多得波媽之前放波哥玩煮飯仔D相出來，成功毒到艾菲心思思去淘寶，左睇右睇套套Mother Garden嘅煮飯仔都想要，終於趁住呢排天氣越來越熱，淘咗套雪糕組合返來消吓暑，有齊雪糕水果棒同雪條仲連埋個架，都係六十幾蚊人仔咋﹗實在抵到爛呀﹗艾菲一收貨即刻拆出來玩，最意外係連燒腩仔都好like，日日一起身就塞D雪條雪糕畀艾菲食，Sweet到呢...
見呢期興搵D肌肉男來賣豬肉賣生果，睇到D姨姨們個個心心眼，艾菲都要出動屋企個背心男，等佢賣雪糕順便賣吓萌來吸引吓視線先﹗
艾菲：唔該，我想要個抹茶扭紋筒
燒腩仔：好，即刻整畀你
燒腩仔：搞掂﹗Cheers!
燒腩仔：趁宜家無客幫襯，等我試真吓D味先﹗
燒腩仔：唔...呢個朱古力波波都幾好味喎﹗
燒腩仔：西瓜就又甜又多汁﹗
燒腩仔：識得食一定係趴喺到食啦﹗kakaka...
燒腩仔：偷食？嘻...無呀﹗
除咗呢個雪糕組，艾菲其實仲淘咗另一套tea set送畀燒腩仔表妹，但唔知點解呢套嘅quality麻麻地，一來唔係Mother Garden以前用開嘅磁石而係魔術貼（艾菲淘之前上官網研究咗一輪，新出嘅Mother Garden好似已經變晒魔術貼唔再用磁石），二來個texture有D「鞋手」，瑕疵位都明顯比雪糕組多，最失望係其中一隻茶杯去到燒腩仔表妹手時竟然斷咗耳仔，即時同賣家講返，話係運輸上碰撞問題（但燒腩仔之前D Woody Puddy同新買呢個雪糕組又跌極都唔爛喎），唯有退返十蚊人仔補數（因為唔可以補寄來香港）。
咁淘開嘢，艾菲又忍唔住淘咗兩對鞋畀自己襯夏天衫，花花一字扣涼鞋同啱晒落雨天著嘅透明膠鞋，兩對加埋都唔使八十蚊人仔，完全無臭膠味兼唔刮腳，讚﹗
另外仲淘咗兩本寶麗來相簿返來放D即影即有相，之前喺log on望過，一本要八十幾九十蚊，係就係靚好多，但艾菲唔求花巧只求實用，宜家淘寶價連運費都係十蚊人仔左右一本。
集運黑店：神州集運﹗永不錄用﹗
淘咗一輪嘢，艾菲又要集運返香港啦，之前用過神州集運嘅敏感專線送到上門，覺得佢哋價錢合理服務都叫做OK，咁今次就諗住試吓去佢哋喺艾菲屋企附近嘅自取點拎慳返D送住宅運費啦，點知竟然係貼錢買難受，真係用過咁多間集運公司，從未見過一間嘅態度係可以咁差﹗
話說佢哋喺淘寶到大大隻字寫話「全年無休，方便下班後提貨」，艾菲confirm order前都再三同客服聯絡，問清楚係16:30-20:00可以攞貨先揀呢到，結果件貨上星期二去到自取點，收到whatsapp通知只可以喺星期三，星期五，星期六同跟住個星期一拎，等等先，唔係話全年無休㗎咩？星期日放假都能夠理解，咁星期四點解唔拎得呢？仲要服務時間忽然少咗半個鐘，唔該都無聲就改咗做16:30-19:30，搞到一心預米高放工返來幫手拎件嘅艾菲失晒預算，皆因米高正正就係19:30-20:00呢段期間先返到來﹗
睇完msg，艾菲好自然就whatsapp問返時間點解唔同咗，等極都無回覆就打去問，接電話個女仔能度十級惡劣，只係一再重申一切以whatsapp資訊為準，仲好晦氣咁話趕唔切拎可以幫艾菲send件貨去其他自取點，叫艾菲過主唔好阻住佢收工嘅意思，跟住就索性叫艾菲自己打去神州集運投訴兼cut電話，之後再打去神州集運，接線個阿嬸只係不停重複自取點個服務時間係16:30-20:00，艾菲講咗三四次自取點個人講咩，佢先識答同自取點了解返，最終當然係了解咗成日都無回音啦，好彩米高唔想艾菲再動氣，第二日專登早D收工趕過去拎先解決咗個問題。
安全收到件貨後艾菲當然第一時間上淘寶畀個差評佢啦﹗不過對一間零誠信，當客人投訴無到，完全唔在乎客人差評嘅公司來講，一個半個差評係絕對唔夠，最有用嘅方法都係用行動去直接表達不滿，將佢列入永不錄用嘅黑名單﹗
沒有留言:
張貼留言