32個月

我今日32個月大啦﹗不過今日唔係幾開心，爸爸媽媽無同我出去慶祝，因為我做功課時唔乖，連線時專登唔合作，結果搞咗大半日都完成唔到（艾菲：各位EE有無好方法氹小朋友做功課，每次遇著佢無心機做功課時，真係可以好勞氣同搞好耐都唔做），最終一家三口留咗喺屋企，白白浪費咗個美好周日...



喺食方面呢個月都係咁上下，每餐食一個大人碗嘅飯連餸，如果有汁撈飯會食得好積極，但如果係D唔特別鐘意食嘅飯餸就會搞好耐兼食到周圍係，就連飲杯水都會搞搞震唔多合作，一定要媽媽望實我飲先唔會倒瀉，但食零食或者飲湯飲果汁又可以食得好乾淨兼光速完成㗎喎﹗



瞓覺都係一時時乖， 成日唔願去廁所同刷牙瞓覺，爸爸媽媽十點叫我去刷牙，好多時搞到十點半差唔多十一點先入到房，上床後再同媽媽講東講西隨時搞到十一點幾十二點先肯瞓，不過一覺都可以瞓到第二朝十點，但半夜喊醒或者朝早七八點醒咗，就點都唔肯落床出房去廁所，會死忍到十點媽媽叫我起身除片先vee，至於晏覺都係keep住放學返來瞓一個鐘，好唔夠喉所以每次起身都要發一輪脾氣先清醒到。



活動能力無特別進展，行路時依然好論盡，一心急同攰就好易跌，去公園都會肯爬吓鋼架，但最尾一級成日唔識點轉返企起身，小肌肉方面繼續訓練中，扣鈕同扭毛巾都未做得好，不過自從之前整完雪條後，用刀切嘢有明顯進步。


認知能力越來越好，好多嘢一教就已經識，亦有好多嘢媽媽無教過嘅，都唔知點解我會識，之前媽媽喺圖書館借咗本小樹苗出嘅《我最喜愛的知識圖典場所篇》，一睇之下先發現入面好多日常生活嘢，我已經識同明係用來做咩，最近熱衷於玩LEGO，仲會自己砌個隧道出來畀D寶貝車過，實行來個LEGOX車仔crossover。

媽媽見我成日同佢講D嘢咩色，就剩機教吓我顏色嘅英文，宜家最記得黃色係yellow，紅色係red，其他都係一時時記得，上個月成日讀錯嘅7，經過媽媽嘅特訓之後，宜家雖然間中都仲係會讀錯做1，但提多幾次之後就識讀返7（艾菲：佢明顯唔係唔認得個7字，估佢係因為7字嘅發音太難，所以成日偷賴讀做1） ，不過仲係鐘意將D英文字同數目字由右至左咁讀，要不斷提先會讀返啱個次序，至於上個月仲未識砌嘅砌圖，今個月好似好咗少少，終於有返D意識係要對圖案而唔係亂來求其對個凹凸位。



越來越鐘意同小朋友玩，但成日都玩到勁肉緊，試過有兩次同同學仔一齊放學，人哋唔肯拖我即呱呱嘈死纏，最後仲因為一D好無聊嘅小事同同學仔鬧起交上來，繼而仲出手互相推撞添（艾菲：佢係勁惡咁鬧到人哋喊囉﹗對方唔忿氣就出手摑咗佢兩巴，於是佢就還手推開人，唉...真係好失禮...）， 對表妹都無之前咁溫柔，除咗會專登搶佢D玩具，有次玩到癲仲走去推跌表妹，媽媽越叫住我越要推多一下，結果當然係畀媽媽捉咗我去冷靜區冷靜啦（艾菲：婆婆話明顯feel到佢有醋意，最近連玩line時發現公公婆婆喺表妹屋企佢都會唔like）﹗



自理能力越來越好，返學放學繼續自己著校服同除校服，仲開始越著越叻同順，媽媽宜家只需將D衫分好前後放喺playmat到，同除衫時反起件衫呢吓要幫一幫我，其他都係我自己一個可以搞掂，至於potty training都係咁上下，宜家由起身開始就除片，返學去街同瞓晏覺都唔使再著學習褲，但開始會因為顧住玩而唔願vee搞到出意外（之前只係扭同唔敢出聲先會出意外），不過畀媽媽惡話完又好返D。



把口照舊成日唔收，仲會自創口水歌咁唱返自己見到同諗緊嘅嘢出來，不過唔知點解呢排一緊張就會講到漏口咁，「我...我...我...我XXXXX」，爸爸話可能因為我開始要諗講咩但個腦又未轉得切喎，好多時畀媽媽話我講嘢仲多過做嘢，甚至做錯事畀媽媽訓話緊，我都會有好多嘢講同問來轉移佢視線，仲學晒大人口吻講嘢搞到媽媽唔知好嬲定好笑，所以佢話今個月一定要寫低我D童言童語喎...

事例一：

有日我同媽媽食緊蕃茄湯烏冬，食完烏冬我就開始飲湯，但就飲到唔多正經咁
媽媽：你快D正經食啦﹗
我：媽媽，你講錯呀﹗
媽媽：我講錯咩呢？
我：應該係正經飲先啱呀﹗
媽媽：！＠＃＄﹪

事例二：

又有日媽媽煮咗南瓜燴飯畀我食
我：媽媽，多謝你﹗
媽媽：做咩突然同我講多謝？
我：鐘意食D飯咪多謝你囉，有咩問題姐？
媽媽：...................

事例三：

有日去完公公婆婆屋企返屋企途中
我：你一陣返屋企喊唔喊㗎？
媽媽：我做咩要喊？
我：你尋日去完公公婆婆到返屋企喊嘛，你喊我下次唔同你去㗎？
媽媽：！＠＃＄﹪

（艾菲：實情係成日去完街返屋企喊個係佢囉，艾菲只不過有次諗住先下手為強，喺返屋企途中學佢扭話唔返屋企同扮喊，等佢無機會扭計話唔返去，點知佢就記住到宜家話艾菲扭計啦）



最後又到講情感發展啦，媽媽話我呢個月無咁terrible，都有故意搗亂唔合作嘅時候，但好多嘢知道挑戰唔到都無再堅持落去，宜家終於可以做到開開心心咁返學同開開心心咁放學，同埋我都好介意爸爸媽媽開唔開心，有時我做完搗蛋嘢會走去問媽媽開唔開心，一聽到佢話唔開心就會好內疚，不過依然係唔話得好要面，話完會專登繼續錯落去，又或者無聲抗議唔郁唔回應（艾菲：之所以今日做功課要搞成大半日啦）。

媽媽話我扭起計上來十足野蠻人，完全唔講道理同唔睇場合，例如落街見到爸爸D朋友，等極我都唔肯出聲叫人，叔叔就話走先唔好逼我，點知人哋一走我即發脾氣爆喊話要叫人（艾菲：人哋都走咗啦仲點變個人畀你叫呢？），要媽媽惡鬧先會冷靜落來（艾菲：好言相勸喺佢身上係完全用唔著㗎﹗唉...）宜家出街唔再怕陌生人，甚至會主動撩同電梯嘅人講嘢，仲會懶熟咁走入去保安姨姨個位到搞搞震，氹到佢哋勁開心。