慢慢戒又得，立即戒亦得，得咗﹗

拖咗兩個幾月，終於得閒寫呢篇戒片血淚史，而喺呢兩個幾月入面，燒腩仔亦已經由起初只係屋企唔著片，到返學唔著片，到之後出個半鐘街唔著片，進展到最近出全日街同瞓晏覺都唔使著片，可以正式宣布戒日片全面成功啦﹗﹗﹗

喺燒腩仔婆婆嘅督促下，燒腩仔嘅potty training喺佢半歲左右已經展開，日日定時定候同佢坐落potty到試poo，起初當然係完全唔成功啦，十次有十次燒腩仔都只係坐喺到玩，甚至想走佬唔理艾菲，但久而久之又居然有成果喎，到佢15個月大已經開始有意識同我哋講poo poo，跟手仲同佢轉埋坐大人廁所，話都無咁快已經習慣喺大人廁所到poo poo，等艾菲唔使再日日同佢掉屎片咁慘。

至於wee就相對無咁容易，由燒腩仔18個月大喺大人廁所poo poo越來越穩定，艾菲就買咗張有兩級嘅凳仔返來，開始教佢企上去對住大人廁所wee，米高放工返來wee又會叫佢帶埋燒腩仔入去睇，之後見天氣熱就索性一得閒就除佢片，等佢感受吓賴濕嘅感覺，不過佢無論賴咗幾多次，艾菲同佢解釋咗幾多次都好，始終就係唔肯同我哋講，亦唔肯再企上凳仔試wee，艾菲唯有棄械投降。

直至21個月大，見佢嫌條片焗到pat pat痕，又開始講到自己wee緊，就諗住同佢再試一次啦，呢次佢都好合作肯企肯試，但就一直wee唔到出來，甚至因為wee唔出而發忟唔肯走，艾菲怕佢壓力大都唔敢再同佢試，佢開學前仲專登同學校老師講定佢對wee wee有D抗拒，希望佢哋唔好逼佢怕有反效果，點知到佢正式返學時，老師話只係叫佢好似其他同學咁企多一陣，佢自自然然就wee到出來，仔原來真係要畀人教㗎﹗

見佢成功喺學校wee到，艾菲都即管同佢喺屋企再試，不過一直零收獲，直至有同學仔媽媽提艾菲，唔好要佢對住大人廁所wee，畀佢試吓就咁喺浴屏對住個坑渠wee，同埋唔好望住佢wee，等佢感覺輕鬆D，果然一試就已經成功，之後Ice姨姨轉贈咗個二手尿兜畀艾菲，都令燒腩仔積極咗好多，可惜佢仲未控制得好，稍為飲多咗水就會好似BB咁十分鐘賴一次。

之後見天氣開始轉涼，燒腩仔又未係好ready咁，艾菲就無再逼佢廢事自己日日抹餐懵，點知唔逼唔提反而又自己主動同艾菲講要wee喎，仲要次次都成功忍到入廁所除埋條學習褲再對住尿兜先wee，所以等到佢29個月大，見佢連學校D學習褲都明顯用少咗，就決定正式同佢喺屋企戒，今次一試就已經OK，每隔半個鐘就問佢要唔要wee，如果一個鐘無wee就捉佢去wee，如是者都好少出意外。

後期見佢開始嫌艾菲煩，叫親佢去wee都扭一大餐話唔wee，艾菲就直情唔再問，等佢主動同艾菲講，除非成兩個鐘都無wee，或者見到佢急嘅signal先會捉佢去廁所，當然等佢講就意外率會高一D，但佢哋其實慢慢會適應到，燒腩仔多數都係扭計大吵大鬧到忘晒形先會出意外，之後就同學校老師夾定， 連返學都唔著片，頭幾星期亦好順利無意外，但老師話佢從來無主動開聲話要wee，寧願忍到排洗時間先wee。

艾菲一直有提佢要主動同老師講自己要wee wee，又同佢喺屋企練習咗好多次舉手同老師講「我想wee wee」，但兩個月過去佢都仲係唔肯開金口，艾菲同時留意到佢除咗唔肯同老師講，亦唔係好肯同艾菲以外嘅人講自己要wee（初時係連米高都唔願講），直至最近有幾日艾菲有事出咗去，要嫲嫲過來幫手照顧佢，佢居然一個朝早就賴咗兩次，艾菲返屋企後終於發火，拎住佢D污糟底褲來話佢明明識講唔講，結果搞到媽媽要幫佢執手尾咁麻煩，然後第二日即刻再無意外發生，到之後佢一連三日喺學校出意外，艾菲都係用類似方式話佢，逼佢衝破自己嘅心理關口，終於老師喺第二日就話畀艾菲知佢有主動講要wee wee，咁艾菲當然立即大讚佢叻同勇敢，等佢知道同明白急係要主動同大人講先啱。

