今年心血來潮，忽然有想去書展嘅衝動，於是趁米高星期五放假，可以幫手湊住燒腩仔，艾菲就拋夫棄子單拖入去逛，仲好慳家咁早D入場買十蚊飛，盡量將個成本降低D。
一如往年，一入兒童館就會見到新雅嘅booth，艾菲唔覺唔覺喺入面都逛咗大半個鐘，不過佢D認字卡同德育系列嘅圖書艾菲已經有，其他新出嘅圖書又唔太啱燒腩仔，最終只係買咗呢本同學仔媽咪推介嘅迷宮書，相對市面買到嘅迷宮書精美同簡單，啱晒燒腩仔呢D介乎識與唔識之間嘅年紀，星期六出街坐車時同佢玩咗陣，佢都玩得好開心同越來越叻啦（同學仔媽咪教唔好用筆玩，就咁用手指玩就可以重覆又重覆咁再玩）﹗
之後去隔離小樹苗booth又逛咗大半個鐘，不過都係空手而回，始終啱啱先喺台灣抬咗D書返來，都無咩中文書特別想買，然後行過一個專賣台灣繪本嘅booth，畀艾菲遇到呢本之前行誠品見唔到嘅《我的臉》，快睇內容都幾特別，估會啱燒腩仔就決定買啦﹗
正當艾菲仲喺到研究緊其他台灣繪本時，忽然波媽同波哥喺眼前走過喎，不過波哥初時見到艾菲就想走，所以艾菲都唔敢亂來，後來佢同艾菲一齊睇中咗五味太郎嘅《數字在哪裡》，艾菲就剩機用呢本書吸引佢埋來，之後仲用《我的臉》成功氹到佢同艾菲自拍添呀﹗YEAH！
相對好粗魯同安全系數勁高嘅燒腩仔，波哥真係好溫文同好好玩，成個親善大使咁，艾菲只係同佢講陣故事，佢已經不自覺咁捱咗埋來聽，好容易就可以同佢fd到，如果唔係艾菲要爭取時間揀書，艾菲實同佢玩耐D，而最冧冧豬當然係臨走時波哥送咗個飛吻畀艾菲啦...啦...啦...
然後順住行咗好多個booth，好多都做緊$100/7本嘅優惠，但艾菲就揀極都揀唔啱，之後路過青田教育中心嘅booth，以書展價$206.4買咗呢套《我自己會讀》嘅紅輯，又係同學仔媽咪推介嘅書，對認字有幫助咁話，艾菲見燒腩仔呢排好熱衷睇書，成日拎D書出來叫我哋講佢聽，而且D書仔細細本放手袋帶出街都OK（唔想佢次次出街食飯都係車同車啦），就決定買一輯來試吓個效果。
買完中文書就要集中火力睇英文書，ORT艾菲已經決定暫時唔買，要睇去圖書館借就算（其實已經借咗幾次，燒腩仔似乎對佢興趣不大），工具書屋企又有一堆，要買就買一D特別D，圖書館少有但又唔可以太深，兼夾價錢平過或者同淘寶差唔多嘅（艾菲以$50為界線），然後就畀艾菲遇到呢本盛惠$49.9嘅《Rusty Robot》，貪佢兩隻眼夠eye catching，仲係touch & feel嘅書來，可以畀燒腩仔呢個感統比較差嘅人摸多D唔同質感嘅嘢。
跟住行吓行吓，見到有檔全場唔係$10本就係$20本，艾菲又埋去揀咗四本，雖然本《Love from my Heart》個心心掣已經壞咗唔著，但以$10本肯定抵過淘寶嘅價錢，個內容仲要有D意思嘅，艾菲都唔會要求咁多啦﹗
喺另一檔見到呢本《What's the time, Mr Wolf》，中間可以插手指入去扮狐狸先生講嘢，又可以畀小朋友學睇時間，只售$39就決定買埋佢。
買咗成堆書先行到去Fun to Read嘅booth，見到好多好靚有唔同機關嘅board book，價錢都係$50一本左右，但考慮到燒腩仔已經過咗要用機關先肯坐定睇書嘅階段，艾菲就忍住手無買，只係喺$100/3本嘅書堆中揀咗三本就走。
路過一檔有好多款砌圖揀嘅booth，買咗呢個盛惠$16嘅12塊Thomas砌圖，成功贏得燒腩仔歡心，即晚已經砌咗N咁多次。
臨走見Croyola有八折，like & share佢個facebook page更加可以全單再九五折，就平平地買咗盒顏色筆同畫筆畀燒腩仔用。
唔覺唔覺又買咗堆書返屋企，好彩米高都好支持無畀說話艾菲聽，而燒腩仔見到都好開心，短短兩日已經同佢睇咗七本新書，不過艾菲最開心呢，就係專登喺離場前面懵懵咁返新雅個booth，問D睇檔姐姐拎嘅Thomas紙帽，平日乜帽都唔願帶嘅燒腩仔居然好乖咁肯帶，仲要好鐘意咁玩足幾日添呀﹗
沒有留言:
張貼留言