神奇爆谷＠Cavalia

之前都提過，米高係個超級馬迷，最近好出名嘅Cavalia來咗香港表演，佢又點會錯過吖，唔知喺邊變咗兩張上星期六晚嘅飛出來，由於3歲以下小童係唔使飛入場，我哋啱啱好可以一家三口一齊去睇。



艾菲同米高都期待咗呢日好耐，仲一早同燒腩仔講定，呢晚會帶佢去灣仔食元氣，再坐電車落中環睇馬仔表演，有齊三個佢至like嘅元素喺到，理應好合作好開心啦﹗

點知...燒腩仔呢排唔知係trouble 2升咗呢，定terrible 3提早出現，已經連續兩星期無間斷地同艾菲搞對抗，日日家嘈屋閉搞到艾菲勁down，老師校長社工同佢傾完都無改善（遲D會寫篇blog講吓），而呢一朝佢一起身又唔知做咩唔肯出房，結果艾菲同佢由朝早十點僵持到下晏三點幾米高放工返來，同佢談判咗一輪，佢先終於肯出房換衫刷牙洗面食嘢...

起初我哋都以為今晚嘅活動要取消，但見佢好似知衰聲稱會乖就繼續，只係罰佢無得食元氣，不過佢去到中環，一落電車又發作扭唔行，之後仲扭話唔去vee vee，激到米高好嬲，好彩艾菲醒起前面有佢好鐘意嘅摩天輪，就叫佢快D行前D睇清楚個摩天輪先無事。



同摩天輪影完相我哋就帶燒腩仔入場啦，沿路行來時都有同佢講D馬一陣會喺帳蓬入面表演，仲會有D哥哥姐姐跳來跳去，場入面會熄燈同音響可能好大聲，但我哋會陪住佢唔使驚，佢聽我哋講時都好興奮，問我哋D馬會喺邊到出來，入到場見到D馬仔公仔都好like，叫佢攬住公仔影張相亦無say no。



事前花咗咁多心機同佢解釋，以為一切會順順利利啦，可惜實際情況係佢一入表演場館，我哋仲未搵到位坐低，佢已經喊晒口話要走，艾菲當然堅持唔放棄，於是又花咗好多口水同佢講道理，但講到口水乾都無用，表演時佢其實有認真睇㗎，不過一間場佢就即刻大喊話要走，我哋千辛萬苦先終於捱到半場。



到中場休息，忍咗燒腩仔成晚嘅米高，劈頭第一句就同艾菲話「走啦，唔睇啦」，心知呢個唔係佢心中所想，於是艾菲就叫佢畀D時間艾菲同燒腩仔行陣傾吓，即管試吓仲有無彎轉啦，但燒腩仔喊到勁淒涼咁堅持要走，幾乎連艾菲都想放棄走人，而米高就喺呢個時候建議，不如出去買包爆谷試吓有無好D。

我哋帶埋燒腩仔一齊出去買爆谷，講明要一邊食一邊睇表演，唔可以再嘈住要走，結果呢...佢入返場館嘅一刻都有少少嘈，但為咗D爆谷之後都好合作，仲好似變咗第二個人咁，一邊食一邊好投入咁睇，仲大大聲講返畀艾菲知D馬做緊咩（唔係喊聲就係大大聲講劇情，睇show遇著佢真係唔好彩>.<），聽到人哋拍手又識得跟住拍手，艾菲同米高打咗個眼色，不禁後悔呢包神奇爆谷實在買得太遲﹗



講返個show，頭半場因為燒腩仔不停喺到嘈，艾菲為咗安撫佢要不停做旁述搵D嘢來同佢講，搞到自己都無乜心機睇，到後半場佢有神奇爆谷安撫，艾菲先有返D mood認真睇，雖然我哋只係坐山頂位，但都睇得好清楚，表演亦係相當精彩，人同馬配合得非常好，尤其係有一幕表演者要騎住兩隻馬跳過個好高嘅欄，連艾菲呢個唔識欣賞馬術表演嘅人都唔覺得悶，絕對係值得一看呀！