見燒腩仔戒片嘅進度都日漸理想，前排terrible 3起身即扭嘅情況又暫緩咗，亦少咗扭計爆喊話唔wee wee，艾菲就決定要佢出街同瞓晏覺都唔著片（當然事前要同小朋友溝通定，佢都同意先可以咁做），通常坐車前會叫佢去wee咗先，耐不耐見有乾淨廁所都會提佢去wee，盡量避免畀佢忍到最後一刻先去搵廁所wee，當然佢會成日答我哋「唔wee」，但講吓道理氹吓都多數氹到佢去，如果佢企得好硬就會提佢賴咗要即刻返屋企，因為之前試過去公園玩咗唔夠十分鐘就賴濕咗，艾菲又咁啱無帶後備衫喺身，真係要佢即刻返屋企換衫，所以佢知艾菲係講得出做得到，自然會乖乖地跟我哋入廁所。

宜家同佢出街會帶多套後備衫褲以備不時之需（暫時未試過賴濕要換，反而係唔小心wee濕衫褲要換就多），但就無帶樽仔旁身，如果同米高或者燒腩仔公公一齊，會要佢跟男子組入男廁，如果得艾菲一個就會帶佢去女廁，要佢企上廁板，艾菲從後抱住，由佢自己拎住JJ 向前wee，so far佢都OK無話唔肯wee，當然有小朋友廁所佢又會wee得開心D啦﹗

至於瞓晏覺就會鋪定尿墊畀佢，好彩佢瞓晏覺係瞓得好定，艾菲可以好放心就算出意外都唔會整濕床褥，而且一起身就會即刻捉佢去廁所，就算佢唔肯去都會將佢先趕落床，不過夜片艾菲真係未有信心同佢戒，一來佢夜晚瞓覺瞓到打風咁，一定會將張尿墊整到移晒位，二來佢宜家瞓醒都仲未肯自己落床，就算半夜有事想搵我哋都只係坐喺床到大叫，艾菲實在無信心佢半夜醒咗急會肯自己行出廁所wee，所以呢個都係遲一步再算啦﹗

戒片好物推介：

難得的起心肝寫戒片，都順便推介吓艾菲覺得好正嘅戒片好物先...



要數戒片好物，艾菲最最最推介一定係呢隻三層戒片褲，第一pack係喺阿卡將買完搭朋友去旅行時幫手拎返來嘅麵包超人戒片褲，小朋友戒片期間難免失手賴到一地都係，但著咗佢之後就算小朋友賴咗，D尿都好少流到落地，最多滲到面褲都濕埋，對小朋友來講驚嚇程度無高，對於屋企無工人姐姐幫手嘅艾菲來講，更加係減輕咗好多事後抹地嘅功夫，所以之後去日本旅行時都專登喺西松屋襯平買多一pack來用。



第二樣推介就係呢個摺得埋嘅小朋友廁板啦，由於燒腩仔歲半左右已經識得喺大人廁所poo poo，但對當時嘅佢來講，無小朋友廁板的話係會好無安全感唔肯poo，為咗唔想佢走返回頭路，上年去旅行前艾菲專登喺mother care買咗呢個廁板，雖然摺埋咗其實唔係細，又次次用完都要抹，但總好過令小朋友因為驚坐大人廁板而poo唔出死忍吖，而且宜家只係得好少商場有小朋友廁所，所以女仔要坐喺到wee的話用佢都好方便。



第三個推介就係呢個小朋友尿兜，雖然呢個唔係一個must，艾菲起初都完全無諗過要買，但佢嘅出現的確令燒腩仔wee得積極咗，而且燒腩仔就算識自己拎住JJ wee，都難免會有唔小心射出界嘅時候，最終又係艾菲善後做清潔，但叫佢用呢個尿兜wee，有個風車葉畀佢對準目標，射出界嘅機會係微乎其微，而且就算真係射咗出來，都只係整污糟浴屏入面嘅地方，一開花灑沖返乾淨就OK。