拉鋸戰後記

自從尋晚漏夜寫咗《拉鋸戰》，記低燒腩仔最近嘅情況之後，艾菲就一直諗有咩辦法可以來個突破，於是今朝入房叫燒腩仔起身前，艾菲專登花咗兩分鐘，喺燒腩仔嫲嫲送畀佢個獅子面具上加工，釘咗兩個窿再穿兩條橡根落去畀自己帶，學燒腩仔婆婆話事頭，既然佢咁唔鐘意媽媽，艾菲帶個面具咪變咗第二個人囉﹗

艾菲：起身啦﹗
燒腩仔：唔起呀﹗（合埋眼狂扭）
艾菲：夠鐘起身啦﹗
燒腩仔： 唔...唔起呀﹗（繼續堅持合埋眼大叫）

見佢仲未清醒，艾菲於是出咗房做少少嘢再返去。

艾菲：你仲唔起身，想瞓到幾時？
燒腩仔：嘻...獅子？（今次終於清醒，肯擰過來望吓艾菲）
艾菲：我係獅子王呀﹗我已經將你媽媽食咗落肚，你快D起身﹗
燒腩仔：.......（一臉孤疑，應該係唔知艾菲搞咩啦﹗）
艾菲：（拎住件底衫）喂，呢條係唔係底褲？
燒腩仔：唔係啦，呢件底衫來㗎﹗
艾菲：（拎住條毛巾）咁呢條呢？係唔係底褲？
燒腩仔：呢條毛巾來㗎﹗
艾菲：咁邊條係底褲呀？
燒腩仔：（指住個櫃桶）呢條，呢條，呢條，呢條呀﹗
艾菲：咁你到底要著邊條底褲呀？不如你自己拎啦﹗
燒腩仔：（自己喺櫃桶拎咗條底褲出來）我著呢條。
艾菲：咁你仲唔著？
燒腩仔：唔係呢到著㗎﹗
艾菲：咁要喺邊到著？
燒腩仔：要去廁所著㗎﹗
艾菲：咁你仲唔去廁所？

燒腩仔好神奇地，竟然聽完即刻自己行出房去廁所，完全無扭過亦無問過艾菲點解要帶住面具。

艾菲：廁所係唔係呢到？
燒腩仔：係呀。
艾菲：咁你仲唔著底褲？
燒腩仔：要除咗片先著得㗎﹗
艾菲：咁你仲唔除？
燒腩仔：我唔識除㗎﹗要你幫我除㗎﹗
艾菲：要點除㗎？我都唔識㗎喎﹗
燒腩仔：要摵咗個貼先。
艾菲：摵邊個貼呀？
燒腩仔：（指住條片個魔術貼）呢個呀﹗
艾菲：（求其摵咗一個）咁呀？得未呀？
燒腩仔：（指住另一邊魔術貼）仲有呢邊呀﹗
艾菲：（即刻摵埋）摵咗啦，係唔係得㗎啦﹗
燒腩仔：（跟手自己抽咗條片出來）係呀﹗
艾菲：咁宜家要點呀？你使唔使vee？
燒腩仔： 我唔想vee呀？
艾菲：你記唔記得我係獅子王？我會食埋你落肚㗎﹗你仲唔即刻去vee？
燒腩仔：（即刻走咗去尿兜vee）痾完啦﹗
艾菲：咪係囉﹗明明有vee又話唔vee，我見你咁唔鐘意媽媽，我已經幫你食咗媽媽落肚啦，如果你仲唔聽話，係唔係要我食埋你落肚？
燒腩仔：唔好呀...
艾菲：你到底鐘唔鐘意媽媽？
燒腩仔：鐘意呀﹗（都問咗兩次先肯答）
艾菲：但我見你尋日係咁發佢脾氣蝦佢喎﹗我以為你唔鐘意媽媽，已經幫你將佢食咗落肚啦﹗你以後都見佢唔到㗎啦﹗
燒腩仔：（即時爆喊）唔好呀﹗唔好呀﹗
艾菲：你想見媽媽都得，我可以喺個肚到拎返佢出來，咁你有無D咩要同佢講？
燒腩仔：對唔住...我以後會乖...
艾菲：好啦﹗咁你快D刷牙洗面，如果你真係乖我就放返媽媽出來啦﹗

