一入場當然係第一時間去參加余仁生嘅小小中醫工作坊啦，著咗中醫袍之後真係似模似樣咁喎，仔...可唔可以幫媽媽把個脈呀？kakaka...
之後就有姐姐教佢執藥整香包，每人可以揀三樣藥材，然後放落個盅到盅碎佢，再放落個袋仔到就OK，艾菲已經唔記得燒腩仔揀咗咩藥材啦，不過問過姐姐話有驅蚊作用，啱晒艾菲呢個超怕畀蚊咬嘅人，Good﹗
話咁快就搞掂，呢個小朋友拎住個香包好有成功感咁，upload相上facebook仲會有特別禮物添，於是艾菲就喺口水肩同七星茶之間，揀咗燒腩仔飲開嘅余仁生七星茶包。
一離開余仁生嘅booth，燒腩仔就即刻拉咗艾菲去玩側邊嘅彩虹雙滑梯，之後仲好大膽咁自己入咗去玩升空火箭旋轉滑梯，然後路過拯救動物障礙爬同繽Fun波波池都嘈住要玩，好彩呢日唔算多人，全部都係排一陣隊就玩得。
跟住經過Friso嘅攤位，諗住畀佢入去玩沙池，點知玩之前原來要帶眼罩同著披肩影張相先有得玩，艾菲當然好鐘意呢D扮鬼扮馬嘅玩意啦，但燒腩仔就好唔like好抗拒，其實之前余仁生個workshop要佢著中醫袍，佢直情係喊住話唔玩㗎，艾菲搞咗好耐先平伏到佢情緒，好彩今次畀兩粒糖佢就搞掂，只係影完相就同艾菲鬥氣話唔玩沙池囉，自己衝咗埋去玩隔離嘅滑梯同充氣滾輪。
話晒都係來動物農莊，無理由顧住玩唔睇動物㗎，所以路過見到水母同海星，艾菲就即刻拉燒腩仔埋去睇。
而另一邊就有馬同山羊，之前去宜蘭餵過羊嘅燒腩仔今次勁大膽，好勇咁連手帶草伸入去餵，又伸隻手入去摸馬馬個頭，之後見到兔仔同龍貓仲睇到唔捨得走添呀。
睇完動物就去咗玩巧虎生活自理挑戰站，試咗圖形板同螺絲玩具，燒腩仔呢個巧虎fans當然係大愛啦﹗
等咗大半日，巧虎仲係未見影，唯有叫燒腩仔扮住先來止吓渴，hehe...
場內仲有智樂嘅攤位，勁有心思咁用一D真實嘅工具來畀小朋友玩，而喺木，沙同水泥三樣嘢入面，燒腩仔自己揀咗水泥來玩，仲好興奮咁拉艾菲入去排隊㗎，不過...當義工姐姐話要帶手套先可以入去，佢又再一次喊住拉艾菲走話唔玩，咁明知佢其實想玩只係怕對手套，艾菲無理由縱容佢走咗去㗎，於是就拉佢埋一邊講道理，半氹半逼咁要佢帶咗對手套，然後有人就帶住副好委屈嘅樣來玩水泥（但隔離D小朋友個個都玩得勁開心囉），好彩搽完水泥見到架工地手推車，義工姐姐又好好人咁教佢玩，佢先開心返咋。
玩完水泥見差唔多時間，就提早去台前搵位坐，休息吓食D嘢順便等巧虎出場，然後巧虎一出場燒腩仔即變hyper mode，巧虎邀請小朋友出去台前唱唱跳跳時，艾菲行慢D都畀燒腩仔投訴呀﹗
睇完巧虎表演咁開心當然要同偶像影返張合照先夠圓滿啦，不過由於呢日只係得艾菲單拖湊住燒腩仔，艾菲又唔熟流程唔知排隊位，所以我哋諗住跟台前嘅人群行返出去排隊時，條隊已經畀工作人員截咗（原來行我哋前面嘅小朋友好多都已經有人幫忙排隊），好彩同佢哋解釋返都畀我哋排埋，如果唔係真係唔知點同燒腩仔交待呀...
我哋同巧虎影埋合照就走，今次難得來博覽館一遊，艾菲一心想畀燒腩仔試吓坐機鐵㗎（青衣站來回博覽館有優惠），不過因為回程時我哋係返燒腩仔婆婆屋企唔順路，所以最終都要坐返機場巴士出入，唔...唯有留返下次有機會先再試啦﹗
沒有留言:
張貼留言