復活節假前一晚，米高先忽然收到四張馬會同心同步同樂日嘅飛，可以喺兒童節當日去沙田馬場玩，由於燒腩仔入場係唔使飛，我哋見多咗兩張飛出來，就即刻約埋燒腩仔姨媽，姨丈同表妹一齊去。
為咗爭取時間玩多D嘢，我哋未一點半就到馬場，但排隊入場條人龍已經長到去天橋，好彩姨媽有帶BB車畀表妹，喺龍尾排咗陣就有工作人員叫我哋去BB車專用通道，嗰邊條隊短好多好多，等五分鐘左右已經入到場。
我哋影完相就過咗去彭福公園睇馬術表演，不過行隧道過去時，好堅持要幫手推BB車嘅燒腩仔，就因為上落樓梯無得推而發脾氣，喺隧道入面同艾菲僵持咗好耐，終於米高熱得滯頂唔住一手抱佢走，再加上姨媽姨丈安撫，我哋兩母子先無不歡而散。
起初唔知發生咩事嘅燒腩仔係零反應，後來D馬喺佢面前走多幾轉就覺得過癮，又揮手又拍手又歡呼。
睇完馬術表演諗住帶佢去玩彈彈馬兒賽，但條人龍長到呢...要燒腩仔企定定排隊係無可能嘅事，啱啱隔離有個遊樂場，咁當然係艾菲陪燒腩仔去玩，留低慈父米高一個排隊啦﹗
因為擔心燒腩仔會埋到去先話唔玩，艾菲見米高差唔多排到，就專登拉燒腩仔去睇人哋點玩，話佢知要坐上隻馬到自己騎去終點，佢睇完鐘意到不得了，仲想即刻衝入去玩添，後來艾菲再帶佢圍住行一圈睇吓條人龍，佢先終於肯乖乖跟住米高排隊。
等咗半個鐘左右，終於都排到佢，呢個小朋友一出閘就開心到傻咗咁，全程坐喺隻馬到不停笑，但就hea爆完全無自己騎過，只係靠米高拖佢向前走。
除咗彈彈馬，其實大會仲安排咗D真馬畀小朋友騎㗎，不過要三歲以上先玩得，所以燒腩仔只可以企場邊望同恨啦﹗
玩完彈彈馬就走咗去公園盡頭排隊同雪特蘭小馬影相，條人龍又係超級長，排咗大半個鐘先到我哋，而燒腩仔就喺差唔多排到時開始扭話「我唔想影」，艾菲同姨丈即刻出口術，叫佢當幫表妹排隊，唔影一陣行開就OK，點知佢企咗陣之後又好似唔記得咗自己話唔想影咁，埋到去見艾菲摸隻馬又跟住摸，仲識擺晒pose畀艾菲影添﹗>.<
影完相就準備返過去馬場，見難得有草地又有相機，諗住叫燒腩仔同表妹落草地玩吓，點知表妹驚草地驚到全身震晒，爆喊一輪都係唔OK，最終只係得返燒腩仔一個坐草地做happy face。
沿路行返去都好開心㗎，不過行隧道返馬場時又出事，唔知做咩又突然唔肯行（唔通以為要走？），兩母子又喺入面拉鋸一輪先出到去，唉...
唔知係唔係同艾菲拉鋸完無心情啦，返到馬場見到至愛彈床居然話唔玩，唔玩可以慳返唔使我哋排隊，都好﹗
之後入返室內有冷氣地方玩爸爸另一至愛golf，米高成日幻想等燒腩仔大個，一家人or兩父子去打波，但佢似乎手腳仲未好協調到喎，kakaka...
另一邊仲有D宣傳環保嘅攤位遊戲，例如拋圈圈，撈膠樽，㩒掣熄燈咁，全部都唔使點排隊就玩得，good﹗
最後玩到五點半，姨媽姨丈就同無晒電嘅表妹走先，我哋就去咗沙圈睇Mr.同Robynn & Kendy表演順便抖抖，慢慢等伴郎先生過來車我哋去下場。
第一次參加馬會搞嘅嘉年華活動，估唔到佢哋嘅安排都幾OK喎，D遊戲同表演節目都好啱小朋友玩同睇，雖然排隊條龍永遠都好長，但佢哋會特別安排一個set到playroom咁嘅area，等小朋友可以玩住等，亦有臨時育嬰室畀BB換片餵奶，如果佢哋下次再有類似活動，艾菲一定會再帶燒腩仔來玩﹗
沒有留言:
張貼留言