每逢大時大節，燒腩仔公公都一定會煮餐勁嘢畀我哋返去做節（艾菲屋企由細到大都係爸爸負責煮飯㗎），我哋翹埋雙手乜都唔使做就有得食，但話晒都係父親節，無理由仲要佢煮畀我哋食咁不孝啦，本來大家都諗住出街食餐好嘅就算，不過艾菲就唔知挑起邊條筋，居然自動請纓話煮畀大家食﹗
其實艾菲咁做係有原因嘅，一來係想挑戰吓自己嘅廚藝，二來都想叫大家上來幫手踩吓場熱鬧吓，等呢排成日話唔畀人來屋企，特別講明唔畀表妹上來玩嘅燒腩仔，嘗試吓做主人招呼客人嘅滋味，皆因我哋蝸居地方淺窄又無工人姐姐善後，所以朋友間嘅gathering都好少會選擇我哋屋企，只係好間中先有D朋友個別上來坐吓，好彩燒腩仔今次都無話好唔慣仲好期待添，燒腩仔公公婆婆上來之後，就懶叻咁同佢哋話「仲有好多人未來呀」，而經過艾菲密集式洗腦後，佢都無再專登蝦表妹，亦好願意借出佢嘅玩具同畀張舊highchair表妹坐。
至於餐私房菜，艾菲諗咗幾日之後，決定以上海之夜做主題，參考網上嘅食譜，然後整咗鎮江肴肉，皮蛋豆腐，雞絲粉皮，醉雞翼，走辣版螞蟻上樹，燻魚，免炸版紅燒獅子頭，蛋餃旺菜煲，同埋同主題無關純粹幫艾菲同燒腩仔清熱化痰止咳嘅海星湯。
飯餸上枱，大家都即刻嘩嘩聲爭住影相（相機食先是常識吧﹗:P），燒腩仔婆婆仲不停提醒艾菲要send返D相畀佢forward畀朋友睇添，而艾菲最開心係見到大家好落力咁幫手清晒D餸，連平日最奄尖嘅燒腩仔姨媽都話D食物啱味，艾菲就更加係安樂晒啦﹗
做咗煮婦咁耐都係第一次煮八餸一湯白飯任裝，之前每次請朋友上來食飯，頂多煮幾味加D外賣就算，而為咗呢餐飯唔好有任何閃失，艾菲早兩晚已經開始準備，等大家可以準時開飯唔使等到頸都長，當然亦要特別鳴謝米高幫艾菲走咗兩轉街市買餸同幫手洗碗來成全呢個壯舉啦（well...艾菲係好怕去街市同唔識買餸㗎，所以買餸嘅職責就好自然咁落咗喺米高身上啦）﹗
飯後又點可以無甜品呢，燒腩仔姨媽專登喺美心買咗個蜂蜜mousse cake來食，不過大家食咗幾啖之後都開始停晒手唔願再食，個蜂蜜味其實係OK㗎，不過唔特別好甜的話，食多幾啖真係會嫌漏囉。
咁艾菲作為主人家，當然都有準備定自家甜品招呼客人啦，有芒果牛奶雪糕，柚子蜜雪糕，同荔枝啫喱任揀，不過唔知係唔係啫喱太普通太易整呢，佢哋個個都揀食雪糕唔食啫喱，而用新鮮芒果整嘅芒果牛奶雪糕係獲得一致好評，至於柚子蜜雪糕就被評為濃味過Haagen Dazs新出隻柚子雪糕，仲有少少回甘都好OK囉，嘻...
沒有留言:
張貼留言