二人行＠迪士尼

上星期五係燒腩仔學校罕有嘅假期（佢間學校連大時大節都只係放紅假，呢日假應該係全年唯一一日），艾菲一早就plan咗帶燒腩仔入迪士尼玩，雖然艾菲成日一個人帶住佢四圍去，但去得遠的話多數會有米高過來接我哋走，今次要全程自己帶燒腩仔去同返，艾菲事前都有D怕佢會唔合作，所以出發前同佢約發三章，講明攰可以出聲搵地方坐低抖，不過艾菲就一定唔會抱（佢一早就知艾菲已經抱唔到佢），重點係艾菲話夠鐘走就要走唔可以扭（上次走時有D扭）。



為咗唔想坐地鐵左轉右轉又無位坐，我哋今次決定試坐機場巴士再轉R8入去，估唔到都OK快同方便喎，一個鐘唔使已經入到去（如果好彩車駁車的話45分鐘就到），平日坐地鐵要一個鐘多D先到，以後可以考慮坐巴士入去，不過燒腩仔去到迪士尼門口其實有投訴無得坐米奇地鐵，仲有一刻想拉艾菲去地鐵站坐米奇地鐵唔肯入樂園呢﹗>.<



為咗米奇地鐵同氹佢戴舅公送畀佢嘅米奇帽，我哋喺出面糾纏咗廿分鐘先入到去，門口位影相係指定動作，呢日天公造美天氣極好，仲有涼風吹埋來唔太熱，連把巴蕉扇都唔使點拎出來用，樂園入面唔算多人，入場完全唔使排隊等，check袋個叔叔仲心情勁好，一來就主動送貼紙畀燒腩仔，兼好好口咁話「玩得開心D」（平日人多真係無可能出現呢D場面啦）。

 

路過美國小鎮大街，見到呢個慢玩春日迪士尼嘅布置難得無人排隊（上次來時條龍長到你唔會浪費時間同呢兩個唔識郁嘅米奇米妮影囉），即刻拉燒腩仔埋去影相，不過就畀個明明遲過我哋來嘅叔叔話我哋無排隊，艾菲同燒腩仔影相時仲不停塞佢D小朋友埋來，已經解釋咗我哋排隊先都唔肯借開，真係有D嬲搞到無心機hea影幾張即走。



除咗兩個主角仲有其他迪士尼卡通人物㗎，四圍亦種咗好多唔同種類嘅花，真係幾靚幾吸引視線。



影完相第一時間就去排隊玩揸車，入場時D staff話要排45分鐘，最後我哋唔使30分鐘已經玩完出返來，燒腩仔都好乖無再扭玩第二次，到夜晚姨媽問佢揸咗幾多次車，仲識應「玩一次就夠㗎啦」。



玩完揸車燒腩仔話肚餓，艾菲見都十二點半就同佢開餐先，食飽即刻去玩一入明日世界已經話想玩嘅太空飛碟，等兩round就有得玩，基本上同小飛象差唔多，燒腩仔好like，Good!



跟住艾菲問佢想去排隊同米奇影相定坐船睇動物，佢自己揀咗後者我哋就向住探險世界出發，初初上船都OK㗎，叫佢擰轉睇動物都肯，之後就越坐越驚，到最尾噴火噴煙時直情喊咗出來，全船人即時爆笑，坐隔離個姨姨仲安慰佢話D嘢係假嘅，kakaka...



落船後諗住同佢睇吓就唔就到時間睇獅子王，可惜我哋來遲咗十分鐘無得入場，於是沿路行去灰熊山谷，過山車佢未玩得，影相區又唔夠高，諗住玩水槍佢會鐘意，但一畀對面枝水槍射到隻手，佢就即刻嚇到喊住要走，唯有排隊同艾菲至愛Chip & Dale影張相算啦。



影完相就行咗去迷離莊園，見前面有班幼稚園小朋友入咗迷離大宅，艾菲以為實無死又帶燒腩仔入去玩兼歎吓冷氣，點知...上車前仲好興奮㗎，玩咗唔夠一陣已經話驚，因為入面D音響勁大聲，又黑又唔知做咩咁，最終又係喊住出返來，好彩出來問姐姐拎返張貼紙就即刻無事。



最後去埋Toy Story Land，一見到玩具兵團跳降傘就懶叻咁話自己玩過，仲同艾菲講佢想玩添，上次上到去個人震晒嚇到艾菲死，今日又玩乜都話驚，艾菲當然唔會中計搵自己笨啦，堅持同佢排彈弓狗，估唔到架車係越轉越快同有D暈，燒腩仔玩到尾當然又話驚啦﹗>.<



由十一點九玩到三點九，見差唔多時間就走啦，臨走喺門口有staff截住做問卷，做完會有紀念品送返，再加上燒腩仔經過之前兩次嘅練習後，終於知道拎貼紙嘅玩法，艾菲一叫就會埋去問哥哥姐姐拎貼紙，喺佢嘅努力下今次收獲豐富，而艾菲最鐘意就係新出嘅Tsum Tsum系列貼紙，超級靚呀﹗



走都係坐R8出去轉機場巴士，專登四點就離開樂園，避開四點半之後放工嘅人潮，好好彩咁上到架有位坐嘅機場巴士，等燒腩仔可以瞓返個晏覺快叉一陣（如果坐地鐵佢一定唔肯瞓），其實佢今日都算好乖好合作，除咗兩次因為跌咗粒糖落地艾菲唔畀佢執返來食而發脾氣之外，其餘時間都無扭過計，真係自己行足全程，只係兩次話要坐低休息， 唔...如果以後帶佢出街都可以咁乖咁合作就好啦﹗