北海道名古屋之旅～後記

估都估唔到，呢次嘅遊記居然會由上年八月熱辣辣夏天，寫到今年四月日本D櫻花都就來滿開先寫完，慢到呢...艾菲都唔太接受到自己咁無效率，就連米高個日本trip都已經去完返來，仲送咗一堆靚靚櫻花相畀艾菲慢慢恨...實在太可惡...

好彩...多得國泰早排推出嘅台灣機票$689震撼價優惠，再加上魔鬼米高竟然問都無問過艾菲，就好快手咁即時hold咗三張飛（佢話反正有一晚時間諗清楚先畀錢，所以見咁平就hold咗先算喎>.<），令之前先話有共識今年唔去旅行嘅我哋回心轉意（一張飛連稅都唔使一千，平到咁真係唔去對唔住自己呀﹗），所以啦...我哋來緊6月尾又有得飛啦，而今次嘅目的地會係台北，連宜蘭嘅民宿艾菲都已經book好咗啦，呵呵呵...

唔...叉開咗咁耐都係入返正題先，總結返呢13日嘅北海道名古屋之旅，帶住一個兩歲都未夠嘅人仔同行，話唔辛苦唔麻煩就假嘅，成日都失晒控咁喪走，間中鬧情緒摞地都試過，喺香港明明餐餐都好開胃嘅佢，過到去居然玩節食唔食正餐（零食又勁食喎），呢樣係艾菲事前無諗過，而且單係帶佢嘅日用品都霸咗超過一半喼嘅空間，但係要我哋唔帶佢去玩呢，艾菲同米高都唔會捨得亦做唔出，有佢一齊始終開心D精彩D滿足D，所以畀我哋再揀都一定會帶埋佢一齊去。



日本係個出名baby friendly嘅國家，育嬰設施好容易就會搵到，除咗換片餵奶嘅地方唔使憂搵唔到，就連帶住BB去洗手間都唔使擔心，因為佢哋D洗手間除咗乾淨（間中都會有一兩個係唔OK），仲好多都會有母嬰格，即係廁格入面會有張BB凳畀小朋友坐定定等媽媽，亦有大人加小朋友廁板，唔似香港要去某D新嘅大型商場先有一格呢D洗手間，咁當然我哋都有帶定摺得埋嘅廁所板同行，方便燒腩仔隨時poo poo啦。



就連去餐廳，雖然未必間間都可以提供到BB凳，但絕大多數嘅餐廳都會提供小朋友餐具，甚至有D兒童餐係會有玩具送，而日本食物都好啱小朋友食，一般嘅紫菜，雞蛋同烏冬，好多餐廳都有提供，就算想自己煮畀BB食，預早去超市買料亦係無難度，艾菲今次都有帶象印壼同一個暖水壼同行，諗住煮返幾餐BB餐畀燒腩仔食，可惜佢完全唔賞面浪費晒艾菲一番心意，最終艾菲決定放棄唔再煮，去到餐廳叫D清淡D嘅食物畀佢就算。

為免小朋友水土不服，我哋今次都有帶定一枝大水去畀燒腩仔溝來飲，不過溝咗頭兩日之後已經無再溝，基本上每日都係帶定一枝用自己嘅旅行水壼煲嘅水畀佢，其餘便利店同汽水機買到嘅果汁都有照畀佢飲，touch wood佢腸胃好OK無肚痾肚痛，亦由於燒腩仔由一歲起已經跟健康院指引飲鮮奶，所以我哋連奶粉都唔使帶，每晚去便利店買定盒奶畀佢第二朝座暖飲就OK，相對要帶奶粉奶樽同洗奶樽嘅物品真係輕便好多。



至於小朋友嘅必須品例如片同濕紙巾之類，米高喺未執行李前已經再三警告艾菲唔好帶咁多，因為我哋一去就係13日，燒腩仔當時又未戒片，以佢當時一日用五塊片來計，要帶就至少拎大半包片過去，加埋一堆日本都輕易買到嘅濕紙巾同其他濕星嘢，大大個喼就會無咗好多空間，所以米高計過數，知道行程嘅第二日已經會經過AEON同西松屋，我哋就只係帶咗頭兩日嘅片同濕紙巾就算，去到AEON買唔到用開嘅Merries，就轉買一樣質素嘅Moony，價錢差不多仲有靚靚Winnie the Pooh公仔添， 用剩廿塊左右先帶返香港，甚至零食都係邊買邊食減輕負擔，衫褲就買完洗乾淨即著。


講開買小朋友嘢就不得不推介西松屋同阿卡將畀大家，另外AEON嘅童裝部都係唔錯嘅選擇，一般來講西松屋同AEON嘅價錢會實惠D，阿卡將嘅就會係大路D嘅嬰兒用品，好似上面兩幅相嘅衫褲同日用品，就係米高啱啱去日本出trip，艾菲叫佢幫燒腩仔代購返來嘅，宜家D yen跌到咁低，全部衫褲兌返都係二十幾至六十幾港紙一件咋，真係買大少少碼for之後一兩年著都抵，而最抵買就係西松屋D底衫，唔理普通厚身款定hot wrap，一律減價減到198yen一set，計返$6就有一件啦﹗仲抵過Uniqlo hittech減價先$19一件多多聲呀﹗



