復活節假最後一日，係燒腩仔兩歲半嘅日子，本來艾菲都諗住同佢慶祝吓，但一連幾日假已經玩到無晒電，又無咩idea點慶祝，加上米高要返工都去唔到邊，所以就留咗喺屋企hea過。
一覺瞓醒第一件事就係同燒腩仔剪返個靚頭，天氣一熱佢個人就好忟，繼而四圍R搞到一身傷痕，為咗減低佢自毀嘅機會，艾菲今次係狠狠地同佢剷到個頭勁短，問心艾菲都係鐘意佢頭髮長D個樣多D，但為咗佢好都無辦法要剪短D，唯有安慰自己佢新陳代謝快，D頭髮好快就會生返長。
雖則唔打算去邊玩，但都唔想困住燒腩仔成日喺屋企咁慘，於是帶咗佢去屋企附近公園玩，點知...一個意外...玩唔夠十分鐘就要打道回府換褲...
畀小朋友撞親跌咗喺地下，呢期成日有咩事都大大聲喊咗先，仲要唔收聲同唔肯自己爬返起身，直至企喺遠處嘅艾菲埋去安撫吓先好少少。
轉過頭咪又無事繼續玩唔停，見到至愛嘅甲蟲無人玩仲九秒九咁撲埋去添﹗
今次懶到連大餐都無準備畀燒腩仔，不過都有買定佢最鐘意嘅士多啤梨畀佢做下午茶，睇佢食到幾滋味﹗嘻...
等埋米高放工返來，食完飯就做佢期待咗成日嘅事：唱生日歌，吹蠟燭同食蛋糕啦﹗個3.9牛奶蛋糕係燒腩仔自己揀，但佢好好笑點都唔肯食黑色嘅餅底，邊食邊撩D餅碎出來畀艾菲，真係孝順到呢...
睇返相先記得佢上年歲半時先啱啱學吹蠟燭，宜家唔使一秒已經吹熄咗枝蠟燭啦，仲識自己唱生日歌畀自己聽，又識話畀米高知自己今日兩歲半生日，宜家問親佢幾大都會答兩歲半，唔...真係唔覺唔覺就大個仔咗好多啦﹗
沒有留言:
張貼留言