母親節出走之旅 Day 2

第二朝一起身，燒腩仔牙都唔刷廁所都唔去，第一時間就走去窗邊，以為佢睇風景咁識貨，原來係睇樓下個彈床有無開，可惜個彈床呢朝已經無再開出來（星期日先開？），所以佢無緣玩啦。



我哋換好晒衫準備出去附近cafe食早餐，點知呢個小朋友又扭扭擰擰咁唔多合作，唯有出動之前一晚喺惠康靜雞雞買嘅麵包超人手提電話，的的色色有聲又有公仔，仲潮過艾菲部iphone㗎﹗kakaka...



食飽見天氣唔太差，就喺酒店附近散吓步hea吓，可惜見唔到馬車嘅蹤影，但呢座傳說中嘅靚靚教堂好容易就搵到。



check out前去埋酒店kids room玩，有卡通片同圖書任睇，有得填顏色，又有迷你波波池同煮飯仔玩，而艾菲同米高最鐘意就係部射籃機，都唔知幾多年無玩過啦﹗正﹗



見個天又開始落雨，我哋就拿拿聲check out，趕去呢次行程入面最期待去嘅Discovery Land玩啦﹗呢到除咗個場夠大，最大賣點係有幾層樓高嘅彩虹滑梯（可惜艾菲著錯衫，為免危險最終無玩到），又有攀山同彈床之類嘅嘢玩，真係大人細路都啱玩，亦之所以大人入場嘅收費一D都唔平，同出面嘅playhouse另加大人嘅收費好唔同。

出發前艾菲上網check過價錢，平日星期一至五，小朋友加一個大人要$148，另加一個大人入場要$168，雖然佢哋做緊買一送一優惠，但不適用於另加大人，即我哋如果想一家三口入去玩全日的話就要$316（但一家四口咁入去玩就會好抵囉），不過佢其實仲有另一個happy hour嘅promotion，星期一至五11:30-13:30，大人細路入場都係$80玩兩個鐘，咁以燒腩仔嘅電力兩個鐘真係乜都夠啦，所以最終我哋畀咗$160入場。



燒腩仔未夠高玩彩虹滑梯，於是帶佢去玩低一個level嘅滑梯（都有成層樓咁高），同埋另一個超刺激嘅直落滑梯，仲有另一條超滑超長嘅隧道滑梯，連艾菲同米高都覺得好好玩。



不過要玩滑梯，先要過五關斬五將，既要擒高擒低，又要爬D會郁嘅隧道，對於燒腩仔呢個年紀來講，確係有D難度，所以全程要有家長指引同鼓勵，以防佢有意外或者行到中段話唔玩。



如果唔想咁刺激，其實仲有個area係畀D細少少嘅小朋友玩，有D BB玩具，cushion積木，搖搖馬，同無乜彈力嘅彈床，另一邊仲有大Lego同兩款靚靚滑梯任玩（艾菲勁鐘意個樹屋滑梯）。



想靜態些少亦可以問職員借putter借波打golf，有足足九個洞畀你練putting，原先我哋都無諗住茶毒燒腩仔，點知佢自己走埋去話要玩，咁米高當然好樂意教佢啦，而佢就練成咗單手putting嘅絕技，仲成日偷雞用手將個波放落個窿到就算完成，真係笑到我哋肚痛。



玩完golf我哋就帶咗佢去睇哥哥姐姐跳彈床，安全系數超高嘅燒腩仔當然唔敢入去跳啦，但就發現咗隔離個噴波機。



上次去playhouse玩時，佢驚呢部機驚到喊住要走，但今次大個仔完全唔同晒啦，知道部機點玩之後即刻好努力咁四圍執波倒落部機到，再搶住㩒製睇D波噴出來嘅效果，燒腩仔：「嘩~」



唔覺唔覺就喺到玩咗兩個鐘（唔知點解D職員夠晒鐘都無趕我哋走嘅意思喎），同佢玩埋呢個影像踢波嘅遊戲就走啦，大人細路都玩得好開心，下次再入愉景灣一定要再來呢到玩先得﹗



玩完出返來，場大雨終於都停咗，亦係我哋爭取時間搵食嘅時候，不過諗來諗去都諗唔到食咩，最後走咗入惠康買幾盒壽司出來坐喺廣場到食就算，而甜蛋控嘅燒腩仔食咗大半件蟹柳手卷後，居然仲可以一人獨霸四件玉子壽司（連飯食﹗），實在太得人驚啦﹗



食飽我哋去咗對面書局逛吓，咁啱見到有個窗台，即刻叫燒腩仔上去扮吓書生，但呢個偽書生只係顧住望窗出面嘅車，艾菲不停拎D書畀佢睇都通通被拒絕。>.<



之後行埋落海傍逛，原來宜家連愉景灣呢到都興心心瑣咁浪漫，不過呢D玩意已經唔啱艾菲同米高，燒腩仔就更加係唔識欣賞。



逛到兩點幾，我哋就返酒店拎返行李，再坐3點嘅shuttle出欣澳，去到欣澳見個天仲未落得出雨，拿拿聲拉燒腩仔去海邊D大石到影相，唔知點解艾菲成日覺得欣澳呢個地方好靚，如果遇著黃昏日落就更正，可惜呢個小朋友全程喊驚樹熊上身，氹到艾菲口水乾先氹到佢坐定定畀艾菲影返張相，求其有樣有笑無out focus就收貨啦﹗



開心嘅時光過得特別快，又係時候講bye bye，終於都要起程返屋企，而經過呢次大滿足嘅出走之旅後，艾菲就自然更期待六月嘅台北宜蘭之旅，來緊忙完D私務，要努力plan吓行程先得啦﹗

母親節出走之旅 Day 1