第三年以媽媽身份過母親節，今年終於都收到燒腩仔送嘅花做禮物，但實情當然係學校老師幫手做，燒腩仔送咗畀艾菲唔夠五分鐘就搶返話係佢嘅，切蛋糕時都有同艾菲講「母親節快樂」㗎，不過講多兩講好快已經變咗做「無快樂節快樂」，well...明顯就係未明母親節係乜東東啦，不過知唔知都唔緊要，只要你健健康康激少D艾菲就夠㗎啦﹗
燒腩仔未識同艾菲慶祝，唯有由米高代勞，喺艾菲怨咗佢兩年之後，今年出奇地有返D誠意，一早就book咗愉景灣酒店，一家人去玩返晚叉吓電，仲要事前神神秘秘咁，唔係艾菲有嘢做差D撞時間佢都唔出聲，雖然明知佢呢個安排，主要係想彌補我哋之前話今年唔去旅行嘅決定（不過我哋最終下個月又飛喎，呵呵呵...），但艾菲都好滿意好開心。
母親節當日瞓到十點就畀燒腩仔叫醒（特別鳴謝米高幫手同燒腩仔起身食早餐，艾菲已經比平日瞓多一個鐘），諗住拿拿聲同佢做埋功課即出發，早D到早D開始玩嘛，點知呢個燒腩仔又發作搞事，明明半個鐘內做得完嘅功課，居然花咗足足兩個鐘，激到艾菲同米高都嘔到一地血先完成到，結果艾菲帶住怒氣出門，呢個賴皮燒腩仔居然仲可以當無事發生，坐車去到欣澳都仲未肯同艾菲道歉，終於臨上酒店shuttle先捨得講對唔住，氹返艾菲開心。
去到酒店都三點幾，即刻去check in拎房，可能係星期日加落雨，呢日真係無乜人，四周環境好靜好舒服，等米高搞手續時見到lobby有個小丑哥哥喺到扭波，艾菲即刻想拉燒腩仔埋去拎波玩，點知燒腩仔又話驚（個小丑哥哥都已經無乜化妝，只係帶咗頂帽同眼鏡咋喎），艾菲即刻喺櫃台拎粒漢堡包糖畀佢壯膽，佢先成功拎到個砰砰槍波返來。
米高話反正差幾百蚊，專登訂Ocean View Deluxe Room等艾菲開心吓喎，雖然之前上網睇過圖片介紹，但上到房一打開房門，都係忍唔住「嘩﹗正呀﹗」咁叫咗出來，燒腩仔就更加係好開心咁四圍走啦，仲不停問艾菲呢到係邊個屋企，艾菲唯有半講笑咁教佢「呢到係我哋嘅新屋企」，等佢唔好好似之前去日本住酒店咁無安全感啦﹗
由房嘅其中一邊窗影出去嘅全景圖，呢日天氣一直麻麻地，但都可以清楚望返去維港兩岸，見到搖遠的IFC同ICC，當然唔少得兩間迪士尼酒店，夜晚仲望到好清嘅月光添呀﹗
連洗手間都有海景睇，真係爽YY勁舒服，好彩艾菲早有準備，帶咗私伙浴鹽來浸浴，等燒腩仔夜晚瞓咗，即刻入來梳乎返陣，嘻...
最正係米高仲一早叫咗酒店安排BB床同沖涼盤畀燒腩仔，燒腩仔一見到張網床即好興奮咁要爬入去，平時去姨媽屋企玩要問過大人先可以入表妹張網床玩，今次終於可以自己獨霸一張唔使爭，而媽媽都好開心夜晚唔使同呢個人仔一齊瞓（同親佢同床都要就住就住，艾菲硬係會瞓唔好同驚畀佢半夜襲擊），所以都唔介意畀佢上我哋張大人床到喪跳。
游完水返上房叉陣電就出發去搵食，我哋無join酒店嘅buffet，出咗去酒店隔離愉景灣北廣場，食想當日陀住燒腩仔時勁鐘意食嘅Paisano大大件pizza，以前喺灣仔返工一經過地鐵站就會想買件來食，但生完燒腩仔之後都無機會再食啦，宜家先知佢除咗pizza抵食夾大件之外，連D pasta同小食都咁好味，最讚係愉景灣呢間仲有BB凳提供，等我哋可以食得舒舒服服。
食到一半個天又落起大雨，食飽無嘢做又走唔到，梗係呃燒腩仔來個Mother's Day Kiss先啦，都同佢講咗陣價先影到㗎﹗kakaka...
趁D雨細咗少少，拿拿聲跑過對面惠康逛吓買宵夜，仲畀燒腩仔成功坐到呢架購物車添，雖然架車確係好難推，但睇見燒腩仔個滿足樣，就覺得推得辛苦D都值，佢一上車艾菲已經同米高講，「有咗呢架車，我哋喺到行幾個鐘都得」。
行完惠康D雨都唔肯停，乜都做唔到唯有返房，上到去艾菲顧住執嘢，米高沉迷睇波，燒腩仔都自得其樂，不停喺房到跑來跑去，一時走去拎起電話扮講電話，一時就熄燈話要表演唱歌，睇來佢都好滿意我哋呢個「新屋企」喎﹗;P
到夠鐘瞓覺叫佢換睡衣，佢都係keep住hyper mode，仲忽然變身性感肉男，除晒衫爬上我哋張床到玩，真係少D心血同精力都唔夠佢來，好彩艾菲最後都順利喺十一點前將佢扑暈，可以好好咁休息返晚，原來偶然一家人去酒店住吓玩吓，唔使特別去邊做D咩，只係離開屋企唔使煩煮飯同做家務一日，感覺都已經好relax㗎啦﹗
未完待續...
沒有留言:
張貼留言