DIY扣鈕練習教材

好耐都無DIY教材/玩具畀燒腩仔玩，因為佢已經返緊學，好多大小肌肉嘅訓練都可以喺學校做到，艾菲都懶得再花心思整，不過最近留意到佢著衫扣鈕時仲係姐手姐腳要人幫先得，明顯係平時練習不足所至，為咗唔想佢遲吓返K1著唔到校服（宜家N班間學校只著運動衫就咁過頭笠就得，但K1間學校就要著裇衫扣一排鈕），睇來都係時候同佢練多D。



呢個扣鈕練習嘅教材，係之前上網時無意中睇到人哋教嘅，材料只需一粒鈕，一條布條/鞋帶同一塊不織布，咁啱之前燒腩仔兩歲生日整生日badge時有不織布用剩，仲要有兩隻色添，可以慳返唔使買，至於鈕呢都係求其喺屋企堆後備鈕到揀一粒中size就OK（如果畀細D或者初學扣鈕嘅小朋友玩，可能就要揀粒大D嘅鈕），所以今次嘅製作成本係$0。



成個製作都好簡單，首先喺布條/鞋帶嘅一邊釘粒鈕落去，另一邊就打個大少少嘅結，然後剪幾塊細嘅不織布出來，再喺布中間用鉸剪開一個啱啱可以畀粒鈕穿過嘅窿就OK，D布咩形狀其實都好隨意，不過艾菲今次想懶靚咁整花形，就要拎個花形曲奇餅模出來度位再剪，相對花多少少時間去整，但都只係用咗半個鐘左右嘅時間就大功告成。



整完之後可以自己試吓穿唔穿到，啱啱好穿到就已經OK，如果太難穿到就要剪大少少個窿，而且將佢哋串埋咁會容易D收藏，無咁容易整唔見。



趁呢排成日落雨無得出街玩，艾菲一得閒就叫燒腩仔練習吓，穿完入去又叫佢除返出來，來來回回咁重覆幾次，直至佢嫌悶唔正經穿先停，其實佢一早已經知道點穿（學校有教過），不過D手指始終唔靈活，成日會用錯咗中指來穿（佢好多動作都鐘意飛起隻食指唔用，走去用隻中指來代替），所以練習時艾菲就要喺側邊加以糾正，等佢慢慢習慣返用食指來穿。



玩吓玩吓開始唔正經，忽然將個教材放咗上頭頂，話要當佢做頭飾喎，哈哈...估唔到用來做頭飾又幾靚喎，可惜你唔係女仔啦﹗



其實除咗扣鈕練習可以DIY之外，連漿糊畫都可以自己DIY㗎，呢個係燒腩仔學校教我哋喺屋企玩嘅，就咁將D粟粉用熱水開到變漿糊狀，攤凍後倒喺包書膠或者枱墊到畀小朋友推開同用手指畫唔同形狀出來，可以緞練多D佢哋嘅小手肌，鐘意嘅話仲可以加D顏料落去等D漿糊變色來氹小朋友開心添（燒腩仔玩緊呢個就加咗一滴黃色食用色素落去），雖然佢哋一定會玩到一屋同一身都係，但D漿糊用濕布一抹就會甩，所以都算方便清潔呀﹗



另外，為咗訓練多D燒腩仔嘅小肌肉（佢始終喺呢方面發展弱D），前排燒腩仔婆婆難得幫艾菲搵到35個萬寧印花換Staub嘅碗，換之前艾菲就專登叫燒腩仔做小幫手貼印花，貼印花呢D嘢對大人來講又悶又無聊，但對燒腩仔來講就係大挑戰，要佢搣個咁細嘅印花出來已經有一定難度，仲要佢跟住號數對準方形格仔貼落去就難上加難，不過經過一輪撕撕貼貼後，佢最終都順利完成呢個任務，成品係有少少歪歪斜斜，但至少萬寧姐姐都肯收無話貼得唔OK吖，嘻...