30個月

大家好﹗我今日30個月大，即係兩歲半啦﹗咁啱撞正復活節，請你哋食隻復活蛋吖﹗雖然今日無特別做D咩慶祝，只係簡簡單單食咗個牛奶蛋糕，但之前復活節假玩咗咁多日，就算呢日平平淡淡咁過都已經好滿足，聽日我又要開始返學啦，真係好唔捨得跟住爸爸媽媽四圍玩嘅日子呀﹗



呢個月嘅最大轉變就係變得大食咗好多，自從上個月痾咗一星期餓完後，我宜家餐餐都食到一個大人碗嘅飯，有汁撈嘅話仲可以添飯添，有蛋的話更加會不停添食，餐餐定必喺半個鐘內食完，唔使媽媽三催四請勞氣，除咗豆同黑色嘢之外咩都食，蛋糕零食更加係食到唔識停口，但飲水就要睇心情，間中都會扭計話唔飲。



食嘢好咗就輪到瞓覺差咗，晚晚都唔願瞓，到第二朝又唔願起身，試過十點幾入房瞓覺，喺床碌到十二點半仲未瞓，嬲到媽媽死， 唯有減少晏覺時間到一個鐘，但我次次叫極都唔肯起身，之後仲勁發脾氣扭足兩個鐘，嘈到媽媽個頭就快爆開咁滯。



活動能力好似靈活咗，行路行得快咗，上落樓梯順暢咗，入字腳問題亦再好咗DD，但一唔專心或者攰時，都係好容易跌低，最叻係去朋友屋企試玩scooter，唔使大人教一企上去就識玩（艾菲：其實佢點解會識㗎呢？），至於小肌肉都有進步，油顏色終於控制到唔出界（好有心機油時先得，其餘hea油都係出晒界），扭到上鏈玩具，亦終於成功用衫夾掛到衫，以後可以幫媽媽手做家務啦。



記性超級好，D嘢講/做一次就記得，認得行返學條路，有次媽媽發呆行過咗，我識得拉返佢轉頭，試過有次媽媽坐車話瞓陣（艾菲：當然係扮瞓啦），叫我出隧道要叫醒佢，我雖然都差D瞓著埋，都好堅持撐住唔瞓，一過隧道即刻叫醒佢，好少同小朋友爭嘢玩or鬧交，通常會避開D紛爭位自己搵其他嘢玩，但畀人搶咗我D嘢我都會即刻出手去搶返，大人叫我排隊輪流玩我會聽，勁鐘意小動物，完全唔驚貓貓狗狗，仲搶住去摸去抱添，媽媽話我都算合群同守禮嘅一類，不過就係唔肯主動講對唔住同謝謝唔該，來緊要著力訓練我呢樣自覺性喎。



最近學校教緊交通工具，令本身係車迷嘅我更加狂熱，日日放學都拉住媽媽企喺地鐵站到睇地鐵埋站，睇到如痴如醉唔肯走，仲會自己拎D圓形嘅物體扮軚盤揸車，然後叫住「紅燈停車」同「綠燈開車」就通屋走，而《Wheels on the Bus》更加成為我呢期熱播嘅新歌，成日行行吓街會大大聲咁唱「the wheels on the bus go round and round」，笑到爸爸媽媽肚痛。



自理能力有明顯進步，除咗除褲著褲同著襪著鞋外，我喺媽媽嘅幫忙下都可以自己除衫著衫啦（艾菲：只係幫佢第一吓反起件衫，同埋捲好件衫畀佢自己笠落頭），宜家每日返學都係自己著晒全套校服，再畀媽媽檢查就可以出門口，至於potty training都有好大嘅進步，我終於可以同大家宣布成功戒片啦（艾菲：應該叫做戒咗八成），宜家喺屋企同返學都唔使著片，係瞓覺同坐超過半個鐘車先要著片，但絕大多數嘅情況係乾片返屋企，急會主動出聲去廁所vee，就連瞓覺都試過幾次係起身時全乾片，當然間中係會有D估你唔到嘅意外出現啦（艾菲：遲D出blog再詳細講）﹗



把口係唔知點解可以有咁多嘢講，特別係睇車時可以十幾分鐘無停過口，做直播咁話畀大家知我見到咩車，媽媽話我講嘢嘅口吻越來越老積同學晒佢，有次佢沖涼前問我使唔使vee，我話唔使佢就提我佢沖涼期間我急都要忍無得去，我唔耐煩就應咗佢一句「哦，是但啦」，有次爸爸擒高咗抹天花，我就即刻對住佢大叫「你做咩企咁高？你快D落返來啦﹗危險呀﹗」，好多時我會不自覺咁學咗婆婆喝公公，對住公公大大聲話「喂，你唔可以咁㗎」，搞到媽媽要事後捉住我教育一番。



最後又講到情感發展，自從上個月見咗學校社工之後，摞地嘅情況係有所改善（但始終搣唔甩），但媽媽話我一扭起計上來個人都係好野蠻，呢期就特別鐘意有咩唔滿意即合埋眼大叫大喊，試過連續三日由一起身就喊到返學，由放學又喊到瞓晏覺，瞓醒晏覺又喊到食飯，疲勞轟炸到媽媽精神病發咁滯（艾菲：佢係對住爸爸媽媽先係咁㗎喎，返到學校或者出街都會好正常），仲成日玩口不對心，明明好眼瞓但死都話唔瞓喺到扭，明明好肚餓但媽媽煮完飯又忽然大喊話唔食，搞到爸爸媽媽都唔知我想點。

清楚知道媽媽已經抱我唔起，所以返學放學唔會扭媽媽抱，但出街就會同爸爸講「我無力」扭佢抱，唔再怕陌生人甚至會肯答人哋嘅問題，不過我都唔係個個都肯應㗎，有D我唔鐘意嘅我會擰歪面扮睇佢唔到聽唔到，佢再死心不息來搞我嘅話，我仲會大叫來嚇走佢添㗎（艾菲：呢D位媽媽就勁尷尬囉，事後又要輔導吓佢）﹗