透心涼鮮果雪條

天氣越來越熱，除咗玩煮飯仔嘅雪糕雪條之外，都真係要食返D真嘅雪糕雪條來消吓暑先掂﹗對於屋企有兩部雪糕機嘅艾菲來講，都唔知幾多年無買過盒裝雪糕返屋企啦，不過呢排打爆咗屋企個冰箱無咩位，所以米高order嘅芒果牛奶雪糕要遲D先整到，但唔太阻地方嘅雪條就無問題，襯米高星期日返工獨留我哋兩母子在家無所事事，一於同燒腩仔一齊整幾枝健康又好味嘅鮮果雪條來消磨吓時間先﹗



燒腩仔：嘻...媽媽話屋企唔養懶蟲，想食雪條就要幫手整喎，所以我燒腩茂又出場啦﹗

材料其實好隨意，咁啱打開雪櫃有奇異果同菠蘿，我哋就決定整呢兩隻味，如果鐘意嘅話整西瓜，士多啤梨，蜜瓜，荔枝或者芒果都OK㗎﹗



燒腩仔：首先係要將D奇異果批皮切粒粒，然後加幾滴檸檬汁落去，再用攪拌機打成蓉就可以畢落雪條模到啦（打完蓉可以先試味，好似奇異果比較酸就可以加D糖落去中和吓）﹗

第一次畀燒腩仔用刀切食物，因為D水果都好淋身，所以畀把快餐外賣嘅膠刀佢用就得，相對用真刀安全得多，而其他step佢都已經可以全部自己來（當然都仲要幫眼同幫手執頭執尾啦）。



燒腩仔：洗乾淨D容器之後就可以開始整菠蘿味啦，都係切粒粒放落攪拌機，再落幾滴檸檬汁落去，開攪拌機打成蓉就搞掂啦﹗今次我仲有幫手試味添㗎﹗

菠蘿相對奇異果無咁易切，正好係個機會畀艾菲教佢正確拎刀切嘢嘅方法，平日教佢切泥膠講極都係夾硬打橫拉就算，宜家夾硬打橫拉會整到D菠蘿飛落地無得食，佢先終於肯試吓慢慢前後拉把刀，係就係切得慢D㗎啦，不過至少證明到畀佢睇，只要肯試同用正確方法自然會成功。



燒腩仔：話咁快就搞掂﹗YEAH！

呢到用咗三個奇異果同半個菠蘿，最終每樣水果都整到兩格細雪條模同一格大雪條模（AEON $12店買），點解要買兩個雪條模仲要買一個大一個細？因為有個比艾菲同燒腩仔仲為食嘅米高話細模唔夠佢食，要求艾菲買個大模整大條D畀佢食囉﹗kakaka...



燒腩仔：放個模入雪櫃雪咗一晚，放學返來終於有得食啦﹗自己整嘅真係好味D㗎﹗我呢條菠蘿味超甜，不過媽媽話佢條奇異果味好酸，下次要落返多D糖先得喎，嘻...

如果想甩模甩得靚D，可以將個模拎出來室溫放五分鐘，又或者搵個碟仔裝少少熱水座一座溶四邊再用陰力扯出來就得㗎啦﹗成件事係唔係好易呢？