母親節個weekend係銀卡特選周末，本來都唔諗住入去同人逼，但之前收到Disney個會員六折優惠message，艾菲又的確有D嘢想買唔想錯過難得嘅減價，度來度去就只係得呢個星期六有大半日嘅時間得閒，唯有當係奬勵咁帶燒腩仔入去走轉啦，點知為咗去Disney乖咗成星期嘅佢，呢朝起身時居然又病發，拉鋸咗一輪先拉到佢落床，其實都有D嬲想取消㗎啦，但為咗個會員六折優惠，艾菲結果好唔爭氣地決定如期出發。
既然出得門口就當然要開開心心咁玩啦，不過燒腩仔呢日嘅心情始終麻麻，全日最開心一刻就係邊排隊玩佢至愛嘅揸車邊食三文治嘅時候，好彩中午時份都未算多人，用咗45分鐘就玩完出來，艾菲仲被欽點陪佢揸車添。
出到來諗住又去玩巴斯光年坐吓歎吓冷氣，點知維修中無得玩，唯有入shop玩吓死光槍，起初都玩得好開心㗎，但唔知做咩行吓行吓又病發（無記錯應該係因為我哋唔畀佢掂D玻璃杯啦），終於要拉佢埋一邊講吓道理先掂。
出返來見到巴斯光年行咗出來，仲要條隊唔太長，艾菲即刻拉佢過去排隊影相，第一次同巴斯光年見面握手，燒腩仔唔知點解係呆咗完全唔識畀反應，要巴斯光年提返佢望鏡頭笑。
就喺我哋排緊隊同巴斯光年影相時，個天就開始落起大雨，三個人只得一把超細縮骨遮，唯有入餐廳搵個位企陣避雨，等咗大半個鐘都有D雨先終於肯停，為免再做落湯雞，唯有揀D室內嘢玩，一心諗住去小小世界坐吓船，但行到中途發現唔對路，估計大家都同艾菲一樣諗法，個個都向住呢個方向衝埋去，即時轉軚去咗玩咖啡杯，呢個燒腩仔排隊時發晒脾氣咁話唔玩想拉我哋走，最終坐到落去咪笑晒口轉到勁high咁。>.<
之後見仲有時間就拉佢去睇米奇幻想曲，入場前都估到佢實麻麻煩煩唔會like，但艾菲偏想試吓佢嘅反應，果然先係排隊等入場時已經嘈嘈閉，要佢帶個3D眼鏡更加係氹到口水都乾，入到場又嫌黑話驚，艾菲同米高已經不停氹佢都係唔work，最後艾菲當然又叫佢合埋眼唔好睇，而佢就突然挨咗喺艾菲手臂到，真係好乖咁唔再嘈喎，直至完場我哋先發現佢原來暈低瞓著咗﹗
睇完米奇幻想曲就拿拿聲趕去Adventure Land等睇獅子王，為免案件重演一次，喺等入場時艾菲都盡量解釋佢知入到去會點同有咩睇，好彩佢本身都幾鐘意睇動物，所以呢次係出奇地好乖好靜咁，自己坐定定睇晒成個show，仲有跟人一齊拍手㗎。
睇完獅子王都四點幾五點，個天再一次落大雨，我哋拿拿聲跑返去美國小鎮大街，諗住入shop掃埋貨就走，點知去到先發現D shop全部逼爆，想向前向左或者向右行一步都難，個個走晒入來掃貨兼避雨，貨架上嘅貨居然可以畀人掃到空晒，就連艾菲最想買嘅Tsum Tsum碗都畀人買晒，排隊畀錢條人龍更加係長到見唔到尾，再加上燒腩仔喺排隊期間又忽然病發摞地，咁嘅情況下艾菲都無mood買嘢啦，所以只係求其買咗D之前target咗買嘅餐具，同埋買定送畀燒腩仔做生日禮物嘅Mc Queen就投降走人啦﹗
沒有留言:
張貼留言