上星期日係燒腩仔表妹正日生日，不過呢日係燒腩仔表姨結婚嘅大好日子，所以燒腩仔姨媽就決定提早一星期慶祝，而慶祝地點就係香港迪士尼酒店翠樂庭，約埋燒腩仔姨婆一家齊齊食tea buffet切蛋糕，可惜呢日米高要返工，只係得艾菲一個帶燒腩仔出席。
呢日米高幫艾菲叫燒腩仔起身（艾菲叫就喪扭，米高叫就唔扭喎﹗），艾菲仲可以好順利咁同佢做埋功課先出發，一心諗住早D去酒店幫燒腩仔同燒腩仔表妹影多D靚相，點知星期日坐巴士去迪士尼嘅時間原來比平日耐，結果我哋用咗個半鐘先入到迪士尼酒店，仲撞到早來嘅燒腩仔姨婆同燒腩仔公公婆婆，結果啦...喺一眾長輩嘅騷擾下，靚相實在唔多影到。 >.<
一直諗住同兩個小朋友影大草地靚相，仲專登帶埋野餐墊去，不過大草地原來喺另一間酒店，諗住迷宮都照殺啦，但呢個燒腩仔居然話唔玩，點都唔肯行入去﹗明明上次去濕地公園時行迷宮行得好開心㗎喎﹗最後要姨丈公同佢騎膊馬咁先勉強行到一個圈﹗
迷宮燒腩仔唔OK，表妹又唔肯自己坐草地賞花，艾菲唯有出絕招吹泡泡啦﹗今次米高唔喺到要請燒腩仔姨丈代勞吹泡泡，吹到佢氣咳咁滯，好彩燒腩仔勁欣賞，跑來跑去笑到勁開心，亦引咗幾個小朋友埋來一齊追逐，而姨丈經此一役後，已經即刻去千色店入咗枝電動吹泡槍以備不時之需，kakaka...
至於主角燒腩仔表妹呢，第一次見識泡泡威力嘅佢，起初係全程呆樣O晒咀咁，喺燒腩仔姨媽多次示範後，終於領悟到泡泡嘅好玩之處，肯試吓伸手去拍D泡泡，同畀個一號笑容出來。
見兩個小朋友嘅狀態都不宜影相，我哋又差唔多夠鐘，就入返去餐廳門口等啦，門口有個mini米奇噴水池，艾菲氹咗好耐先氹到燒腩仔埋去影相。
一入去都未坐低就見到Minnie埋來，艾菲梗係拿拿聲推燒腩仔出去影，其實過程都唔合作有D扭擰㗎，不過事後睇返D相就發現，全部卡通人物嘅合照入面，得呢張係最順攤影得最靚，因為之後張張都只係顧住食... ;P
有相為證，無論係Pluto定Goofy埋來，都唔肯落地影相堅持要繼續食，要人哋埋位同佢影仲要拎實D食物唔放，仔...你有無咁肚餓呀？
就連至愛Mickey都無面畀﹗Mickey埋到來第一個就撩佢玩，佢都仲係顧住食薯條理都唔理吓人﹗艾菲最後睇唔過眼要夾硬來，逼佢放低食物抱佢出去同Mickey影相，佢先燶口燶面咁影咗張相交差﹗
軟雪糕萬歲﹗其實燒腩仔呢日都唔係食咗好多嘢之嘛，只係食吓包食咗D薯條水果咁，就連表妹個生日蛋糕都竟然話唔食，至於艾菲今餐要一個人照顧佢就更加無啖好食，來來回回走咗好多轉，但食落自己個肚嘅無幾多啖，再加上呢到D食物賣相同味道都好一般就更加無意慾去喪食啦（艾菲起初仲以為會有好多米奇造型嘅食物㗎，可惜實情並唔係咁所以連食物相都懶得影）。
不過來得呢到食buffet，都係志在可以同卡通人物影相姐，呢樣嘢就絕對無令人失望，短短兩個鐘入面，四個卡通人物輪住出場，基本上你拎完嘢食返來，坐低食幾啖又要出去影相，我哋仲要唱埋生日歌切埋蛋糕添，都真係幾忙無乜時間食嘢㗎﹗
食完我哋就上返酒店lobby逛啦，因為艾菲張銀卡有九折，大家就好順便咁去埋隔離間shop到買嘢，喺等大家掃貨嘅時候，艾菲又同燒腩仔玩吓，終於成功氹到佢帶副米奇超來影相，YEAH!
艾菲都湊熱鬧買咗個反斗車王泳鏡畀燒腩仔，喺鋪頭同佢試時猛話鐘意，但返到屋企都唔知氹咗佢幾耐先帶到上頭，至於個Disney書簽就係買完嘢抽奬送嘅，不過最揼心口係買完唔夠三日，就收到迪士尼嘅SMS話五月頭會做會員購物六折優惠﹗所以決定來緊呢個特選周末會入迪士尼買返D嘢溝淡吓，希望燒腩仔呢幾日會生性唔好再咁扭計，等艾菲可以有藉口帶佢入去玩來做奬勵啦﹗
沒有留言:
張貼留言