吹泡泡＠佐敦谷公園

星期六落足一日雨，搞到艾菲都唔敢plan定星期日嘅行程，點知一覺瞓醒太陽伯伯出返來喎，諗住快D出動去玩啦，點知都係hea到黃昏時份等燒腩仔瞓醒晏覺先行到，最後決定近近地去佐敦谷吹泡泡算。



泡泡一出動，個個小朋友都衝晒埋來一齊拍，加埋燒腩仔最鐘意追泡追到老遠（其他小朋友總係好醒目咁企定等大人一吹即拍，唔會好似佢咁傻瓜㗎喎），所以宜家想同佢影張單人泡泡相真係好有難度。



追呀...



捉住...



你哋埋來畀我拍啦...



爸爸...你可唔可以再吹多D泡泡出來呀...

講真，成功影到呢幾張追泡泡相，真係要特別鳴謝米高嘅全力協助，雖則佢成日將D泡吹晒去鏡頭外，但無佢幫手吹真係唔掂，為咗令佢下次輕鬆D，艾菲會盡快買枝泡泡槍返來㗎啦（其實想買好耐，不過唔係唔啱心水，就係無貨無得買>.<）﹗



吹完泡泡大人都未收拾好，呢個燒腩仔已經一枝箭咁標咗去遊樂場玩...



燒腩仔宜家真係大個仔咗好多，一埋位就自動波去玩唔使我哋跟到實一實，識避開搞事分子之餘仲識得同其他小朋友有傾有講，艾菲聽見佢同另一個應該大佢少少嘅男仔傾偈，討論搖得個電單車未就覺得好好笑，燒腩仔猛話綠燈開車準備搖，另一個就話未得佢要落一落車等陣再上來，難得佢又真係肯等埋個男仔返來，再好齊心咁話開車先搖喎，kakaka...




咁既然燒腩仔都玩得咁開心，艾菲當然又可以好放心咁企喺佢側邊，專心舉機同佢影返幾張靚相來自娛啦﹗