對比返上年同燒腩仔去北海道，今年佢真係大個仔同懂事咗好多，艾菲一買機票就已經同佢講會坐飛機去台灣，佢之後就一直提住四圍同人講，到出發前一晚仲興奮到唔捨得瞓，成晚坐喺床到偷望大人執行李，第二朝一起身就開籠雀咁講唔停，沿途仲搶住幫我哋手推行李，上到機場巴士見出面落晒大雨都無損佢嘅好心情。
我哋坐中午機出發，但專登提早去機場諗住畀佢慢慢玩，一落車第一時間去check in放低件行李，排marco polo條隊竟然無人，地勤姐姐仲好有心專登配合我哋，等燒腩仔企好ready先慢慢將件行李放上輸送帶，呢D對大人來講好平常不過嘅事，對小朋友來講係好神奇㗎﹗
之後去大家樂食個早餐就過關啦，過關後當然第一時間去Disney Store巡視吓業務啦，呢個新出嘅車王杯都幾cute喎﹗
然後一行出鋪頭，米高即衝咗去Movenpick專門店到，買咗杯焦糖雪糕畀艾菲食，宜家出面市區D專門店全部執晒，真係好難得先有機會食到㗎（呢個味係要專門店or酒店buffet先有得食㗎）﹗
見架機delay，帶咗燒腩仔去Gate 23慢慢玩，不過相對日本同台灣嘅機場，真心覺得香港機場應該upgrade吓呢個area，連滑梯都無條叫小朋友點放電呢？唯一係右邊個彈琴位叫做吸引少少。
對面仲有D位係畀小朋友玩，估佢係for開workshop時用，但呢日就無workshop只可以行吓坐吓。
以往入閘後都會望多眼航班資料先行嘅艾菲同米高，今次唔知點解大安旨意玩完就直接坐車去咗Gate 63，點知去到先知改咗去Gate 4，好彩班機再delay多半個鐘，仲可以帶住燒腩仔慢慢行返出去（原來係無得坐車返轉頭）。
去到閘口班機都仲未見影，唯有去隔離Gate借架飛機來影張相打個卡等時間過啦，但燒腩仔唔知係唔係開始覺得攰，全程都勁唔合作，要用糖來利誘先肯望鏡頭。
唉...原定1315嘅機，遲咗足足成個鐘有多先飛到，一早起身又成晚無乜點瞓嘅燒腩仔，上機玩咗陣headphone同篤咗陣mon，架機都未起飛就已經瞓著咗。
起飛無耐就派餐，左邊嘅係燒腩仔嘅兒童餐，係一個粟米雞肉餡餅之類嘅物體，但等到燒腩仔瞓醒食時，個包已經已經硬到咬唔開，至於個朱古力椰子水就更加係超難飲，連燒腩仔呢個係汁都啱嘅小朋友都唔肯再飲第二啖﹗至於右邊個大人餐雞捲，只可以話勉強入得口唔會難食到要嘔返出來咁囉﹗
由於我哋今次會去宜蘭同野柳玩，所以米高就決定租兩日車來個自駕遊，揀咗Toyota嘅Yaris來揸，
呢晚我哋住嘅係自然捲北歐風格旅店嘅親子房，雖然一早已經睇晒相有晒心理準備，但打開房門嘅一刻艾菲都係忍唔住「嘩」一聲咁叫出來，再見到燒腩仔嘅反應艾菲就更加覺得當日訂呢間房嘅決定係無錯㗎﹗
其實喺我哋四月confirm機票之後，艾菲就已經即刻搵宜蘭嘅親子民宿，對於燒腩仔呢個超愛滑梯嘅小朋友來講，呢邊嘅溜滑梯民宿絕對係佢杯茶，但睇來睇去艾菲都唔係好揀得落手，D房嘅設計唔係太公主就係太俗太娘，終於喺無意間畀艾菲搵到呢間民宿，完全係艾菲想要嘅嘢呀﹗佢呢個隧道滑梯同另一間lego房艾菲都好鐘意好鐘意﹗可惜兩間都一早畀人hold咗，好彩最後畀艾菲等到呢間小小運動家房嘅後補位先唔使煩再搵第二間咋﹗
據講，間房嘅設計同牆上面嘅卡通，都係民宿女主人一手包辦，除咗最吸引嘅大滑梯同波波之外，佢哋仲好貼心咁放定咗D繪本喺房到畀客人親子共讀，房入面嘅設施都好baby friendly，洗手間亦有提供小朋友廁板同浴盤沐浴露，仲準備定飲用嘅冷熱水喺房，每個位都睇到民宿主人嘅細心﹗
燒腩仔一除鞋，就即刻上上落落咁玩咗N咁多轉啦（其實大人都忍唔住玩咗幾轉:P）﹗我哋執好嘢話出去食飯，佢即刻耍手擰頭話唔去，要我哋應承返來再畀佢慢慢玩，佢先肯乖乖地著鞋走咋﹗kakaka...
沒有留言:
張貼留言