩嘅係艾菲仲有燒腩仔婆婆呢個過來人喺後面撐住，而燒腩仔嘅情況亦已經有學校幫忙介入，校長都已經畀咗心理準備艾菲，呢場拉鋸戰會持續上演一段時間，而從一D細微嘅地方去睇，燒腩仔都唔係完全無進步，燒腩仔婆婆亦講咗個事實出來，既然暫時改變唔到佢，就唯有自己調整心態去包容佢，再慢慢搵其他方法去幫佢，始終佢係艾菲生嘅，唔通艾菲會放棄佢咩，拉得太緊只會大家都辛苦，無謂因一時之氣破壞親子關係，但願艾菲真係有呢份耐性，可以捱過呢一關啦﹗唉...