連續兩個星期嘅weekend都係天雨中渡過，對大人同小朋友來講實在係一件好不爽嘅事，好不容易先等到佛誕節當日有大半日嘅晴天，雖然又熱又焗但我哋都爭取時間帶燒腩仔去公園放吓電，果然即晚已經再落大雨，仲要一覺瞓醒忽然由黃雨變紅雨再變黑雨。
燒腩仔返學以來第一次黑雨，身為家長當然最關心學校有無停課啦，果然黑雨後唔使幾分鐘已經睇即時新聞見到教育局宣布下午校停課，以前做學生時一聽到停課會勁開心，但宜家做咗FTM好自然就會有少少失望，因為停課即代表一日入面唯一三個鐘嘅抖氣時間都無埋，不過最爆趣都係燒腩仔，一聽到無得返學即呱呱嘈，要解釋一輪話佢知其他同學仔都一齊無得返學，先肯安心留喺屋企跟住艾菲，仔...如果你讀到小學中學都仲係咁鐘意返學，媽媽就真係安樂晒啦﹗
停課無得返學，留喺屋企又無咩好做，見下午已經停雨，加上燒腩仔今日都幾乖，就決定等佢瞓醒晏覺，兩母子落樓下平台拍拖踩單車，呢D活動對於讀下午班嘅燒腩仔來講真係好難得，平日朝早艾菲都忙住做家務同準備早餐午餐畀佢，完全無時間同佢落樓下玩，到放學又已經無電要盡快返屋企瞓晏覺，等到佢瞓醒都已經天黑夠鐘食晚飯，所以艾菲真係好希望來緊K1轉返讀上午班，可以爭取到多D時間帶佢四圍玩啦﹗
講返燒腩仔踩單車，原來佢已經喺不知不覺間由喪un先踩到幾步，進展到宜家踩得好smooth仲識轉彎添啦，不過上斜或者路面有暗斜時佢都仲會踩唔到要偷雞用腳行，而呢個車迷仲好鐘意樓下平台停車場新裝嘅紅綠燈，每次經過都例必要跟住箭咀轉彎，再喺個「停」字到停低等轉綠燈，搞到好似去咗交通安全城咁。;P
呢個口水多過浪花嘅燒腩仔，連踩單車都寧捨多嘢講過人，由出門口就開始不停問「係唔係行呢邊」，「呢到係唔係無車入來」，「點解會著燈」，「前面有水氹呀」，「佢哋喺到做咩」，「點解你唔踩單車」......答到艾菲都忍唔住問佢「點解你講嘢仲多過真係踩單車」，佢偷笑咗陣之後就索性停咗喺到扮可愛氹艾菲，仲忽然同艾菲玩Peekapoo添（上星期學校英文老師教），對住呢個咁積極氹自己開心嘅小情人，艾菲有時都自覺幾幸福㗎，嘻...
先生，你想點呀？扮吓扮吓仲整埋個核突豬咀樣出來添，呢吓真係笑到艾菲肚都痛，如果佢激嬲艾菲時識得出呢招，艾菲估自己實招架唔住會放佢一馬囉﹗kakaka...
沒有留言:
張貼留言