如是者，艾菲一直以獅子王嘅身份扮傻，又扮唔識刷牙同洗面，最後到扮唔知佢杯奶放邊，終於激到燒腩仔發脾氣，坐咗喺地下唔肯再答獅子王D無厘頭問題，見佢開始發作艾菲就即刻扮怕咗佢行開，跟手入房除返個面具再以媽媽嘅身份行返出來。

艾菲：你坐喺到做咩？到底飲唔飲奶？
燒腩仔：（即刻行返去playmat到坐）飲呀...
艾菲：（拎住佢杯奶）你有咩要同我講？頭先獅子王放返我出來時話你有嘢要同我講喎﹗
燒腩仔：唔該媽媽﹗
艾菲：獅子王話唔係呢D㗎喎﹗
燒腩仔：（諗咗一陣）對唔住...
艾菲：得咁多？
燒腩仔：我以後會乖...
艾菲： 好啦，咁你快D飲咗杯奶先再講。
燒腩仔：唔該媽媽﹗

見佢都開始食早餐，艾菲就坐咗喺佢隔離食芝士包，然後為食仔燒腩仔又發作，奶都未飲完就望到實。

燒腩仔：你食咩？
艾菲：我食包囉﹗
燒腩仔：我想宜家食﹗
艾菲：咁你飲完奶未？
燒腩仔：我想宜家食呀﹗（想扭tone）
艾菲：你快D飲完奶咪畀你囉﹗一早預咗畀你㗎啦﹗（然後食完想閃）
燒腩仔：我想你坐隔離，一路食一路傾偈
艾菲：我做咩要坐你隔離？
燒腩仔：我想你開心囉﹗
艾菲：你想我開心咁你要乖先得㗎﹗
燒腩仔：我哋一齊食包啦﹗

雖然燒腩仔最終都無同艾菲承諾過D咩，但一句「我想你開心囉」都足以令艾菲心甜， 雖然佢發作時真係好攞命，但至少艾菲知道佢心底裡係想艾菲開心，單係有呢份心艾菲已經心滿意足啦﹗

然後兩母子好平靜咁傾傾講講，一朝早嘅時間轉眼就過，艾菲又夠鐘要準備佢嘅午餐，同趕鴨仔咁趕佢返學，雖然期間都有好多玩嘢位，例如食完飯扭玩多陣玩具唔肯換衫，同返學期間又停咗喺樓梯口唔肯行，不過喺艾菲不停腦筋急轉彎咁諗咗好多奇怪嘅對白來應付後，總算無吵吵鬧鬧同拉拉扯扯收場，仲可以準時返到學校添﹗

返到學校，所有老師同校工都大讚佢今日有準時返學好乖，全日畀人不停讚嘅燒腩仔心情當然係大靚啦﹗keep住到放學都好合作，再加上艾菲沿途不停同佢風花雪月講東講西，兩母子總算平安順利返到屋企，而佢更加係奇蹟地返到屋企都無扭，好合作咁沖涼換衫再上床瞓晏覺，雖然鬥智鬥力真係好攰，但能夠換來一日嘅風平浪靜，艾菲絕對覺得係值㗎﹗

經歴咗呢三星期嘅拉鋸戰，艾菲試吓抽返個人出來睇返轉頭，的確艾菲有時係做得唔夠好，太強硬太堅持都會刺激到燒腩仔嘅神經，有時真係要學吓隻眼開隻眼閉，扮吓蠢講吓笑，反而燒腩仔會buy，真係好似氹男朋友咁要以柔制剛。

按燒腩仔宜家嘅情況，好明顯係覺得自己已經夠大個，好想要話事權控制一切，D嘢成日想點就點唔會理咩環境，有時甚至擺明為嘈而嘈，既然明知佢嘅立場背後，艾菲就無必要認真看待佢嘅無理取鬧，盡量諗D無謂嘢轉移佢視線就算，免得傷大家和氣。

另一樣值得注意嘅係，除咗好硬頸之外佢哋到咗宜家呢個年紀亦開始越來越要面，終於識得咩叫做「醜」，變到唔話得同好多時衰咗會嘈定先，所以艾菲宜家講嘢用字同語氣都要好小心，廢事講錯嘢挑動到佢某條神經，話佢都會盡量拉佢埋一邊先話，等佢唔會覺得全世界都知佢畀人鬧咁醜啦﹗

呢場拉鋸戰唔知仲要持續幾耐，不過今日一仗證明心態真係決定一切，只要大家心底裡都有對方，萬事都會有解決嘅方法﹗