大家對呢種遊樂場仲有無印象？唔知由幾時開始，呢D明明係我哋由細玩到大，夏天辣住pat pat都要玩嘅遊樂場設施，拆吓一個拆吓又一個，換晒一式一樣嘅膠滑梯，然後艾菲前排突然發現，遠在天邊近在眼前，喺娘家附近嘅宏福苑仲有一個（娘家樓下本來都有一個，但半年前都畀房署拆埋啦），講咗好耐話要帶燒腩仔去玩，但次次返娘家都匆匆忙忙咁，終於今次有多D時間，去完火車博物館食埋下午茶，就單拖帶佢來玩。
有成層樓咁高，樓梯又45度傾斜嘅滑梯，燒腩仔起初都話驚唔太敢玩，不過艾菲陪佢上去，抱住佢玩咗一次之後，佢就好勇咁可以自己上上落落，反而係太耐無玩過嘅艾菲，上到一半時居然覺得怯，真係年紀大啦...
大膽到專登企喺呢個位大叫艾菲，反而係企地面嘅艾菲怕佢跣腳跌落來...（呢位媽媽真係煩，又要帶個仔來玩又要驚:P）
Hi!!!開心到呢...
其實個滑梯一D都唔跣，大概係缺乏保養掛，一齊玩嘅家長話美林邨條同款滑梯滑同刺激過呢條多多聲。
對面有另一個同屬經典嘅滑梯。
玩完頭先個高階版，呢個對佢來講絕對係easy joy，自上自落無難度﹗
整乜連個電單車搖搖馬都型過宜家嘅咁多？
呢隻蝸牛相信大家都爬過，艾菲前排同朋友傾偈講開，宜家D公園多數以安全為大前題，為免小朋友受傷家長投訴，少咗好多攀爬同會搖會郁嘅設施，結果就出現好多感統有問題嘅小朋友，而燒腩仔明顯都係其中一個，可幸嘅係佢情況唔算嚴重，艾菲平日畀多D唔同挑戰佢，等佢多接觸唔同嘢就OK。
宜家呢個年代，都應該無乜邊個小朋友識爬呢隻蝸牛，燒腩仔喺呢到穿穿插插咗陣完全搞佢唔掂，終於要艾菲親身示範，教佢爬最易嘅蝸牛頭，佢先成功爬到上第二級。
屋苑嘅另一邊仲有呢個由木同鐵組合而成嘅設施，佢好在無樓梯上可以逼燒腩仔爬，但始終有三十年歷史（都唔知止唔止三十年啦），條鐵通已經有D彎同鬆，艾菲要喺後面睇實以防燒腩仔跣腳，估計佢都唔捱得幾多年，真係玩得一日得一日。
上面有條由木板砌成嘅橋，木與木之間嘅空隙明明係小兒科，但玩唔慣嘅燒腩仔就行到步步驚心咁嘅樣，不過艾菲都欣賞佢肯去嘗試，喺艾菲鼓勵下都行咗兩次，無再好似之前咁爆喊or索性話唔玩。
行完橋最開心就係呢刻，sir...
玩完滑梯見到地下有堆數字，燒腩仔已經識問艾菲係唔係跳飛機來，仲即刻來來回回咁跳咗幾次添﹗
而是日最大驚喜係，燒腩仔終於識行平衡木，本來佢打死都唔肯自己行，但艾菲同佢試吓試吓佢又OK喎﹗
喺娘家玩咗三日，我哋兩母子就返屋企啦，米高亦終於喺星期一晚返來，雖然今次佢去唔到西松屋同阿卡將幫艾菲掃貨，但喺艾菲嘅搖控下佢都買到D好嘢返來（特別係Muji盒日本限定陶瓷畫筆，要快手買隻淨色杯返來試吓個效果先得），仲好醒目咁買定宵夜同好多零食返來塞住艾菲把口添﹗
沒有留言:
張貼留言