Beach Boy@半月灣

父親節正日，本來計劃一早起身湊仔，等米高可以抖吓休息吓，點知端午節當日有D意外，結果我哋邊到都無得去，錯過咗大好晴天，再見到唔少朋友喺FB洗版話游完龍舟水，恨到艾菲心癢癢，最後艾菲好衰咁聯同燒腩仔，一齊逼米高應承喺父親節當日陪我哋去海灘玩沙玩水，然後一大朝早執齊嘢，就一人拎住一袋出發啦﹗



一聽到去沙灘，米高只係諗住去最近嘅清水灣，不過清水灣假日一定逼爆兼夾等好耐車先出得返市區，見小豆子媽之前推介半月灣好似幾正，艾菲見都唔係太遠，有得畀燒腩仔坐吓船仔，出返來又可以喺西貢食飯，就決定跟風過來呢邊見識吓，由小巴站行出西貢碼頭好容易就會見到小豆子媽推介嘅貓記，成人來回$30一位，小童1米以下免費，買飛時阿姐仲提艾菲影低回程時間表，不過佢其實全日都keep住有船過去，只要見到佢哋船都可以隨時上船返返來。



買完飛等咗陣D阿姐就帶我哋上船啦，而準備上船嘅時候，居然畀我哋撞到一仔一家喎，原來佢哋都係去半月灣游水，嘻...小朋友可以有個伴啦，Good﹗只可惜燒腩仔係慢熱嘅朋友，唔係好肯主動埋去同一仔玩，再加上佢第一次坐呢D船仔，安全意識向來好高嘅佢，全程只係攬實袋沙灘玩具坐定定發呆，好似好緊張好擔心會有意外咁嘅樣，唔似一仔一上船就好enjoy咁睇風景。



我哋架船先停橋咀島再去半月灣， 見到呢個蘑菇形咁嘅山就到啦，全程用咗十五分鐘左右，一落船就見到D水清到見底，艾菲睇見都覺得興奮，完全無諗過香港仲有沙灘嘅水係咁乾淨㗎﹗



落船行兩三分鐘就到沙灘，水清沙幼到好似去咗外國咁呀﹗真係不愧為全港最美泳灘﹗



之但係，呢位仁兄就唔多識貨， 行到落沙灘第一句，就係用極嫌棄嘅語氣同艾菲講：「媽媽，對腳好多沙呀﹗」忽然潔癖上身勁麻煩，明明上年同你去沙灘時你勁like㗎喎﹗



同佢去更衣室換好泳衣再落返沙灘玩，依然未習慣對腳有沙只肯坐喺沙灘蓆邊玩，真係畀佢激死﹗



既然嫌對腳污糟，梗係拉佢落水洗吓佢啦，然後有得玩水即刻乜都唔記得，嘻...



玩玩吓都懶得行來行去慢慢倒啦，索性拎埋個花灑出來倒水添﹗



而呢個時候，一仔已經好開心咁游咗陣水，上水時仲專登行埋來撩佢玩添，不過燒腩仔實在太專心玩水啦，完全無理到一仔自己掉頭走咗去，O...



之後艾菲抵唔住頸，就咁拎對水袖就捉咗燒腩仔落水游，起初佢攬實艾菲we嘩鬼叫咁㗎，但艾菲無理只係不停叫佢踢腳，再慢慢試吓撥手，有水入口就bu返出來唔好飲，然後艾菲就慢慢鬆開手，畀佢知無艾菲佢都OK，咁佢覺得自己得同有信心，就開始好enjoy咁游啦，到第二轉跟米高落水時，仲勁大膽咁叫米高放開手畀佢自己游添﹗



游咗陣就上水畀佢食D嘢玩陣沙休息吓，由於已經唔係第一次玩沙，所以我哋都好放心畀佢自己玩，但就點都估唔到，呢個為食仔居然會畢D沙入口試味﹗﹗﹗見到佢成個咀角都係沙同口水嘅場面，艾菲即刻同自己講唔好驚叫嚇親佢，免得佢以後唔敢試新嘢，只係好冷靜咁笑住問佢好唔好味，然後佢若無其事咁答艾菲「唔好味」，艾菲就叫佢摞返出來唔好再食，斷估佢試過一次之後唔會再有下次啦掛，kakaka...



由於呢日嘅天氣實在唔多穩定，斷斷逐逐咁都落咗三、四次驟雨， 搞到我哋D嘢濕晒勁狼狽，再加上知道呢到嘅沖身設備唔係好夠要排隊輪流用，所以我哋玩到十二點幾就開始執嘢換衫走啦，總括來講艾菲都幾鐘意呢到，但要玩得舒服唔使人逼人的話，除咗揀平日就一定係早來早閃，因為到咗十一點幾沙灘已經有七成滿（呢日仲要水漲無咩位畀人坐），之後走都陸逐見到唔少人專登坐船過來玩。



早咗去碼頭等船，燒腩仔忽然憂鬱小生上身咁...

 

仔...都不過叫你企喺到等船順便睇吓有無魚姐，唔使企到咁有型㗎喎...



架船未埋到碼頭，來遠已經見到貓記嘅旗，今次我哋坐呢架船大架D有兩層，米高就貪得意抱咗燒腩仔坐上層，可能露天又高D感覺開揚D啦，燒腩仔今次猛話自己唔再驚啦。



一唔落雨個天就勁好，連沿途嘅風景都特別靚，亦好慶幸早過來玩同及時離開，因為到下午已經大雨到邊到都去唔到啦﹗



話晒呢日都係父親節，所以我哋出西貢食個茶餐，再返屋企沖涼畀燒腩仔瞓陣叉吓電，到夜晚又出動去沙田食飯啦，今餐係食米高自已揀嘅純壽司（嘻...連食咩都要主角自己揀，艾菲真係好無心囉），例牌要等成粒幾鐘位先有得食（後尾先發現新城市app好似有得預先拎籌），於是就去咗隔離商務同燒腩仔睇吓媽媽到底有咩煩惱（請留意書名:P），再入玩具反斗城坐吓法拉利扮型男來消磨時間。



入餐廳一坐低米高就叫呢隻兒童餐船仔畀燒腩仔食，除咗件三文魚壽司之外全部都歸佢一個所有，但佢呢排感冒未清成日叫肚痛無胃口（醫生話佢應該係有肚風），所以食完呢隻船嘅三件壽司之後就叫飽唔肯再食，連至愛蛋糕都竟然話唔要，搞到艾菲有D擔心佢呀﹗