成個朱名美術館其實好大，認真行認真玩的話一日都唔會玩得晒，艾菲同米高亦早有共識要睇時間做人，行到幾多得幾多唔好貪心，所以喺出面行咗一圈見差唔多到午飯時間，米高就建議我哋返去入口隔離間美術館餐廳開餐，打算行埋門口兩間手信鋪頭就走。
一行返入展覽室，我哋就見到兩張枱同一堆積木，仲有D朱銘嘅作品草圖放咗喺到，畀小朋友跟住草圖砌返出來，但以燒腩仔宜家嘅年紀，咁高難度嘅嘢又點會做到吖，所以佢都係拎D積木亂砌一通。
之後沿路行返入去，都有D唔同種類嘅展品放咗喺到。
因為一早預咗要喺到食埋lunch先走，所以入場時買定幾間餐廳都適用嘅餐飲套票，我哋來呢間餐廳就有三款食物揀同汽水任飲，睇落都好似幾好食，但...實際個味有D怪，台灣式嘅西餐，艾菲唔係好食得落口，反而燒腩仔好like成碟清晒﹗
食飽真係諗住執嘢走㗎啦，不過燒腩仔又叫肚痛，咁咪派洗手間專員米高陪佢去，艾菲就留喺餐廳到呆等，然後艾菲手痕打開張地圖來睇，依？人間廣場？咪就係艾菲最想去個位？點解頭先無見到？終於決定拉大隊返入去走多轉...
沿路又經過呢堆士兵群，艾菲勸咗燒腩仔勁耐佢都話唔OK唔肯埋去，最後決定親身上陣埋去扮軍人，嘻...
唔肯扮軍人姐，玩吓槍都仲OK嘅，不過你想佢投入D趴喺到玩就無可能啦﹗
行吓行吓仲畀我哋見到佢添﹗艾菲同燒腩仔都有D驚只敢遠望。
行咗十分鐘左右終於都到啦﹗原來呢個位係要特登過橋行上去，又因為我哋本身諗住只行室外，唔行美術館本館，所以米高以為艾菲唔去就miss咗啦﹗
特登返轉頭走多轉，就係為咗呢個拎住遮嘅「紳士」群像，仲要燒腩仔好配合肯拎把遮埋去一齊扮紳士，令成件事變得更圓滿﹗
去完人間廣場我哋就急急腳行返去入口附近準備走啦，點知燒腩仔再一次叫肚痛（係呀...又肚痛呀...），艾菲就自己喺門口兩間鋪頭到行呀行，終於買咗一架紙製郵政車畀燒腩仔玩（本身諗住即買即砌即玩氹佢開心㗎，但見佢興趣不大就收埋咗，決定等佢大個D先拎出來畀佢玩），同一個單鞭下勢嘅鎖匙扣畀自己。
離開美術館，我哋就全速前進去野柳地質公園，車程大概二十分鐘左右，難得一場來到都有諗過買飛入場㗎，不過有個小朋友一上車就扭眼瞓，艾菲用盡方法都叫唔醒佢，到落車時仲全程屎面兼發皮四，再見到成個山都係人嘅墟冚情景，我哋就決定來遠望吓影張相，到此一遊就算。
野柳最出名嘅女王頭，其實喺場外用相機zoom埋去都勉強望到嘅...而呢個扭眼瞓發皮四中嘅小朋友，最後要艾菲買杯檸檬愛玉畀佢先順返條氣。
不過艾菲覺得去返金山區嘅觀景台，來遠咁望返過野柳仲靚，連另一邊嘅燭台雙嶼都睇到。
為咗避開黃昏時段嘅塞車時間，我哋去完野柳就直接返台北，喺台北車站還完車見時間尚早，先返酒店抖吓順便幫燒腩仔換過件衫（之前跌落水搞到成身泥），跟住梗係出發去搵食啦，只係行過便利店，艾菲已經忍唔住要買枝每次來台灣都必食嘅百吉布丁大雪糕，個包裝咁多年來都無變過，個味同質感依然係勁布丁，讚﹗
第一次踏足西門町嘅燒腩仔，一來就喺紅樓前上演一套超入戲嘅《迷失西門町》，kakaka...
我哋來西門町唔係為咗行街，而係為咗食田季發爺燒肉，來台灣除咗掃夜市之外，唔正正經經食返餐好嘅實在對唔住自己，而喺buffet，火鍋同燒肉之間我哋揀咗後者，出發前上網book定位，來到等一陣就有人安排我哋入座。
Meun有三款任食任飲餐揀，原先米高想揀最貴NT699嘅極品餐，但艾菲覺得只係為幾隻生蠔畀貴D唔值得，於是最後拍板食中價嘅NT539豪華餐，小童100cm以下免費，呢到出名係會有職員埋來幫/教你燒肉，免得你浪費食材，D職員都真係燒得好快手，勁到好似做緊表演咁，最尾個甜品年糕燒到啱啱好超好味，至於其他食物同環境都唔差，雖然我哋有隻小魔怪喺側邊搞搞震（佢keep住肚仔唔舒服，所以都唔多願食），兩個人兩把口又只係食得兩round咁大把，不過都好滿足好開心呀﹗
食飽喺西門町附近逛咗陣就轉戰師大夜市，原來呢個夜市無咩掃街嘢食，主打係賣年青人潮流物品，艾菲呢D師奶仔當然買唔到D咩，只喺DAISO NT39店買到兩pack不織布，同文具鋪買到張讀書時買過嘅哈哈笑貼紙。
行完師大夜市就返酒店休息，因為係喺台北嘅最後一晚，艾菲千辛萬苦搞掂燒腩仔瞓覺仲要努力執行李，而米高呢個魔鬼就忽然問艾菲食唔食宵夜，好貼心咁提供埋免費外賣服務添，搞到艾菲忍唔住食埋呢個波堤獅牛奶冰淇淋落肚先瞓，真係肥死人啦﹗>.<
Day 1 HK>宜蘭 part 1
Day 1 HK>宜蘭 part 2
Day 2 宜蘭>台北 part 1
Day 2 宜蘭>台北 part 2
Day 3 台北>野柳>台北 part 1
沒有留言:
張貼留言