而出名細心嘅日本人，對愛shopping媽媽嘅照顧亦好周到，一般來講多數賣母嬰用品嘅大鋪頭都會有個畀小朋友玩嘅area，等爸爸hea爆咁陪小朋友玩，媽媽就可以專心去血拼，就算撞正商場無嘢玩，去百貨公司嘅玩具部都一定會有，甚至有D大商場會有卡通購物車，等小朋友坐上去玩住陪媽媽shopping，咁當然媽媽都要識做啦，唔好血拼到悶親小朋友都唔知，我哋此行嘅shopping time就多數安排喺燒腩仔嘅午睡時間進行，而且燒腩仔係個極鐘意坐購物車嘅小朋友來，所以我哋兩母子從來唔會因為買嘢而鬧出不愉快事件。



我哋今次去北海道係自駕遊，基本上香港揸開右軚車去日本揸車係完全無難度，GPRS入電話就OK好方便，但間中都會有D景點係搵唔到，所以帶定地圖旁身會穩陣少少，日本法例係規定6歲以下小朋友一定要用car seat，所以我哋租車時一早已經hold埋，當然我哋就算喺香港都一向主張用car seat，始終意外嘅嘢真係話唔埋，而且小朋友自己有個位坐定定，大人就算坐隔離陪住都輕鬆自在D。

另外都想講一講上網嘅問題，其實日本好多地方都有免費wifi提供，好似道之駅，主要旅遊點，酒店民宿or cafe都會有，基本上如果唔係要24小時同香港緊密聯繫，只係上facebook打個卡放張相，或者whatsapp覆幾句的話，用呢D免費wifi都已經好足夠（艾菲就算上次去東京，都係就咁喺條街到搵免費wifi上網，做check in手續揀定機位），可以慳返幾百蚊租wifi蛋，之但係假如你係個手機控，無得上網會周身唔自在的話，有wifi蛋旁身確係好方便嘅，而米高啱啱出trip就試咗租日本嘅wifi蛋，直接寄去你住嘅酒店，用完喺機場入閘前掟返落郵桶寄返去就OK，感覺方便過香港租，要去指定地方拎再用完去指定地方還咁麻煩。



始終日本同香港兩地文化係有差異，我哋去得旅行就要入鄉隨俗，例如坐火車唔可以講電話呢D大家都應該知，帶小朋友去playroom玩好多時係需要除鞋，去theme park玩等睇show，企前排嘅大人係會好自覺咁踎低唔好阻住後面D小朋友，更加唔會有人開遮咁黑人憎，好多時我哋去到餐廳or商場，點解會知對方係中國人or香港人，全因佢哋係全場講嘢最大聲最嘈嘅一group，講真感覺都幾distrub㗎，大家有機會去就要注意吓啦﹗

仲有就係輻射問題，到底日本安唔安全，講真你驚就真係唔好去，去得唔安心玩都玩得唔盡慶，我哋就覺得去十幾日問題不大，唔通香港就完全無輻射？你去其他國家旅行就安全？呢個已經係全球性嘅問題，受輻射影響嘅食品被運到全世界，我哋可以避得幾多呢？而燒腩仔就正正係311地震後半年，艾菲去完北海道返來唔夠半年就有嘅，so far佢除咗扭計時好trouble之外，其餘一切都好健康同正常囉﹗

最後想講嘅就係小朋友情緒，帶佢哋去旅行去玩，佢哋開心唔係必然嘅事，大人好興奮小朋友未必識欣賞，就好似燒腩仔喺呢13日就有好多不安嘅表現，同明顯感受到語言嘅衝突（佢係全程唔肯同日本小朋友玩），所以大人要多D同佢哋傾偈關心吓佢哋，預先同佢哋講定行程等佢哋安心，盡量安排穩定嘅作息時間畀佢哋，唔好太貪心一日安排太多行程，盞得不償失大家都辛苦同失望，仲有就係盡量預早諗定食咩，唔好去到先搵先諗，有時等位嘅嘢唔係你可以預計得到。

Day 1 HK>札幌 
Day 2 札幌>帶廣 part 1
Day 2 札幌>帶廣 part 2
Day 3 阿寒湖>知床 part 1 
Day 3 阿寒湖>知床 part 2 
Day 4 知床>網走 part 1
Day 4 知床>網走 part 2 
Day 5 網走>美瑛>富良野 part 1 
Day 5 網走>美瑛>富良野 part 2 
Day 6 富良野>蘆別>麓鄉>札幌 part 1 
Day 6 富良野>蘆別>麓鄉>札幌 part 2 
Day 6 富良野>蘆別>麓鄉>札幌 part 3
Day 7 札幌  
Day 8 札幌
Day 9 札幌
Day 10 札幌>名古屋 part1
Day 10 札幌>名古屋 part2
Day 11 長島溫泉樂園 part1
Day 11 長島溫泉樂園 part2
Day 12 名古屋 part1
Day 12 名古屋 part2
Day 13 名古屋>HK