Smaland@IKEA

由燒腩仔仲係BB時開始，艾菲每次路過Megabox IKEA個Smaland，都好想畀燒腩仔入去玩吓波波池，不過佢有高度限度，一定要over 90cm先玩得，而燒腩仔過去幾個月嘅身高，就偏偏一直停留喺88-89cm之間，終於等到上星期四晚心血來潮同佢度高，YEAH!!! 終於夠90cm高啦﹗梗係第一時間帶佢去玩啦﹗



星期五湊完燒腩仔放學就直接帶佢過去Megabox，已經即刻去4/F Smaland門口拎飛仔，以為平日下午頂多等一節就有得玩，點知已經派飛派到第十節八點半場，真係估你唔到咁誇張，有諗過同佢直接排後補位玩六點半場，但米高話反正唔急不如食飯先再慢慢玩。佢平日一節有45分鐘，每節15-20人不等，但周六周日假日的話，一節就只得30分鐘，而且每節成30人，所以平日來玩會舒服D盡慶D。



IKEA姐姐一夠鐘就會畀拎咗籌嘅小朋友入去玩（佢呢場得三個正選小朋友，所以拎唔到籌又想玩的話，真係可以試吓開場前早D去排後補位），大人拎返張飛尾就走得可以好放心咁去行街，場入面會有IKEA職員照顧小朋友同維持秩序，但今次話晒都係燒腩仔第一次入去玩，艾菲同米高都無走企咗喺出面等佢（有玻璃窗睇到佢哋喺入面做緊咩），而燒腩仔第一時間就跑咗去波波池到玩，一個人包場嘅感覺應該都幾正，之後後補大軍殺到就無呢枝歌仔唱啦﹗



唔知係唔係孤獨的波波池太悶，所以玩唔夠一陣就走咗，第一次咩都唔識嘅燒腩仔，係跟住人尾咁去咗另一邊玩具櫃拎玩具囉，人哋姐姐拎積木出來玩，佢就走去玩人哋D積木。



之後見米高喺出面指佢捐入個窿到，佢又好開心咁捐咗入去四圍走。



出來後又衝咗去波波池到玩咗陣，跟D大哥哥大姐姐掟波，玩到悶又走返去玩具櫃拎玩具玩，今次開始熟架步啦，不過佢人仔細細走去學人搬個大箱，搬到就跌就跌咁嘅樣，搞到D IKEA姐姐要跑過幫佢一把。



其實除咗波波池同D IKEA玩具之外，場入面仲有呢D聖誕樹同大木鞋，係畀小朋友匿入去玩，都幾過癮㗎。



喺波波池同玩具櫃之間來來回回走咗三四次之後，燒腩仔終於都發現咗呢個車迷至愛火車陣啦﹗D哥哥一入場就好畀心機咁砌路軌，難得佢哋又肯畀燒腩仔加入喎，當然IKEA姐姐都有不停吩咐佢哋唔可以爭，每人只可以玩五架車仔啦（但燒腩仔唔知點樣呃咗個哥哥畀多架佢），後尾唔知點解燒腩仔突然發脾氣撥走D火車，IKEA姐姐都有即刻話佢，佢再望吓場外嘅艾菲同米高，就好似知衰咁即刻收咗火。

到完場前五分鐘，IKEA姐姐就會開始叫大家幫忙收玩具，同捉返波波池入面嘅小朋友出來，大家坐晒喺地下到等家長來接，哈哈...真係好似返學咁場面都幾搞笑，家長一定要拎返飛尾來先可以接小朋友走，而交收前IKEA姐姐都會問返小朋友接佢嘅係邊個，確保唔會畀其他壞人接走咗小朋友，感覺都幾安全可靠呀﹗