上年七月去日本時買咗兩盒cuoca預拌粉返來（其實香港都有得買，但硬係要去到日本先捨得買），返香港即刻試吓係唔係如傳說中咁正，於是一桶高大威加勁軟熟嘅楓糖吐司就此誕生，由落粉到焗完都聞到好香楓葉糖漿嘅味道，果然係貴得來物有所值﹗
試咗第一盒cuoca預拌粉之後好快就開埋第二盒來試，今次仲要爆桶添呀﹗又高大又軟熟超好味﹗真係好驚喜呀﹗用咗P仔咁耐都未試過焗得咁好，到底係酵母定係粉嘅比例令佢個效果咁好呢？
整完兩桶cuoca麵包之後，忽然醒起想整好耐嘅芝心軟包，由於屋企D mozzarella啱啱用晒，只係得返cheddar cheese，所以就用cheddar cheese來整，出爐即食真係好味到無朋友，有機會再整D芝士一定要加碼先得﹗
喺某個星期日，正當艾菲煩緊來緊一星期唔知煮咩餸時，燒腩仔忽然主動話想食pizza喎，咁艾菲呢個慈母當然有求必應，粟米蘑菇雞肉pizza，全部料都啱小朋友食，配埋罐靚媽可樂，話咁易又一餐啦﹗
難得燒腩仔咁鐘意食pizza，艾菲當然都爭取機會同佢親子廚房一下，順便試吓淘寶買把pizza刀，整好餅底搽好自家製千島醬汁之後，就叫燒腩仔幫手放粟米同火腿，加埋菠蘿同芝士喺面，就係小朋友至愛嘅夏威夷pizza啦﹗
抖咗四個月之後心血來潮再開機，整咗桶全麥蜂蜜吐司，焗之前仲擔 心啲酵母放咗雪櫃咁耐唔知死咗未，出爐見到個包咁高大威
艾菲唔知點解對D好濃牛油味嘅麵包特別有好感，無意中喺fb見到呢個皇后吐司嘅食譜，即刻save低跟住整，雖然要落勁多奶同牛油，好肥好似唔多健康咁，但真係超香超好味，唔使一日就畀我哋一家三口清晒﹗
一直心思思想試做嘅donut，襯某個星期日被米高獨留在家湊仔，趕咗燒腩仔上床瞓晏覺就開工挑戰佢，都幾多工序同麻煩㗎，不過見到製成品又覺得辛苦D都值，有機會再整要試吓唔炸轉用焗爐焗先﹗
之前喺爭鮮買咗罐三文魚鬆但一直無機會開來食，無意中喺書局打書訂時見到個新包法可以整大理石紋，見幾得意就有樣學樣跟住整，出來效果都OK，不過三文魚鬆始終有陣魚味，艾菲都係鐘意肉鬆多D。
有晚臨瞓前忽然好想食芝士火腿包，於是一起身就即刻開機整麵糰，邊煮燒腩仔個午餐邊整包，話咁快就有得食，YEAH！
前一日整落嘅湯種未用完，第二日又心思思想再食火腿包，所以襯燒腩仔返咗學，快手整咗個火腿包畀自己止癮，仲用剩返嘅麵糰整咗幾個迷你香葱芝士包畀燒腩仔放學做下午茶添﹗
好耐無整過嘅粒粒芝士軟吐司，外脆內軟正到無朋友，全靠米高幫我去二德惠抬舊高溶點芝士返來先有得食咋﹗
見屋企幾棵蔥越種越高勁似雜草，計過weekend唔會煮飯，把心一橫將佢哋全部
今次記到呢到先，重覆同普通如堤子包之類都唔寫啦，希望下次再update時艾菲又會有D突破畀到自己，暫時目標有美心排包同埋麵包超人包，不過唔知要拖到何年何月何日先會的起心肝整呢？
相關參考：
沒有留言:
張貼留言